ހިޔާނާތުގެ ތުހުމަތުވެ އައިބީއެމްގެ އެއްބަސްވުމެއް ބާތިލުކޮށްފި

ފެން ކުންފުނި އެމްޑަބްލިއުއެސްސީގެ ސަބްސިޑަރީ ކުންފުންޏެއްކަމަށްވާ އައިލެންޑް ބެވަރޭޖްސް މޯލްޑިވްސް (އައިބީއެމް)ގައި މަސައްކަތްކުރާ ބިދޭސީ މުވައްޒަފުން ބައިތިއްބާނެ ތަނެއް ކުއްޔަށް ނެގުމަށް ހެދި އެއްބަސްވުމުގައި ކޮރަޕްޝަނަށް މަގުފަހިވާ ކަންތައްތަކެއް އެކުލެވޭ ކަމަށް ބެލިވެގެން އެ އެއްބަސްވުން ބާތިލުކޮށްފި އެވެ. 

ސޯޝަލް މީޑިޔާއަށް ރޭ ތިލަވި މި މައްސަލާގައި ތުހުމަތުކުރެވެނީ ބިދޭސީ މުވައްޒަފުން ބޭތިއްބުމަށް ކުއްޔަށް ނެގި ތަން ފުރަތަމަ ނެގި އަގަށްވުރެ އެތައް ގުނައެއް ބޮޑުކޮށް، ފުރަތަމަ އެއްބަސްވުން ހެދިތާ ކުޑަ ދުވަސްކޮޅެއްފަހުން އިތުރު އެއްބަސްވުމެއް ހަދާފައިވާ ކަމަށެވެ. 

އެގޮތުން މިދިޔަަ އޯގަަސްޓު 27 ގައި މަހު ކުއްޔެއްގެ ގޮތުގައި 60،000 ރުފިޔާއަށް ޓެލެ މޯލްޑިވްސް ކިޔާ ކުންފުންޏެއް އަތުން ތަނެއް ކުއްޔަށް ނެގުމަށް އެއްބަސްވުމަށްފަހު، އޭގެ ދެ މަހެއްހައި ދުވަސް ފަހުން އޮކްޓޯބަރު 22 ވަނަ ދުވަހު 200،000 ރުފިޔާއަށް އެތަން ކުއްޔަށް ނެގުމަށް ދެވަނަ އެއްބަސްވުމެއް އެ ކުންފުންޏާއެކު ހަދާފައިވާކަން މީސްމީޑިޔާގަައި އާންމުވެފައިވާ ލިޔުންތަކުން އެނގެ އެވެ. 

އެ މައްސަލައާ ގުޅިގެން އެމްޑަބްލިއުއެސްސީގެ މެނޭޖިން ޑިރެކްޓާ އަބްދުލްމަތީން ރޭ އެކްސްގައި ކުރެއްވި ޕޯސްޓެއްގަައި ވިދާޅުވީ އެ މައްސަލަ މީގެ ދުވަސްކޮޅެއް ކުރިން އެމްޑަބްލިއުއެސްސީގެ ސަމާލުކަމަށް އައިސްފައިވާ ކަމަށެވެ. އަދި އެކަމުގައި އެމްޑަބްލިއުއެސްސީން ފިޔަވަޅުތަކެއް އަޅައި އެއްބަސްވުން މިހާރު ބާތިލުކޮށްފަައިވާކަމަށް އެމްޑީ ވިދާޅުވި އެވެ. 

"އައިބީއެމްއަށް ލޭބާ އެކޮމޮޑޭޝަން ހޯދުމުގެ ޕްރޮސެސް އާއި އަގުތަކާ ގުޅޭ ޝަކުވާއެއް އަޅުގަނޑުމެންނަށް މީގެ ދުވަސްކޮޅެއް ކުރިން ލިބުމާ އެކު އެކަން ކުރިއަށް ގޮސްފައިވާ ގޮތާއި އަގުތައް އިންޓާނަލް އޮޑިޓް ޓީމުން ބެލުމަށް އެމްޑަބްލިއުއެސްސީގެ ބޯޑުގައި މަޝްވަރާކުރެވި، އެކަމާ ގުޅިގެން އަޅަން ޖެހޭ ފިޔަވަޅުތައް އެޅުމަށް މިހާރު ވާނީ އައބީއެމްއަށް އަންގާފައި،" މަތީނު ވިދާޅުވި އެވެ.

މަތީނު ވިދާޅުވީ އެއްބަސްވުން ބާތިލުކުރުމާއެކު ބިދޭސީ މަސައްކަތްތެރިން ބައިތިއްބާނެ ތަނެއް އަލުން ހޯދުމަށް މިހާރު އައިބީއެމްއަށް އެމްޑަބްލިއުއެސްސީން އަންގާފައިވާ ކަމަށެވެ. 

ރައީސުލްޖުމްހޫރިއްޔާ ޑރ.މުހައްމަދު މުއިއްޒުވަނީ ކުންފުނިތަކުގެ ވެރިންނަށް އެއްވެސް ތަނެއްގައި ކޮރަޕްޝަނުގެ އަމަލެއް ހިންގުމަށް ޖާގަނުދެއްވާނެކަން އަންގަވާފަ އެވެ. އަދި ކޮރަޕްޝަނުގެ މައްސަލައެއްގަައި ތުހުމަތުވެއްޖެނަމަ އެކަމެއް އިދާރާތަކުން ތަހުގީގުކޮށް ބަލައި، އަޅަންޖެހޭ ހުރިހާ ފިޔަވަޅެއް އަޅުއްވާނެ ކަމުގައި އެމަނިކުފާނު ވިދާޅުވެފައިވެ އެވެ. 

ދާދިފަހުން ބިން ވިއްކުމުގައި ހައުސިން ޑިވެލޮޕްމެންޓު ކޯޕަރޭޝަނުގެ ތެރެއިން ބޮޑެތި ކޮރަޕްޝަނުގެ އަމަލުތަކެއް ހިންގާފައިވާކަމުގެ ތުހުމަތުކުރެވި އެ ކުންފުނީގެ ކުރީގެ މެނޭޖިން ޑިރެކްޓާ އިބްރާހީމް ފަޒުލް ރަޝީދު ސަސްޕެންޑުކޮށްފައި ހުންނަވަނިކޮށް އަމިއްލަފުޅަށް އިސްތިއުފާދެއްވާފައިވެ އެވެ.