އަނެއްކާ ވެސް ދެ އަނބު ވަގު އަތުލައިގެންފި

ވަގަށް އަނބު ބިން ދެ މީހަކު އަނެއްކާ ވެސް އަތުލައިގަނެ، ބަންދު ކޮށްފި އެވެ.

ދައުލަތުގެ އިދާރާތަކާއި އަދި މީހުންގެ ގޭގެގައި ހައްދާފައި ހުންނަ އަނބު ގަސްތަކުން ވައްކަން ކުރާ މައްސަލަ ވަނީ ވަރަށް ބޮޑުވެފަ އެވެ. އިއްޔެ ފުލުހުން ވަނީ ދެ ތަނަކުން ވަގަށް އަނބު ބިން ދެ މީހަކު ހައްޔަރުކޮށްފަ އެވެ.

އޭގެ ތެރެއިން އެކަކީ އުމުރުން 42 އަހަރުގެ ލ. ގަން، މުހައްމަދު ހަލީމެވެ. އޭނާ އަތުލައިގެންފައި ވަނީ ޖުވެނައިލް ކޯޓުގެ ފާރުމައްޗަށް އަރައިގެން އަނބު ބިނުމަށްފަހު ދާން އުޅެނިކޮށެވެ. އޭނާ ހުއްޓުވީ ކޯޓުގެ ސެކިއުރިޓީންނެވެ.

ސެކިއުރިޓީ މީހުންގެ އަމުރަށް އެތަނުން ދާން އުޅެނިކޮށް ފުލުހުން ވަނީ އޭނާ ހުއްޓުވައި، ހައްޔަރު ކޮށްފަ އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، ހަތް ދުވަހަށް ބަންދު ކުރަން ވަނީ އަމުރުކޮށްފަ އެވެ.

އޭނާގެ މައްޗަށް ކްރިމިނަލް ކޯޓުން ނެރުނު ކޯޓު އަމުރުގައިވާ ގޮތުން، މުހައްމަދު ހަލީމަކީ ގިނަ އަދަދެއްގެ ކުށުގެ ރެކޯޑު އޮންނަ މީހެކެވެ. އޭގެ ތެރޭގައި ގިނައީ ވައްކަމުގެ މައްސަލަތަކެވެ. މިއީ އޭނާ ހައްޔަރު ކުރި 63 ވަނަ ފަހަރެވެ. އަދި ބަންދު ކުރި 30 ވަނަ ފަހަރެވެ.

ވަގަށް އަނބު ބިން މައްސަލައިގައި އިއްޔެ ދެން ބަންދުކޮށްފައި ވަނީ އުމުރުން 30 އަހަރުގެ މ. ދާރުލްގަރާރު، އިސްމާއިލް ވިޝާލެވެ. އޭނާ ވައްކަން ކޮށްފައި ވަނީ ގައުމީ ޔުނިވާސިޓީގެ ފެކަލްޓީ އޮފް ހެލްތު ސައިންސް އިމާރާތުގައި ހުން އަނބު ގަހުންނެވެ.

އޭނާ ހައްޔަރު ކޮށްފައި ވަނީ އަނބު އަޅާފައި ހުރި ދަބަހެއް އޭނާ ގެންގުޅެނިކޮށެވެ. ފުލުހުން ސުވާލު ކުރުމުން، އެތަނުން އަނބު ބިނީ ސެކިއުރިޓީގެ ހުއްދައާއެކު ކަމަށް ބުނި ނަމަވެސް، ފުލުހުން ބެލިއިރު އެތަނުގައި ސެކިއުރިޓީއެއް ނެތް ކަމަށް އޭނާގެ މައްޗަށް ނެރުނު ކޯޓު އަމުރުގައިވެ އެވެ.

އިސްމާއިލް ވިޝާލް ވެސް ބަންދު ކުރަން އަމުރުކޮށްފައި ވަނީ ހަތް ދުވަހަށެވެ.