ފައިސާ ނުދީ އޮތް މައްސަލައެއްގައި ފެނަކައިން 7.9 މިލިއަން ކުންފުންޏަކަށް ދޭން ހުކުމްކޮށްފި

ގިނަ އަދަދެއްގެ ރަށްރަށުގައި ފެނަކައިގެ އޮފީސްތަކާއި އިންޖީނުގެތަކާއި އެހެނިހެން މަސައްކަތްކުރަން ހަވާލުކުރި ކުންފުންޏަކަށް 7.8 މިލިއަން ރުފިޔާ ނުދީ އޮތް މައްސަލާގައި އެ ފައިސާ 15 ދުވަސް ތެރޭ ދައްކަން ކޯޓުން ހުކުމްކޮށްފައިވެ އެވެ.

ފެނަކަ ކުންފުނީގެ އެމްޑީ ސައީދު : ކުންފުނީގެ ކޮރަޕްޝަން މައްސަލަތައް އިންތިހާއަށް ގިނަ

ފެނަކައިން ހަވާލުކުރި މަޝްރޫއުތަކެއްގެ މަސައްކަތް ކުރުވުމަށްފަހު އަމިއްލަ ކުންފުންޏަކަށް ދައްކަންޖެހޭ ފައިސާ ނުދައްކައި އޮތް މައްސަލައެއްގައި ފެނަކަ ކޯޕަރޭޝަނުން އެ ކުންފުންޏަށް 15 ދުވަހުގެ ތެރޭގައި 7.9 މިލިއަން ރުފިޔާ ދައްކަން ސިވިލް ކޯޓުން ހުކުމްކޮށްފި އެވެ. 

މި މައްސަލާގައި ދައުވާކޮށްފައިވަނީ އެލްއެފް ކޮންސްޓްރަކްޝަން ޕްރައިވެޓް ލިމިޓެޑްއިންނެވެ. އެ ކުންފުނިން ދައުވާކުރީ ގިނަ ރަށްތަކެއްގައި ފެނަަކަ އޮފީހާއި އިންޖީނުގެ އަޅަން ކުރީ ސަރުކާރުގައި ހެދި އެއްބަސްވުންތަކުގެ ދަށުން ކުރި މަސައްކަތަށް ދޭންޖެހޭ ފައިސާ ނުދީގެންނެވެ. 

އެ މައްސަލާގައި ކޯޓުގައި އެ ކުންފުނިން އެދިފައިވަނީ އެ މަސައްކަތްތަކަށް ދޭންޖެހޭ ފައިސާ ނަގައިދިނުމާއެކު، މައްސަލަ ކޯޓަށް ހުށަހަޅަން ލިޔެކިޔުން ތައްޔާރުކުރުމަށާއި، މައްސަލައިގެ ގާނޫނީ ވަކީލަށް ދައްކަންޖެހުނު ފީވެސް ނަގައިދިނުމަށެވެ. 

އެ ކުންފުނިން ކުރި މަސައްކަތްތަކުގެ ގޮތުގައި ކޯޓުގައި ފާހަގަކޮށްފައިވަނީ އަންނަނިވި މަސައްކަތްތައް: 

  •  ގއ.ދާންދޫ އައު އޮފީސް އިމާރާތާއި ވަށާފާރު ރޭނުން
  •  ގއ.ކަނޑުހުޅުދޫ އައު އޮފީސް އިމާރާތާއި ވަށާފާރު ރޭނުން
  •  ހދ.ފިނޭގެ އައު އިންޖީނުގެ އިމާރާތްކުރުން
  •  ހދ.ހިރިމަރދޫ ޑޭ ޓޭންކު އޭރިޔާ، މެއިން ޓޭންކް އަދި ޗމްނީ އިމާރާތްކުރުން
  •  ހދ.ވައިކަރަދޫ އައު އިންޖީނުގޭގެ ނުނިމިހުރި މަސައްކަތްތައް ނިންމުން
  •  ލ.ހިތަދޫ އޮފީސް އިމާރާތުގެ ނުނިމިހުރި މަސައްކަތްތައް ނިންމުން
  •  މ.ދިއްގަރު އިންޖީނުގޭގެ ވަށާފާރު އަދި ޗިމްނީ މަސައްކަތް
  •  ނ.ހޮޅުދޫ އައ އޮފީސް އިމާރާތުގެ ނުނިމިހުރި މަސައްކަތްތައް
  •  ގއ.ކޮނޑޭ އައު އިންޖީނުގެ އިމާރާތްކުރުން
  •  ރ.މީދޫ އިންޖީނުގޭގެ ވަށާފާރު ރޭނުން
  •  ށ.މާއުނގޫދޫ އައިޖީނުގެ އަދި އޮފީސް އިމާރާތުގެ ނުނިމިހުރި މަސައްކަތްތައް
  •  ތ.އޮމަދޫ އިންޖީނުގެ އިމާރާތްކުރުމުގެ މަސައްކަތް

