އަހަަރު ނިމުނުއިރު ޖުމްލަ ރިޒާވް 821 މިލިއަނަށް، ބޭނުންކުރެވޭ ގޮތަށް 63 މިލިއަން ޑޮލަރު

ފާއިތުވި އަހަރު ނިމުނުއިރު ދައުލަތުގެ ޖުމްލަ ރިޒާވް 821 މިލިއަން ޑޮލަރަށް އިތުރުވެ ބޭނުންކުރެވޭ ރިޒާވްގެ ގޮތުގައި ހުރި ފައިސާގެ އަދަދު 63 މިލިއަން ޑޮލަރަށް އަރާފަައިވާކަން މަރުކަޒީ ބޭންކުގެ ހިސާބުތަކުން ދައްކައިފި އެވެ. 

ކޮންމެ މަހެއް ނިމުމުން އެ މަހެއްގެ ރިޒާވްގެ ހިސާބުތައް އެމްއެމްއޭއިން އާންމުކުރަމުންދާއިރު، ފާއިތުވި ޑިސެންބަރު މަހުގެ ނިޔަލަށް ރިޒާވްގެ ހިސާބުތައް އެމްއެމްއޭއިން މިހާރުވަނީ އާންމުކޮށްފަ އެވެ. އެ ހިސާބުތަކަށް ބަލާއިރު ޑިސެންބަރުގެ ނިޔަލަށް ރަސްމީ ރިޒާވްގެ ގޮތުގައި ހުރީ 673.2 މިލިއަން ޑޮލަރެވެ. 

އޭގެ އިތުރަށް ރާއްޖޭގެ ބޭންކުތަކުގައި އިންވެސްޓުކޮށްފައި ހުރި ފައިސާގެ ގޮތުގައި 146.3 މިލިއަން ޑޮލަރާއި، ރަސްމީ ރިޒާވްގައި ނުހިމެނޭ ސެކިއުރިޓީސް އިންވެސްޓުމެންޓުގެ ގޮތުގައި ހިމެނޭ 2.3 މިލިއަން ޑޮލަރާއެކު ޖުމްލަ 148.6 މިލިއަން ޑޮލަރު އަދަ ބޭރު ފައިސާގެ އެހެނިހެން އެސެޓުގެ ގޮތުގައި އެމްއެމްއޭގެ ރިޒާވް ހިސާބުތަކުން ފެނެ އެވެ. 

މިހާރު ޖުމްލަ ރިޒާވް ގުނަނީ ރަސްމީ ރިޒާވްއާއި ބޭރު ފައިސާގެ އެހެނިހެން އެސެޓުތައް އެއްކޮށްލައިގެންނެވެ. އެހެންކަމުން ޖުމްލަ ރިޒާވްގައި 821 މިލިއަން ޑޮލަރު ހުންނާނެ އެވެ. ބޭނުންކުރެވޭ ރިޒާވް ހިސާބުކުރަނީ ކުރިއަށް އޮތް އެއް އަހަރުގެ ތެރޭގައި އަދާކުރަންޖެހޭ ބޭރުގެ މާލީ އިލްތިޒާމުތައް ޖުމްލަ ރިޒާވްއިން ކަނޑައިގެންނެވެ. 

ކުރިއަށް އޮތް 12 މަސްދުވަހުގެ ތެރޭގައި އަަދާކުރަންޖެހޭ މާލީ އިލްތިޒާމުތައް ނުވަތަ ޕްރިޑިޓާމައިންޑް ޝޯޓް ޓާމް ނެޓް ޑްރެއިންސްގެ ގޮތުގައި މާލީ ހިސާބުތަކުން ދައްކަނީ 758.6 މިލިއަން ޑޮލަރެވެ. އެ އަދަދު ޖުމްލަ ރިޒާވްއިން އުނިކުރުމުން ބޭނުންކުރެވޭ ރިޒާވްގައި 63 މިލިއަން ޑޮލަރު ހުންނާނެ އެވެ. 

ރިޒާވް ވަރަށް ބޮޑަށް ދަށްވުމަކީ ރާއްޖޭގެ ކްރެޑިޓް ރޭޓިން ދަަށްކުރުމަށް ކްރެޑިޓް ރޭޓިން އެޖެންސީތައްކަމަށްވާ ފިޗްއާއި މޫޑީސްއިން ނިންމައި މައިގަަނޑު ސަބަބެވެ. ސަރުކާރުންވަނީ ރިޒާވް ބޭންކް އޮފް އިންޑިޔާއާއެކު ކަރަންސީ ސްވޮޕު އެއްބަސްވުމެއް ގާއިމުކޮށް 400 މިލިއަން ޑޮލަރު ރިޒާވްއަށް އިތުރުކޮށްފަަ އެވެ. 

ރާއްޖޭގެ ބޭންކުތަކުގައި އިންވެސްޓުކޮށްފައި ހުރި ފައިސާއަކީ މި ކަރަންސީ ސްވޮޕުގެ ތެރެއިން ލިބުނު ފައިސާ އެވެ. ކަރަންސީ ސްވޮޕާއެކު ބޭރު ފައިސާގެ ރިޒާވްގެ ހާލަތު ވަރަށް ބޮޑަށް ރަނގަޅުވި ނަމަވެސް ރިޒާވްއަށް ބޮޑު ކުރިއެރުމެއް އަންނާނެކަމަށް ބެލެވެނީ މި ޖަނަވަރީ މަހުން ފެށިގެން ބޭންކުތަކަށް ބޭރު ފައިސާ ޖަމާކޮށް މާރުކުރުން ލާޒިމުވުމާ ހަމައިންނެވެ.