ކޮރަޕްޝަނުގެ ތަހުގީގެއް ސަރުކާރުން ނުހުއްޓުވާނެ: އަބްދުއްރަހީމް

ކޮރަޕްޝަނުގެ ތަހުގީގުތަކަށް މި ސަރުކާރުން ހުރަސްނާޅާނެ ކަމަށާއި، ތަހުގީގުތަކުގައި ކަންކުރި މީހަކަށް ނުބަލައި ބަލާނީ ކުރި ކަމަށް ކަމުގައި މަޖިލީހުގެ ރައީސް އަބްދުއްރަހީމް ވިދާޅުވި އެވެ.

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު

މި ދައުރުގައި ކޮރަޕްޝަން މައްސަލަތައް ތަހުގީގުކުރަން ފެށުމުން އެއިން އެއްވެސް ތަހުގީގެއް ސަރުކާރުން ނުހުއްޓުވާނެކަމަށާއި، އެފަދަ މައްސަލަތަަކުގައި ސަރުކާރުން ބަލާނީ ކަންކުރި މީހަކަށް ނޫން ކަމަށާއި، އެމީހަކު ހިންގި އަމަލަށް ކަމުގައި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

ރޭ ޕީއެސްއެމްގެ ރާއްޖެ މިއަދު ޕްރޮގުރާމުގައި ވާހަކަދައްކަވަމުން ވެރިކަންކުރާ ޕީއެންސީގެ ޗެއާޕާސަނުގެ މަގާމުވެސް އަދާކުރައްވާ އަބްދުއްރަހީމް ވިދާޅުވީ ކުރިއްސުރެ ރާއްޖޭގައި ކަން ހިނގަމުން އައި ގޮތަކީ ކޮރަޕްޝަނުގެ މައްސަލަތައް ތަހުގީގުކުރުމުގައި ކަން ކުރި މީހާއަށް ބެލުން ކަމަށެވެ. އެގޮތަށް އަމަލުކުރުމުގެ ސަބަބުން ދައުލަތަށް ގެެއްލުނު ފައިސާ ހޯދުމުގައި ބޮޑެތި ހުރަސްތައް ކުރިމަތިވެ އެ ފައިސާ އަނބުރާ ނުހޯދޭކަމަށްވެސް އެމަނިކުފާނު ވިދާޅުވި އެވެ. 

އިތުރަށް އަބްދުއްރަހީމް ފާހަގަކުރެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެފަދަ މައްސަލަތަކުގައި ކަންކުރި މީހަކަށް ނުބައްލަވާ ކަމަށެވެ. އަދި އެމަނިކުފާނު ބައްލަވަނީ އެމީހަކު ހިންގިކަމަށް ތުހުމަތުވާ އަމަލަކީ ގާނޫނުގެ އިމުގެ ބޭރުން ހިންގާފައިވާ ކަމެއްތޯއާއި އެކަމުގެ ސަބަބުން ދައުލަތަށް ލިބުނު ގެއްލުމަށް ކަމުގައި އަބްދުއްރަހީމް ވިދާޅުވި އެވެ. 

"ކަން ކުރި މީހާއަކަށް ނޫން ބަލަންވީ، ކުރި ކަމަށް ބަލަންވީ. އަޅުގަނޑުމެންނަށް ވަރަށް ގިނަ ފަހަރު ވާ ގޮތެއް މިއީ ކަން ކުރި މީހާ އަށް ބަލައިގެން ކަންކަން ބަލަން އުޅުން. އެހެން އުޅެން ހަދައިގެން އަޅުގަނޑު މި ދެންނެވި ގޮތަށް އެ ފައިސާތައް ނުހޯދި މިހާ ގިނަ ދުވަސްވީ،" އަބްދުއްރަހީމް ވިދާޅުވި އެވެ.  

""ރައީސް ޑރ. މުހައްމަދު މުއިއްޒުގެ އަމާޒަކީ އެކަން ކުރީ ކާކުތޯ ބެލުމެއް ނޫން. އެ ކުރީ ކޮން ކަމެއްތޯ؟ އެކަން ކުރީ ހަމައިންތޯ ނަހަމައިންތޯ ގާނޫނާ އެއްގޮތަށްތޯ ގާނޫނާ ހިލާފަށްތޯ މާލިއްޔަތު ގާނޫނުން އެކަން ކުރަން ތަންދޭތޯ އޭގައި ދައުލަތަށް ގެއްލުން ވަނީ ކިހާވަރެއްތޯ އެ ގެއްލުންވީ ކާކުގެ ސަބަބުންތޯ؟،" 

އަބްދުއްރަހީމް އިތުރަށް ފާހަގަކުރެއްވީ މިހާރު ކޮރަޕްޝަނުގެ ތުހުމަތުވާ މައްސަލަތައް އެކަމަށް ކަނޑައެޅިފައިވާ ގާނޫނީ އިޖުރާއާތުތަކުގެ ތެރެއިން ބަލައި ތަހުގީގު ކުރެވޭ ކަމަށެވެ. އަދި އެ ތަހުގީގުތަކަށްފަހު އެ މައްސަލަތަކުގައި ދައުވާކުރުމާއި ނުކުރުމުގެ އިހުތިޔާރު އޮންނާނީ ޕްރޮސެކިއުޓާ ޖެނެރަލްގެ އަތްޕުޅުގައިކަން ފާހަގަކުރައްވައި އެމަނިކުފާނު ވިދާޅުވީ އެ ގާނޫނީ މަރުހަލާތައް ހިންގަންޖެހޭ ކަމަށެވެ. 

