ފައްޔާޒު ވައްކަމެއް ނުކުރޭ، ނުވެސް ކުރާނެ: އިބްރާ

އެމްޑީޕީގެ ޗެއާޕާސަން ފައްޔާޒް އިސްމާއީލް ވައްކަމެއް ނުކުރައްވާ ކަމަށާ އަދި ވަައްކަމެއް ވެސް ނުކުރައްވާނެ ކަމަށް އޭނާގެ ބޭބެ އިބްރާހިމް އިސްމާއިލް (އިބްރާ) ވިދާޅުވެއްޖެ އެވެ.

އެމްޑީޕީގެ ފުރަތަމަ ރައީސް އިބްރާ މިހެން ވިދާޅުވީ ފޭސްބުކުގައި މިއަދު ކުރެއްވި ޕޯސްޓެއްގަ އެވެ.

ވިދާޅުވީ މިހާރަކަށް އައިސް، ވަރަށް ގިނަ މީހުން ސިޔާސީ ކަންކަމާމެދު އޭނާގެ ބަހެއް ހޯދަން ގުޅާ، މެސެޖްކޮށް ހަދާ ކަމަށެވެ. ނަމަވެސް އެ ސުވާލުތަކަށް ވަކި އެއްޗެއް ވިދާޅުނުވާ ކަމަށެވެ.

ދެން ވިދާޅުވީ މިދެތިން ދުވަހަކު ކުރާ އެއްސުވާލަކީ އޭނާގެ ކޮއްކޮ، ފައްޔާޒަށް ތުހުމަތުކުރާ ވައްކަމުގެ ވާހަކައާ ގުޅޭގޮތުން ކަމަށެެވެ. އެކަމާމެދު އެއްޗެއް ބުނަންޖެހިއްޖެ ކަމަށް ވެސް ވިދާޅުވި އެވެ.

އިބްރާ ވިދާޅުވީ އެމްޑީޕީގެ ސަރުކާރުގައި އިކޮނޮމިކް މިނިސްޓަރަކަށް ފައްޔާޒު ހުންނެވިއިރު، ސިޔާސީ ބައެއް ކަންކަމުގައި ދެ ބޭފުޅުންގެ ވިސްނުން ތަފާތުވެ ދެބަސްވެފައިވާ ކަމަށެވެ. ވިދާޅުވީ އެއީ ސިޔާސީ ކަންކަން ކަމަށެވެ.

އަދި ވިދާޅުވީ ވަރަށް ސާފުކޮށް އެއްވާހަކަ ދަންނަވަން ބޭނުންވާ ކަމަށެވެ. އެއީ އޭނާގެ ކޮއްކޮ ފައްޔާޒު ވައްކަމެއް ނުކުރައްވާ ކަމަށާ އަދި ފައްޔާޒު ވަައްކަން ނުވެސް ކުރައްވާނެ ކަމަށެވެ.

"ޝައްކެއްނެތް މިންވަރަށް، އިންސާފުވެރި ޝަރީއަތެއްގައި އޭނާ ވައްކަމެއް ކުރިކަން ސާބިތު ނުވާހައިހިނދަކު، އެވާހަކަ އަހުރެން ގަބޫލެއް ނުކުރާނަމެވެ،"

އިބްރާ ވިދާޅުވީ އެކަމުގައި ފައްޔާޒު ދިފާއު ވެސް ކުރައްވާނެ ކަމަށެވެ. ނަމަވެސް ސިޔާސީގޮތުން އަދިވެސް އޭނާއާ ދެބަސްވާން ޖެހިދާނެ ކަމަށް ވިދާޅުވި އެވެ.

ރައީސް ސޯލިހްގެ ސަރުކާރުގައި އެންމެ ނުފޫޒުގަދަ ވަޒީރެއްގެ ގޮތުގައި ގިނަ ބަޔަކު ދެކުނީ ފައްޔާޒެވެ. ވާދަވެރީން ފައްޔާޒަށް ވައްކަމާއި ކޮރަޕްޝަންގެ ތުހުމަތު ކުރެ އެވެ.

ދެކެވަޑައިގަންނަވާ ގޮތެއް އެއްވެސް ފޮރުވުމެއް ނެތި ވިދާޅުވާ ފައްޔާޒުއާ ގުޅޭ ތަހުގީގެއް މިވަގުތު އެބަ ހިނގަ އެވެ.