އެކެއް ޖަަނަަވަރީގެ މަސް ހިސާބު | އެންމެ ގިނައިން މަސް ބޭނީ ހުވަދޫ އޮޑިފަހަރު

މި އަހަރުގެ ފުރަތަމަ ދުވަހު ރާއްޖެއިން އެންމެ ގިނައިން މަސް ބާނާފައިވަނީ ހުވަދޫ އަތޮޅުގެ ދެ ބުރީގެ އޮޑިފަހަރުންކަމަށް މިފްކޯއިން ބުނެފި އެވެ. 

މިފްކޯއިން އާންމުކުރި ހިސާބުތަކަށް ބަލާއިރު މި އަހަރުގެ ފުރަތަމަ ދުވަހު އެންމެ ގިނައިން މަސް ކިރުވާފައިވަނީ މަސް ކިރުވާ ބޯޓު ފަހަރަށެވެ. މިފްކޯގެ މަސް ބޯޓުތަކަށް ޖުމްލަ 221.13 މެޓްރިކްޓަނުގެ މަސް ކިރުވާފައިވާކަމަށް އެ ކުންފުނިން ބުނެފައިވެ އެވެ. 

ދެން އެންމެ ގިނައިން މަސްކިރުވީ ގއ.ކޫއްޑޫގައި ހުންނަ ފިޝަރީޒް ކޮމްޕްލެކްސްއަށެވެ. އެތަނަށް ޖުމްލަ 80.72 މެޓްރިކް ޓަނުގެ މަސް ކިރުވާފައިވެ އެވެ. އަދި އައްޑޫ ފިޝަރީޒް ކޮމްޕްލެކްސްއަށް 9.4 މެޓްރިކްޓަނުގެ މަސް ކިރުވާފައިވެ އެވެ. 

ފެލިވަރު ކައިރީގައި އޮންނަ މިފްކޯގެ މަސް ބޯޓުތަކަށް މަސް ކިރުވި ނަމަވެސް އެ ކޮމްޕްލެކްސްއަށް އެންމެ ޓަނެއްގެ މަސްވެސް އިއްޔެ ކިރުވާފައިނުވެ އެވެ. ނަމަވެސް ފެލިވަރުގައި އޮތް ތިން މަސް ބޯޓަށް 58 މެޓްރިކްޓަނުގެ މަސް ކިރުވާފައިވެ އެވެ. 

މިފްކޯގެ ހިސާބުތަކަށް ބަލާއިރު އެންމެ ގިނައިން މަސް ބާނާފައިވަނީ، ގއ. އަދި ގދ.ގެ ދޯނިފަހަރުންނެވެ. އެގޮތުން ގއ.ގެ 20 ދޯންޏަކުން 80.7 މެޓްރިކް ޓަނުގެ މަސް ބާނާފައިވެ އެވެ. އަދި ގދ.ގެ 22 ދޯންޏަކުން 92.6 މެޓްރިކް ޓަނުގެ މަސް ބާނާފައިވެ އެވެ. 

ދެން އެންމެ ގިނައިން މަސް ބާނާފައިވަނީ ޅ.އަތޮޅުގެ އޮޑިފަހަރުންނެވެ. އެ އަތޮޅުގެ 15 އޮޑިއަކުން 58.1 މެޓްރިކް ޓަނުގެ މަސް ބާނާފައިވާއިރު، ދ.އަތޮޅުގެ ހަތަރު މަސް ދޯނިން 43.4 މެޓްރިކް ޓަނުގެ މަސް ކިރުވާފައިވެ އެވެ. 

ފުވައްމުލަކުގެ 14 އޮޑިއަކުން 26.8 މެޓްރިކްޓަނުގެ މަސް ކިރުވާފއިވާއިރު އައްޑޫގެ ހަތަރު އޮޑިއަކުން 9.4 މެޓްރިކްޓަނުގެ މަސް ކިރުވި އެވެ.