އެމަނިކުފާނު މިސާލެއްގެ ގޮތުން ފާހަގަކުރެއްވީ މި ސަރުކާރުގައި ވަޒީރެއްގެ ފެންވަރުގައި މަގާމަށް އައްޔަންކުރައްވާފައި ހުންނެވި އެޗްޑީސީގެ މެނޭޖިން ޑިރެކްޓާ އިބްރާހީމް ފަޒުލް ރަޝީދުގެ މައްޗަށް އުސޫލުން ބޭރުން ހުޅުމާލެއިން ބިންތަކެއް ވިއްކެވިކަމަށް ތުހުމަތުވުމާ ގުޅިގެން އެކަމުގައި ސަރުކާރުން ތަހުގީގެއް ފެށި ކަމެވެ. 

އެއީ އަޅުގަނޑު މި ދަންނަވާ ވާހަކައަކީ. ފުރަތަމަ ކުރަންޖެހޭ ކަމަކީ ގާނޫނު ތަންފީޒު ކުރުން. މި ކަންކަމަށް އޮތް ހައްލަކީ ގާނޫނު ތަންފީޒު ކުރުން. އަދި ގާނޫނުގައި މި ކަންކަން ހައްލު ކުރަން އުނދަގޫތަކެއް ހުރިއްޔާ އެ އުނދަގޫތައް ފިލުވައި ދިނުމަކީ އެއީ ރައްޔިތުންގެ މަޖިލިހުގެ ޒިންމާއެއް. އެކަން ކޮށްދޭން އަޅުގަނޑުމެން މި ތިބީ ތައްޔާރަށް،" މަޖިލީހުގެ ރައީސް ވިދާޅުވި އެވެ. 

މަޖިލީހުގެ ރައީސް ފާހަގަކުރެއްވި އަނެއްކަމަކީ ސަރުކާރުގެ ވެރިން މަގާމުތަކަށް އައްޔަންކުރައްވާފައި ތިއްބެވީ ރައީސްގެ ޒިންމާތައް އަދާކުރެއްވުމުގައި އެމަނިކުފާނަށް އެހީތެރިވުމަށްކަން ހަނދުމަފުޅުކޮށްދެއްވައި އެއްވެސް ބޭފުޅަކު ގާނޫނާ ހިލާފަށް އަދި ގަވާއިދުގެ ބޭރުން އަމަލެއް ހިންގަވައިފިނަމަ ގާނޫނީ ފިޔަވަޅު އަޅުއްވާނެކަން ރައީސް މުއިއްޒު އަންގަވާފައިވާ ކަމެވެ. 

ސަރުކާރު ކުންފުނިތަކުގެ ސީއީއޯއިންނާއި އެމްޑީން ތިއްބަވާ ވަޓްސްއަޕް ގުރޫޕަކަށް ފޮނުއްވި މެސެޖެއްގައި ރައީސްވަނީ ބޭއިންސާފުން ބަޔަކަށް ކަމެއް މަގުފަހިކޮށްދީ، ކޮރަޕްޝަނުގެ އަމަލެއް ނުވަތަ ގާނޫނާއި ގަވާއިދުގެ އިމުން ބޭރުން އެއްވެސް ބޭފުޅަކު ކަމެއް ކުރެއްވިކަން އެނގިވަޑައިގެންފިނަމަ ފިޔަވަޅު އަޅުއްވާނެކަމަށް ވިދާޅުވެފަ އެވެ. 

އޭގެ ފަހުން ނޫސްވެރިންނާ ވާހަކަދައްކަވަމުން ރައީސްވަނީ ގާނޫނުއަސާސީގެ ދަށުން މަގާމުތަކަށް ބޭފުޅުން އައްޔަންކުރައްވަނީ ކޮރަޕްޝަނުގެ އަމަލުތައް ހިންގެވުމަށް ނޫންކަމަށާއި ރައްޔިތުންނަށް ހިދުމަތްކުރުމަށް ކަމުގައި ވިދާޅުވެ، ކޮރަޕްޝަނުގެ އަމަލުތައް ބެލުމުގެ މިނިވަންކަން ކަމާ ގުޅުންހުރި އިދާރާތަކަށް ފުރިހަމައަށް ދެއްވާނެކަމުގެ ޔަގީންކަން ރައްޔިތުންނަށް ދެއްވާފަ އެވެ. 

"ސަރުކާރުގެ އެއްވެސް ތަނެއް [އިދާރާއެއް] ގައި އަޅުގަނޑު ބޭނުމެއް ނޫން ގަވާއިދާ ހިލާފު އެއްވެސް ކަމެއް ހިނގާކަށް،" ރައީސް ވިދާޅުވި އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.