އަންނަ އަހަރު ކަނޑުހުޅުދޫ ބިން ހިއްކައި ރޯ ހައުސް މަޝްރޫއެއް ހިންގަނީ

ކަނޑުހުޅުދޫ ބަނދަރުގެ މަސައްކަތް މި އަހަރު ފައްޓަވައިދެއްވާނެކަން އިއުލާނުކުރެއްވުމާއެކު އަންނަ އަހަަރު ބިން ހިއްކައި އެ އަހަރު ނުވަތަ ޖެހިގެން އަންނަ އަހަރު ރޯ ހައުސް މަޝްރޫއު ހިންގަވާނެކަމަށް ރައީސް ވިދާޅުވި

ރައީސް މުއިއްޒު ކަނޑުހުޅުދޫ ކައުންސިލާ ބައްދަލުކުރެއްވުން، ފޮޓޯ: ރައީސް އޮފީސް

އަންނަ އަހަރު ކަނޑުހުޅުދޫ ބިން ހިއްކައި އެ ރަަށުގައި ރޯ ހައުސް މަޝްރޫއެއް ހިންގާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ރައީސް މިފަދައިން ވިދާޅުވީ ހުވަދު އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން ގއ.ކަނޑުހުޅުދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި މިއަދު ދެއްކެވި ވާހަކަފުޅުގަ އެވެ. މިއަދުގެ ބައްދަލުވުމުގައި ރައީސްވަނީ އެ ރަށުގެ ރައްޔިތުންނަށް މުހިއްމުވެފައި ހުރި ގިނަ މަޝްރޫއުތަކެއް މި އަހަރާއި އަންނަ އަހަރު ހިންގަވައިދެއްވާނެކަމަށް ވިދާޅުވެފަ އެވެ. 

އެ ރަށު ކައުންސިލުން ފާހަގަކުރި ގޮތުގައި އެ ރަށުގެ ރައްޔިތުންނަށް މިހާރު ކުރިމަތިވެފައި އޮތް އެންމެ ބޮޑު މައްސަލައަކީ އެ ރަށުގެ ބަނދަރުގެ ޖާގައިގެ ދަތިކަމުގެ މައްސަލަ އެވެ. އެ މައްސަލައަށް އަލިއަޅުވައިލައްވަމުން ރައީސްވަނީ އެ މަސައްކަތް ބަޖެޓުގެ ތެރެއިން މި އަހަރު ކުރިއަށްގެންދަން ހަމަޖެހިފައިވާކަން ހާމަކުރައްވާފަ އެވެ. 

ރަށު ކައުންސިލާއި ކޮންސްޓްރަކްޝަން މިނިސްޓްރީގެ މެދުގައި މަޝްވަރާކުރެވިގެން ކައުންސިލުން ބޭނުންވާ ގޮތަށް އެ މަޝްރޫއުގެ ކަންކަން ކުރިއަށްގެންދެވޭނެކަމުގެ ޔަގީންކަން ރައީސްވަނީ ދެއްވާފަ އެވެ. 

އޭގެ އިތުރަށް ރައީސް ވިދާޅުވެފައިވަނީ އެ ރަށުގެ ޒުވާނުންނަށް ކުޅިވަރުގެ ދާއިރާއިން ބޭނުންވެފައިވާ ތަރައްގީގެ މަސައްކަތްތައްވެސް ކުރިއަށްގެންދަވާނެ ކަމަށެވެ. އެގޮތުން ރަށުގެ ފުޓުބޯޅު ސްޓޭޑިއަމް ރަނގަޅު ފެންވަރަށް ތަރައްގީކޮށް ޒުވާނުންނަށް އެތުލެޓިކްސް ތަމްރީނުތައް އެތަނުގައި ކުރިއަށްގެންދެވޭނެ އިންތިޒާމު ހަމަޖައްސަވާނެކަން ރައީސް އިއުލާނު ކުރެއްވި އެވެ. 

ހަމައެހެންމެ އެ ރަށުގެ ސްކޫލުގެ މަލްޓިޕާޕޯސް ހޯލުގެ މަޝްރޫއުގެ ސްކޯޕު މިހާރަށްވުރެ ފުޅާކުރައްވައި އިތުރު ކުލާސް ރޫމުތަކެއް އެ އިމާރާތުގައި އަޅުއްވައިދެއްވާނެކަމަށް އެމަނިކުފާނު ވިދާޅުވި އެވެ. ކަނޑުހުޅުދޫ ސްކޫލުގެ އިމާރަތަކީ 35 އަހަރުވީ އިމާރާތެއްކަމާއި އިމާރާތް ހުރީ ވަރަށް ބޮޑަށް ވީރާނާވެފައިކަން ފާހަގަކޮށް ކައުންސިލުން އެދިފައިވަނީ އައު އިމާރާތެއް އަޅައިދިނުމަށެވެ. 

އެ ރަށު ކައުންސިލުންވަނީ ރަށަށް ދިމާވެފައިވާ ބޯހިޔާވަހިކަމާއި ގޯތިގެދޮރުގެ މައްސަލަ ފާހަގަކޮށް ރޯ ހައުސް މަޝްރޫއެއް ރަށުގައި ހިންގަވަައިދެއްވަން ރައީސް އަރިހުން އެދިފަަ އެވެ. 

ރައީސްގެ ވާހަކަފުޅުގައި ފާހަގަކުރެއްވި ގޮތުގައި އެ ރަށުގައި ގެދޮރުވެރިކަމުގެ މަޝްރޫއެއް ހިންގެން އޮތީ ރަށުގެ ބިން ހިއްކައިގެންނެވެ. އަދި މި އަހަރު ބިން ހިއްކުމުގެ މަޝްރޫއު ހިންގެވުމަކީ ކުރެއްވޭނެ ކަމެއް ނޫންކަން ފާހަގަކުރައްވައި ރައީސްވަނީ އަންނަ އަހަރު އެ މަސައްކަތް އެ ރަށުގައި ކުރިއަށް ގެންގޮސްދެއްވާނެކަމުގެ ޔަގީންކަން ދެއްވާފަ އެވެ. 

އަދި އަންނަ އަހަރު ބިން ހިއްކުމަށްފަހު އެ އަހަރު ތެރޭގައި ނުވަތަ ޖެހިގެން އަންނަ އަހަރުގެ ތެރޭގައި އެ ރަށުގައި ރޯ ހައުސް އެޅުމުގެ މަޝްރޫއެއް ހިންގަވާނެކަމުގެ ޔަގީންކަން ރައީސްވަނީ ދެއްވާފަ އެވެ. 

އެމަނިކުފާނު ފާހަގަކުރެއްވި ގޮތުގައި މިހާރު އަތޮޅުތަކަށް ކުރައްވާ ދަތުރުފުޅުތަކަކީ ރަށްރަށުގެ ރައްޔިތުންނާ ބައްދަލުކުރައްވައި އެ ރަށްރަށުގެ ރައްޔިތުންގެ އަޑުއައްސަވައި އެ ރައްޔިތުންނަށް ބޮޑުވެފައި ހުރި ކަންކަން ބައްލަވައި އެކަންކަމަށް ހައްލު ހޯއްދަވައިދެއްވުމެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.