ފަލަސްތީނުން އިޒްރޭލު ތިން އަސީރުން ހަވާލުކޮށްފި

އިސްރާއީލުން ފަލަސްތީނުގައި ހިންގަމުން ދިޔަ ނަސްލު ނައްތާލުމުގެ ގަތުލްއާއްމު މެދުކަނޑާލަން ވެވުނު އެއްބަސްވުމާއެކު ދެ ފަރާތުން އަސީރުން މިނިވަން ކުރުމުގެ މަސައްކަތް ފަށައިި އިޒްރޭލުގެ ތިން އަސީރުން މިނިވަންކޮށްފި އެވެ. 

އިސްރާއީލުން ބާރުގެ ބޭނުންކޮށްގެން ސަލާމަތް ކުރާނެ ކަމަށް މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ވައުދުވީ ހަމާސްގެ އަތްދަށުގައި ތިބި އަސީރުގެ ތެރޭގައި ހިމެނޭ ތިން މީހުން މިއަދު މިނިވަންކޮށްފައިވަނީ ހަމާސްއާއެކު ސުލްހައިގެ އެއްބަސްވުމެއް ގާއިމްކޮށް ޑީލެއްގެ ދަށުންނެވެ. މިގޮތުން މިހާރު ވަނީ އިޒްރޭލުގެ ތިން އަސީރުން ވަނީ ރެޑްކްރޮސް މެދުވެރިކޮށް އިޒްރޭލާ ހަވާލުކޮށްފަ އެވެ. 

ހަމާސްގެ އަސްކަރީ ގޮފި އަލް-ގައްސާމް ބްރިގޭޑްސްގެ މުޖާހިދުން ފުރަތަމަ ހަވާލުކޮށްފައިވަނީ ތިން އަންހެނުންނެވެ. 

މި މީހުން އިޒްރޭލާ ހަވާލު ކުރަން ފަލަސްތީނުގެ އަސް-ސަރާޔާ ސްކެއާގައި މިއަދު ބޭއްވި ރަސްމިއްޔާތު ބެލުމަށް ފަލަސްތީގެ އެތައް ހާސް ބަަޔަކު ޖަމާވެފައިވެ އެވެ. އެމީހުން ދިޔައީ ހަމާސްއަށް ތާއީދުކޮށް އަޑު އުފުލަމުންނެވެ. މުޅި ސަރަހައްދު އޮތީ ތަކުބީރުގެ އަޑުން ގުމުމާލާފަ އެވެ. 

އިސްރާއީލާއެކު ވެވުނު އެއްބަސްވުމުގެ ދަށުން ފަލަސްތީނުގެ 2،000 މީހުން ފުރަތަމަ ބުރުގައި ދޫކޮށްލާނެ އެވެ. މިގޮތުން ފުރަތަމަ ދޫކުރާނީ 90 މީހުންނެވެ. މި މީހުންގެ ތެރޭގައި އިޒްރޭލުން ވަގަށް ނަގައިގެން ފަލަސްތީނުގެ އެކި ހިސާބުތަކުން ގެންގޮސްފައިވާ ގިނަ އަދަދެއްގެ ކުޑަކުދިން ވެސް ހިމެނެ އެވެ. މީގެ އިތުރުން އަންހެންގެ ގިނަ ބަޔަކު ވެސް ހިމެނެ އެވެ. 

އިސްރާއީލުން ޣައްޒާގައި ހިންގަން ފެށިފަހުން ޝަހީދުކޮށްލި މީހުންގެ އަދަދު  46,913 އަށްވުރެ ގިނަ އެވެ. އަދި މިހާތަނަށް ޒަހަމްވި މީހުންގެ އަދަދު 110,750 އަރާނެ ކަމަށް އަންދާޒާ ކުރެވެ އެވެ. މީގެތެރޭގައި ގިނަ އަދަދެއްގެ ކުޑަކުދިންވެސް ހިމެނެ އެވެ.