އިފުރު ރިސޯޓުގެ ބިދޭސީ މުވައްޒަފަކު މޫދަށް ގެއްލިގެން ހޯދަނީ

އިފުރު އައިލެންޑް މޯލްޑިވްސްގައި މަސައްކަތް ކުރާ އިންޑިއާ މީހަކު މޫދަށް ގެއްލިގެން ހޯދަން ފަށައިފި އެވެ.

އެމްއެންޑީއެފް އިން މިއަދު ބުނިގޮތުގައި ގެއްލިގެން ހޯދަމުން ދަނީ އުމުރުން 26 އަހަރުގެ އިންޑިއާ މީހެކެވެ. އޭނާ ގެއްލިގެން ރިޕޯޓުކޮށްފައި ވަނީ މިމަހުގެ 27 ވަނަ ދުވަހުގެ 16:41 ގައެވެ.

މި ހާދިސާގެ މައުލޫމާތު ލިބުމާއެކު އެ މީހާ ހޯދުމުގެ މަސައްކަތް ކޯސްޓްގާޑް ފަސްޓް ސްކޮޑްރަންއިން ވަނީ ފަށައިފަ އެވެ.

އެމްއެންޑީއެފް އިން ބުނީ އެ މީހާ ހޯދުމަށް ކޯސްޓްގާޑް ފަސްޓް ސްކޮޑްރަންގެ ހާބަރު ކްރާފްޓާއި ސީ އެމްބިއުލައިސް އަދި ފުލުހުންގެ އެހީތެރިކަމާ އެކު ކަނޑުމަގުން 74.18 ސްކެއާ ނޯޓިކަލް މޭލު ބަލައިފައިވާ ކަމަށެވެ.

އޭގެ އިތުރުން ކޯސްޓްގާޑްގެ ޑައިވަރުންނާއި އިފުރު މޯލްޑިވްސް ރިސޯޓް މުވައްޒަފުންގެ އެހީތެރިކަމާ އެކު ޑައިވްކޮށްގެން 16،0718 ސްކެއާ މީޓަރު ބަލާފައިވެ އެވެ. އަދި ކޯސްޓްގާޑްގެ ޑައިވަރުން ސްނޯކެލް ކޮށްގެން 46،814 ސްކެއާ މީޓަރު ބަލާފައިވެ އެވެ.

ވައިގެމަގުން 213 ސްކެއާ ނޯޓިކަލް މޭލަށް ބަލާފައިވާ ކަމަށް ވެސް އެމްއެންޑީއެފް އިން ބުންޏެވެ. ނަމަވެސް މިހާތަނަށް މީހާ ފެނިފައެއް ނުވެ އެވެ.