އަލީ ރަމީޒުގެ ސްޓޭޓަސްއާމެދު ހިތްހަމަނުޖެހި ނިއުމާގެ ވަރުގަދަ ރައްދެއް

ދައުވަތުގެ މައިދާނުގައި ހަރަކާތްތެރި އަލީ ރަމީޒު މިއަދު ޖެހި ޕޯސްޓަކާއި ގުޅިގެން ކުރީގެ ފިލްމީ ތަރި ނިއުމާ މުހައްމަދު ވަރަށް ބޮޑަށް ހިތްހަމަނުޖެހުން ފާޅުކޮށް ވަރުގަދަ ރައްދެއް ދީފި އެވެ.

ނިއުމާ ހާލުގައި ޖެހި މާލެ ދޫކޮށް އެހެން ރަށަކަށް ބަދަލުވެފައިވާ ކަމަށް ނޫހެއްގައި އިއްޔެ ރިޕޯޓް ކުރި އެވެ. އެ ނޫހުން އެ ރިޕޯޓް ގެނެސްދިނީ ނިއުމާ ކޮށްފައިވާ ޕޯސްޓަކަށް ބިނާކޮށެވެ. އޭގައި ނިއުމާ ބުނީ ހަޔާތުގައި ދިމާވި އެންމެ ނިކަމެތި ދުވަސްތައް ތަހައްމަލުކުރުމަށް ފަހު، މުޅި ދިރިއުޅުން ބިނާކޮށްފައި އޮތް މާލެ ދޫކޮށް ދާން ޖެހިފައިވާ ކަމަށެވެ.

ނަމަވެސް އޭނާ ބަދަލުވީ ރަށެއް ނުބުނެ އެވެ.

އެ ވާހަކަތައް ރިޕޯޓް ކުރުމުން ނިއުމާ ވަރަށް ބޮޑަށް ހިތްހަމަނުޖެހުން ފާޅުކޮށް އޭނާ މާލެއިން ބަދަލުވީ ހުޅުމާލެއަށް ކަމަށް ބުނެ ސްޓޭޓަސްއެއް ޖެހި އެވެ. ފަހުން އެ ނޫހުން ރިޕޯޓް ކުރި ގޮތުގައި ނިއުމާ ދިރިއުޅުން ބަދަލުކުރީ ފ. ނިލަންދޫއަށެވެ. އަދި އޭނާގެ ދަރިފުޅު ނިލަންދޫގައި ހުންނަ ފ. އަތޮޅު ތައުލީމީ މަރުކަޒަށް ވައްދާފައިވާ ކަމަށް ވެސް ބުނެފައިވެ އެވެ.

ނިއުމާއާ ގުޅޭ މި ހަބަރުގެ ބައެއް ވާހަކަތައް ހިއްސާކޮށް ލަވައިގެ ދުނިޔޭގައި އެންމެ ބޮޑު މަޝްހޫރު ކަމެެއް ހޯދި އަދި މިހާރު މިއުޒިކާ މުޅީން ދުރުގައި ދައުވަތުގެ މަސައްކަތަށް ހާއްސަވެ ހުރި އަލީ ރަމީޒު ވަނީ ފިލްމު ކުޅުމާ މިއުޒިިކު ކުޅުން ފަދަ ހަރާން ކަންކަމުން ލިބޭނެ ހިތްހަމަޖެހުމެއް ނޯންނާނެ ކަަމަށް ބުނެފަ އެވެ.  އަދި އެއީ "މުޑުދާރު" ކަންކަން ކަމުގައި ސިފަކޮށްފައިވެ އެވެ.

އަދި ބުނީ އެފަދަ ކަންކަމުން މީހުންގެ ލޯބި ލިބޭ ކަމަށް ހީވުމަކީ އިންސާނާގެ ކޮށި ވިސްނުމަށް ޝައިތާނާ ވައްދައިދޭ ވަސްވާހެއް ކަމަށެވެ.

"ހާލުގައި ޖެހޭ ދުވަހު އެއްކަލަ 'ލޯބި' ވީ އެކަކު ވެސް ނުހުންނާނެ އެހީތެރިވާން. އެއީ ކީއްވެ؟ އެއީ އެ މީހުން އެ ވީ ހަގީގީ ލޯބި ކަމުގައި ނުވާތީ،"

ނިއުމާ ވަނީ ވަގުތުން އެ ވާހަކަތަކަށް ރައްދު ދީފަ އެވެ. އަދި ބުނީ އަލީ ރަމީޒު ފަދަ ދީނީ އިލްމުވެރީން ކަންކަން ވާނުވާ އެނގިގެން އެއްޗެހި ކިޔާނަމަ ރަނގަޅުވާނެ ކަމަށެވެ. -- އަލީ ރަމީޒަކީ ދީނީ އިލްމުވެރިއެއް ކަމަށް ނިއުމާ ބުންޏަސް އަލީ އަކީ އިލްމުވެރީންގެ ވާހަކަތައް އާންމުންނަށް ގެނެސްދީ ދީނުގައި ކަން  އޮންނަގޮތް ބަޔާން ކޮށް ދިނުމާ ދައުވަތުގެ މައިދާނުގައި އިލްމުވެރީންނާއެކު މަސައްކަތް ކުރާ މީހެކެވެ. ދީނީ އިލްމުވެރިއެއް ނޫނެވެ. އަލީ ވެސް އެފަދަ ގޮތަކަށް ޕޯޓްރޭވެގެން މަސައްކަތެއް ނުކުރެ އެވެ. --

ނިއުމާ ވަނީ އޭނާ އަކީ އރޔނ ފިލްމު ކުޅެގެން މަޝްހޫރުވި މީހެއް ނޫން ކަމަށާ އޭނާ ފިލްމު ކުޅުނީ ބަންދު ކޮޓަރިއެއްގައި ވެސް ނޫން ކަމަށް ބުނެފަ އެވެ. އަދި ބުނީ އޭނާ ފިލްމު ކުޅުނީ އެތައް ބަޔަކު ތިބެގެން އެންމެނަށް ފެންނަ ގޮތަށް ކަމަށާ ފައިސާ ހޯދީ ހަލާލު ގޮތުގައި ކަމަށެވެ. އަލީ ރަމީޒަށް ނިސްބަތްކޮށް "މުޑުދާރު" ލަވަތައް ކިޔައިގެން ހޯދި ފައިސާއަށް ހެދީ ކިހިނެތްތޯ ވެސް ސުވާލުކޮށްފައިވެ އެވެ. 

އަދި އޭނާއާ ގުޅޭ ވާހަކަތައް ދައްކާ "ނުބެހުމަށް" އެދިފައިވެ އެވެ.