55 ރަށެއްގެ ކައުންސިލް އިދާރާ އަލުން އިމާރާތް ކުރަން ހަވާލުކޮށްފި

ބާވެ، ވީރާނާވާން ކައިރިވެފައިވާ 55 ރަށެއްގެ ކައުންސިލް އިދާރާ އަލުން އިމާރާތް ކުރުމަށް މެލޭޝިއާގެ ކުންފުންޏަކާ ހަވާލުކޮށްފި އެވެ.

ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މި 55 ރަށުގެ ކައުންސިލް އިދާރާތައް އަލުން އިމާރާތް ކުރުމަށް ހަވާލުކޮށްފައި ވަނީ މެލޭޝިއާގެ ކުންފުންޏެއް ކަމަށްވާ "ހެކްސްޓާ ގްލޯބަލް" އާއެކު އެވެ.

މިކަމަށް ހާއްސަކޮށްގެން އިއްޔެ ބޭއްވި ހާއްސަ ރަސްމިއްޔާތުގައި، ސިޓީޒް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީގެ ފަރާތުން މި އެއްބަސްވުމުގައި ސޮއި ކުރެއްވީ ފާމަނަންޓް ސެކްރެޓަރީ ފާތިމަތު މުނާ އެވެ. ހެކްސްޓާ ގްލޯބަލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑައިރެކްޓަރު އަލީ ޝަރީފެވެ.

މިނިސްޓްރީން ބުނެފައި ވަނީ މި މަޝްރޫއުގެ ދަށުން އިމާރާތްކުރުމަށް ހަމަޖެހިފައިވާ 55 ކައުންސިލް އިދާރާގެ މަސައްކަތް ފެށި، އެ އިމާރާތްތަކުގެ ފަސޭހަކަން ކައުންސިލުތަކަށް ކުރިއަށް އޮތް އަހަރުތެރޭ ލިބިގެންދާނެ ކަމަށް އުންމީދު ކުރާ ކަމަށެވެ. 

ލާމަރުކަޒީ ނިޒާމު އިތުރަށް ހަރުދަނާކޮށް، އެ ނިޒާމުގެ ދަށުން ރާއްޖޭގެ އިދާރީ ދާއިރާތައް ބާރުވެރި ކުރުމަށް މުހިންމު ފިޔަވަޅުތަކެއް މި ސަރުކާރުން އަޅަމުން އަންނަ ކަންވެސް މިނިސްޓްރީން ވަނީ ފާހަގަކޮށްފަ އެވެ.

ކޮންޓްރެކްޓާ ފައިނޭންސް އުސޫލުން މި 55 ކައުންސިލް އިދާރާ އެޅުމަށް ހަމަޖެހިފައިވާއިރު، ޕީއެސްއައިޕީ ޕްރޮޖެކްޓްގެ ތެރޭން އިތުރު 50 ކައުންސިލެއްގެ އިދާރާ ވެސް އިމާރާތްކުރާ ގޮތަށް ވަނީ ހަމަޖެހިފަ އެވެ. ޕީއެސްއައިޕީ ޕްރޮޖެކްޓްގެ ތެރޭގައި ހިމެނޭ ކައުންސިލްތަކުގެ މަސައްކަތް ކައިރި ތާރީހެއްގައި ފެށިގެން ދާނެ ކަމަށް މިނިސްޓްރީން ބުންޏެވެ.