އިސްރާއިލް ސިފައިންގެ އިތުރު މީހަކު މިނިވަންކޮށްފި

ގާޒާގެ ހަލާކުވެފައިވާ އިމާރާތްތަކުގެ ތެރޭގައި 15 މަސް ދުވަހު ހަމާސް އިން ފޮރުވައިގެން ގެންގުޅުނު އިސްރާއިލްގެ ސިފައިންގެ މީހާ މިނިވަންކޮށްފި އެވެ. 

ފަލަސްތީނުގެ ބިމަށް ގަދަކަމުން ވެރިވެގަންގެން ތިބި އިސްރާއިލްގެ އަންހެން ސިފައިންގެ މީހާ ހަމާސް ހަނގުރާމަވެރިންގެ އަތްދަށަށް ދިޔައީ މިދިޔަ އަހަރު ހަމާސް އަގްސާގެ ތޫފާންގެ ނަމުގައި އިސްރާއިލަށް ދިން ހަމަލާފަ އެވެ. މި ހަމަލާގައި އިސްރާއިލްގެ 100 އަށްވުރެ ގިނަ ރަހީނުން ހަމާސް އިން ގެންދިޔަ އެވެ. މިގޮތުން އެ ގައުމުގެ ގިނަ އަދަދެއްގެ ސިފައިންވެސް ހިމެނެ އެވެ. ހަމާސް އިން އޭރު ބުނީ މި މީހުން މިވަން ކުރާނީ އިސްރާއިލްގެ ޖަލުތަކުގައި ތިބި ފަލަސްތީނުގެ ރައްޔިތުން ދޫކޮށްލުމުންނެވެ. 

ނަމަވެސް އިސްރާއިލުން ވަނީ ބޯހަރުކަން ދައްކައި ގާޒާ އަށް އަރައިގަނެ ގަދަކަމުން ރަހީނުން މިނިވަން ކުރަން މަސައްކަތްކޮށްފަ އެވެ. ނަމަވެސް އެކަން ނާކާމިޔާބުވުމުން އެންމެފަހުން ވަނީ ފަލަސްތީނުގެ އަސީރުން މިނިވަން ކުރަން ހަމާސްއާއެކު ޑީލަކަށް ގޮސްފަ އެވެ.   

ހަމާސް އިން މިއަދު ދޫކޮށްލި 20 އަހަރުގެ އަންހެން ސިފައިންގެ މީހާ އަގަމް ބާޖާ ދޫކޮށްލިއިރު މިއަދު އިތުރު ތިން މީހަކު މިނިވަންކޮށްފައިވެ އެވެ. މި މީހުން މިނިވަންކުރީ ގާޒާގެ ތިން ސަރަހައްދަކުންނެވެ. މިނިވަން ކުރި އަގަމް ބާޖާ ނެރެގެން ދިޔައިރު އޭނަ ހުރި އިސްރާއިލް ސިފައިންގެ ޔުނީފޯމްގަ އެވެ. މިކަންކުރީ ފުރިހަމަ އަށް ހަތިޔާރު އަޅައިގެން ތިބި ހަމާސްގެ ހާއްސަ ފައުޖެއްގެ ބެލުމުގެ ދަށުންނެވެ. މި އަންހެން ސިފައިންގެ މީހާ ރެޑްކްރޮސްއާ ހަވާލު ކުރި ރަސްމީއްޔާތު ބެލުމަށް ފަލަސްތީނުގެ ގިނަ ބަޔަކު ޖަމާވެގެން ތިއްބެވެ އެވެ. 

ފިޔަވަހި ތަކަށް ބަހާލައިގެން ހަނގުރާމަ ހުއްޓާލަން އިސްރާއިލުން ވެފައިވާ އަހުދުގެ ދަށުން މިއަދުވެސް ފަލަސްތީނުގެ 100 އަށްވުރެ ގިނަ ރައްޔިތުން އިސްރާއިލްގެ ޖަލުތަކުން މިނިވަންވާނެ އެވެ.