މި މަސައްކަތްތަކާ ގުޅިގެން އެ ކުންފުނިން ކުރި މސައްކަތްތަކާއި ވިއްކި މުދަލުގެ ގޮތުގައި އެ ކުންފުނިން ހޯދަން ބޭނުންވާ ފައިސާ ހޯދުމަށް ފެނަކައަށް ފޮނުވި އިންވޮއިސްތައް ޝަރީއަތަށް ހުށަހަޅާފައިވެ އެވެ. އަދި އިންވޮއިސްތައް ފެނަކައަށް ލިބުނުކަމުގެ ލިޔުންތައްވެސް ހުށަހެޅި އެވެ. 

އެ އެއްބަސްވުންތަކުގެ ދަށުން އެ ކުންފުންޏަށް ލިބެންޖެހޭ 7،867،273 (ހަތްމިލިއަން އަށްލައްކަ ފަސްދޮޅަސްހަތްހާސް ދުއިސައްތަ ހަތްދިހަ ތިން ރުފިޔާ)ގެ އިތުރަށް ގާނޫނީ ވަކީލުގެ ހަރަދުގެ ގޮތުގައި 40،000 ރުފިޔާއާއެކު މުޅި ޖުމްލަ 7.9 މިލިއަން ރުފިޔާ ނަގައިދޭން އެ ކުންފުނިން އެދިފައިވެ އެވެ. 

މި މައްސަލާގައި ދައުވާ ލިބުމުން ކޯޓުންވަނީ ދައުވާގެ ލިޔެކިޔުން ފެނަކައަށް ފޮނުވި ނަމަވެސް ދައުވާއަށް ރައްދު ދިނުމަށް މަދަނީ އިޖުރާއާތުގެ ގާނޫނުގައި ލާޒިމުކުރާ ވަގުތުގެ ތެރޭގައި ފެނަކައިން އެ ދައުވާއަށް ރައްދެއް ދީފައިނުވެ އެވެ. 

އެގޮތުން ދައުވާއަށް ރައްދުދީ ދިފާއު ހުށަހެޅުމަށް ފެނަކައަށް މަދަނީ އިޖުރާއާތުގެ ގާނޫނުގެ ދަށުން ލިބޭ 28 ދުވަސް ފާއިތުވިއިރު އެ ދައުވާއަށް ރައްދު ދީފައިނުވާތީ އެ މައްސަލާގައި ކޯޓުން ގޮތެއް ނިންމާފައިވަނީ ފެނަކަގެ ޣައިރު ހާޒިރުގަ އެވެ. 

އެ މައްސަލަ ބެއްލެވި ސިވިލް ކޯޓުގެ ގާޒީ އަޒްފާ އަބްދުލްޣަފޫރު ނިންމަވާފައިވަނީ އެ މައްސަލައަކީ ޣައިރު ހާޒިރުގައި ހުކުމްކުރުމަށް ޝަރުތު ހަމަވާ މައްސަލައެއްކަމަށްވާތީ، ދައުވާކުރި ފަރާތުން ހޯދަން އެދުނު 7.9 މިލިއަން ރުފިޔާ 25 ޑިސެންބަރު 2024 އިން ފެށިގެން 15 ދުވަހުގެ ތެރޭގައި އެލްއެފް ކޮންސްޓަރަކްޝަނށް ދެއްކުމަށް ފެނަކއިގެ މައްޗަށް ހުކުމް ކުރެއްވުމަށެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.