"ކޮވިޑުގައި ޑެފިސިޓު ބޮޑުނުވާވަރަށް ނިމުނު އަހަރު ޑެފިސިޓު ބޮޑު، ކުރެވުނު ކަމެއް ނެތް"

ކޮވިޑް-19 ގައި ގައުމަށް އާމްދަނީ ލިބޭނެ އެއްވެސް މަގެއް ނެތިވެ އޮތް ހާލަތަށްވުރެ ފާއިތުވި އަހަރު ބަޖެޓުގެ ޑެފިސިޓު ބޮޑުވެފައިވާއިރު ތަރައްގީގެ ގޮތުން ކުރެވުނު ކަމެއް ފެންނަން ނެތްކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ. 

އެކްސްގައި ކުރެއްވި ޕޯސްޓެއްގައި އަމީރު ވިދާޅުވީ ހަރަދު ކުޑަކޮށް ދައުލަތަށް ލިބޭ އާމްދަނީއަކުން ސަރުކާރު ހިންގަވާނެކަމަށް ވައުދުވެވަޑައިގެންނެވި ނަމަވެސް ސަރުކާރާ ހަވާލުވެ ފުރަތަމަ އަހަރު ނިމުނުއިރު 2024 ވެގެންދަނީ ރާއްޖޭގެ ތާރީހުގައިވެސް އެންމެ ބޮޑަށް ބަޖެޓު ޑެފިސިޓުވި އަހަރަށް ކަމަށެވެ. 

އެގޮތުން ފާއިތުވި ޑިސެންބަރު 26 ވަނަ ދުވަހުގެ ނިޔަލަށް ބަޖެޓު ޑެފިސިޓު 14.8 ބިލިއަން ރުފިޔާއަށް އަރާފައިވާއިރު މުޅި އަހަރުގެ ޑެފިސިޓު 15 ބިލިއަން ރުފިޔާއަށް އަރާނެ ކަމުގައި ލަފާކުރެއްވޭކަމަށްވެސް އޭނާ ވިދާޅުވި އެވެ. 

އިތުރަށް އަމީރު ފާހަގަކުރެއްވީ ކޮވިޑް-19އާ ގުޅިގެން ދައުލަތަށް އާމްދަނީ ލިބޭނެ ހުރިހާ މަގެއް ބަންދުވެ، އާމްދަނީ %65 ދަށްވެގެންދިޔަ 2020 ވަނަ އަހަރަށްވުރެވެސް 2024 ގައި ބަޖެޓު ޑެފިސިޓު ބޮޑު ކަމަށެވެ. 2020 ގައި ބަޖެޓު ޑެފިސިޓަކީ 13.5 ބިލިއަން ރުފިޔާ އެވެ. 

އަމީރު ވިދާޅުވި ގޮތުގައި ކޮވިޑް-19 އަށްފަހު ކޮންމެ އަހަރަކުވެސް އޭގެ ކުރީ އަހަރަށްވުރެ ބަޖެޓުގެ ޑެފިސިޓު އައީ ކުޑަކުރަމުންނެވެ. އެގޮތުން 2021 ގައި 11.5 ބިލިއަނުން 2022 ގައި 11.03 ބިލިއަނަށް އަދި 2023 ގައި 10.7 ބިލިއަނަށް ޑެފިސިޓު ކުޑަކުރެވުނުކަމަށް ވިދާޅުވި އެވެ. 

ކުރީގެ މިނިސްޓަރު ވިދާޅުވި މިހާރު ބަޖެޓު ޑެފިސިޓު ކުޑަކުރުމުގައި ހޯދުނު ކާމިޔާބުތައް އޮތީ ފަހަތަށް ޖެހިފަ އެވެ. ރާއްޖޭގެ އެއްވެސް ހިސާބެއްގައި ތަރައްގީގެ މަޝްރޫއެއް ނުހިނގާއިރު، ބިލުތަކަށް ސަރުކާރުން ފައިސާ ނުދޭތީ ވިޔަފާރިތައް ބަނގުރޫޓުވެ، ކުދަި އަދި މެދު ފަންތީގެ ވިޔަފާރިތައް ހުއްޓިފައިވާކަމަށް އޭނާ ތުހުމަތުކުރެއްވި އެވެ. 

އަމީރު އިތުރަށް ފާހަގަކުރެއްވީ ދަރަނި އަދާކުރުމަށް 2024 ގައި ކުރި ހޭދަ ހުރީ އޭގެ ކުރީ އަހަރާ އަޅާބަލާއިރު ދާދި އެއް މިންވަރެއްގައި ކަމެވެ. އަދި ޑޮލަރާއި ރުފިޔާއިން ލިބުނު އާމްދަނީވެސް 2023 އަށްވުރެ އިތުރުވެފައިވާކަން އަމީރު ފާހަގަކުރެއްވި އެވެ. 

އެގޮތުން ޑިސެންބަރު 26 ގެ ނިޔަލަށް 2023 އަށްވުރެ 742 މިލިއަން ރުފިޔާ އިތުރަށް ލިބުނުކަން ފާހަގަކުރައްވައި އަމީރު ވިދާޅުވީ އާމްދަނީ އިތުރުވިއިރު ބަޖެޓު ޑެފިސިޓު 15 ބިލިއަނަށް އެރި ނަމަވެސް ފާއިތުވި އެއް އަހަރު ތެރޭ ކުރެވުނު ކަމެއް ފެންނަން ނެތް ކަމަށެވެ.