ލަސްވޭގަސްގައި ހުންނަ ޓުރަމްޕު ޓަވަރު ކުރިމަތީ ސައިބާ-ޓްރަކެއް ގޮވައިފި

ލަސްވޭގަސްގައި ހުންނަ ޓުރަމްޕު ޓަވަރު ކުރިމަތީގައި އޮތް ޓެސްލާގެ ސައިބާޓްރަކެއް ބުދަދުވަހުގެ ހެނދުނު ވަގުތެއްގައި ގޮވައި، އެ ޓުރަކުގެ ޑްރައިވަރު މަރުވެ، އިތުރު ހަތް މީހަކަސް އެކިވަރުގެ އަނިޔާތައްވެއްޖެކަމަށް އެމެރިކާގެ ފުލުހުން ބުނެފި އެވެ. 

ޓުރަމްޕު ޓަވަރުގެ ދޮރުމަތީގައި އޮތް އުޅަަނދެއްގައި އަލިފާން ރޯވި ހާދިސާއެއް ތަހުގީގުކުރަމުން އަންނަކަމަށް ލަސްވޭގަސް ސިޓީ ފުލުހުން ސޯޝަލް މީޑިޔާގައި ކުރި ޕޯސްޓެއްގައި ބުނެފައިވެ އެވެ. އެ އަލިފާން ނިއްވައިލެވިފައިވާކަން ފާހަގަަކޮށް އެ ސަރަހައްދަށް މީހުން ނުދިއުމަށް ފުލުހުން އިލްތިމާސްކުރި އެވެ. 

ޓެސްލާ ކުންފުނީގެ ސީއީއޯ އެއްކަސްގައި ޝާއިއުކުރެއްވި ޕޯސްޓެއްގައި ވިދާޅުވީ އެ ޓްރަކު ގޮވީ ޓުރަކުގެ ފަހަތު ސީޓުގައި ނުވަތަ ފަހަތު ބައިގައި ގިނަ އަދަދެއްގެ ގޮވާ ތަކެތި ނުވަތަ ބޮޑު ބޮމެއް އޮވެގެން ކަމަށެވެ. އަދި އެ ގޮވުމަކީ އުޅަނދާ ގުޅުންހުރި ކަމެއް ނޫން ކަމަށެވެ. 

ގާނޫނު ތަންފީޒުކުރާ އިދާރާއެއްގެ އޮފިޝަލެއް ނަން ހާމަނުކުރުން ޝަރުތުކުރައްވައި ބައެއް މީޑިޔާތަކަށް މައުލޫމާތު ދެއްވަމުން ވިދާޅުވެފައިވަނީ އެ ގޮވުމުގެ ހާދިސާ އެ އިދާރާތަކުން ތަހުގީގުކުރަމުން އަންނަނީ ޓެރިރަޒިމުގެ އަމަލަކަށްވުމުގެ ފުރުސަތު އޮތް ހަމަލާއެއްކަމަށް ބަލައިގެން ކަމަށެވެ. 

މި ހާދިސާ ހިނގާފައިވަނީ އައު އަހަރު ފާހަގަކުރުމަށް ނިއު އޯލިއަންސްގެ މަގުމަތީގައި އެއްވެ ތިބި ބައެއްގެ ތެރެއަށް ޕިކަޕެއްގައި މީހަކު ވަދެ ދިން ހަމަލާއެއްގައި 15 މީހަކު މަރުވިތާ ކުޑަ ވަގުތުކޮޅެއް ފަހުންނެވެ. ނިއު އޯލިއަންސްގެ ހަމަލާއަކީ ޓެރަރިޒަމުގެ އަމަލެއްގެ ގޮތުގައި ބަލައިގެން އަންނަނީ ތަހުގީގުކުރަމުންނެވެ. 

ލަސްވެގާސް ފުލުހުންގެ އިސްވެރިޔާ ޝެރިފް ކެވިން މެކްމަހިލް ވިދާޅުވެފައިވަނީ އެ މައްސަލަ ތަހުގީގުކުރަމުން އަންނަނީ ވަރަށް ބޮޑު އިސްކަމެއް ދީގެން ކަމަށާއި، އަދި އެ ހާދިސާއާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އަޅަމުންދާ ކަމަށެވެ. 

މެކްމަހިލް ވިދާޅުވި ގޮތުގައި އާންމުންނަށް ނުރައްކަލެއް އޮތްކަމުގެ އެއްވެސް ނިޝާނެއް މިހާރު ނެތެވެ. ނަމަވެސް ތަހުގީގު އަދި ނުނިމޭކަން ފާހަގަކުރައްވައި ތަހުގީގު ނިމުނުހައި އަވަހަކަށް އިތުރު ތަފުސީލުތައް ހާމަކުރައްވާނެ ކަމަށް ވިދާޅުވި އެވެ.