އެމްޑީޕީގެ ތުހުމަތު: ވަކި ފުލުހުންތަކަކަށް އެފްޑީސީ ފުލެޓުތައް ދޭން އެބައުޅޭ

މައުރޫފު އިތުރަށް ވިދާޅުވީ އެ ހައުސިން ޔުނިޓުތަކުގެ ތެރެއިން 300 ފުލެޓު ފުލުހުންގެ ތެރެއިން ވަކި ބަޔަކަށް ދޫކުރަން ސަރުކާރުން މަސައްކަތްކުރަމުންދާ ކަމުގެ މައުލޫމާތު ލިބިވަޑައިގަންނަވާ ކަމަށެވެ.

ފަހި ދިރިއުޅުން ކޯޕަރޭޝަނުން ހުޅުމާލޭގައި ހަދަމުން ގެންދާ ފްލެޓުތައް - ވަން އޮންލައިންގެ ފޮޓޯއެއް

ވަކި ފުލުހުންތަކަކަށް ފަހި ދިރިއުޅުން ކޯޕަރޭޝަންގެ 4،000 ހައުސިން ޔުނިޓުތަކުގެ ތެރެއިން ފުލެޓުތަކެއް ދޭން އުޅޭކަމަށް އިދިކޮޅު އެމްޑީޕީން ތުހުމަތުކޮށްފި އެވެ. 

އެޗްޑީސީއަށް އަމާޒުވެފައިވާ ކޮރަޕްޝަނުގެ ބޮޑެތި ތުހުމަތުތަކާ ގުޅިގެން ފުލުހުން މިހާތަނަށް ހާމަކުރި ކަންކަމާ ގުޅޭ ގޮތުން އެ ޕާޓީގެ ކަންބޮޑުވުންތައް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ލީގަލް ޑިޕާޓުމެންޓުގެ ކުރީގެ ވެރިޔާ އަހްމަދު މައުރޫފު ވިދާޅުވީ، 4،000 ފުލެޓުވެސް ވަގަށް ވިއްކަަމުންދާ ކަމަށް މިހާރު ތުހުމަތުކުރެވިފައިވާ ކަމަށެވެ. 

އޭނާ ވިދާޅުވީ ފަހި ދިރިއުޅުން ކޯޕަރޭޝަނުން އަޅަމުންދާ ފުލެޓުތައް ރިޝްވަތު ނަގައިގެން ވިއްކަމުންދާކަމަށް ކުރެވޭ ތުހުމަތުތަކަކީ، މި ސަރުކާރުގައި މިހާތަނަށް ކަންކަން ހިނގާފައިވާ ގޮތަށް ބައްލަވާއިރު ހަގީގަތެއްކަމަށް ބުރަވެވަޑައިގެންނެވޭ ކަމަށެވެ. 

އޮންލައިން ނޫހަކުން ރިޕޯޓުކުރި ގޮތުގައި ފުލެޓަކަށް 50،000 ރުފިޔާގެ މަގުން ފައިސާ ނަގައިގެން ފުލެޓު ލިސްޓުން ޖާގައެއް ކަށަވަރުކުރެވޭ ގޮތަށް އެކި މީހުންނަށް ހައުސިން މިނިސްޓްރީގައި ފުލެޓު ލިސްޓު މަސައްކަތްކުރާ ބައެއް ފަރާތްތަކުން ހުށަހެޅުންތައް ހުށަހަޅަމުންދެ އެވެ. 

މައުރޫފު ވިދާޅުވީ އެ 4،000 ފުލެޓަކީ އެ ފުލެޓުތައް ލިބޭނެ މީހުން ކުރީ ސަރުކާރުގައި ކަނޑައަޅައި ފުލެޓުތަކުގެ ހައްގުވެރިންނަށް ފުލެޓު ލިބޭނެކަމުގެ ޔަގީންކަން ސަރުކާރުން ދީފައިވާ ފުލެޓުތަކެއް ކަމަށެވެ. އެހެންކަމުން ރިޝްވަތުގެ ގޮތުގައި ފައިސާ ނަގައިގެން ފުލެޓުތައް ލިބޭނެކަމުގެ ޔަގީންކަން ބަޔަކު ދެމުންދާނަމަ އެއީ ނުރައްކާތެރި ކަމެއް ކަމުގައި މައުރޫފު ވިދާޅުވި އެވެ. 

"މި ސަރުކާރުން މިހާތަނަށް ގެދޮރުވެރިކަމާ ގުޅޭ ކަންކަމުގައި މިހާތަނަށް ހިންގާފައި މިހިރަ ބޮޑެތި ވައްކަމާއި ކޮރަޕްޝަނަށް ބަލާއިރުގައި، މިކަންވެސް ދޮގަކަށްނުވާނެ. މިކަންވެސް އަޅުގަނޑުމެންނަށް ބެލެވެނީ އެ ނޫހުގައި ރިޕޯޓުކޮށްފައި އޮތް ގޮތަށް، އެ ތުހުމަތާ އެއްގޮތަށް އެކަން އޮންނާނީ ކޮށްފަ،" މައުރޫފު ވިދާޅުވި އެވެ. 

މައުރޫފު އިތުރަށް ވިދާޅުވީ އެ ހައުސިން ޔުނިޓުތަކުގެ ތެރެއިން 300 ފުލެޓު ފުލުހުންގެ ތެރެއިން ވަކި ބަޔަކަށް ދޫކުރަން ސަރުކާރުން މަސައްކަތްކުރަމުންދާ ކަމުގެ މައުލޫމާތު ލިބިވަޑައިގަންނަވާ ކަމަށެވެ. މިހާރުވެސް ސިޔާސީ ގޮތުން ފުލުހުން ބޭނުންކުރަމުންދާކަމަށް ތުހުމަތުކުރައްވަައި މައުރޫފު ވިދާޅުވީ މިގޮތަށް ވަކި ފުލުހުންތަކަކަށް ފުލެޓު ދިނުމަކީ ނުރައްކާތެރި ކަމެއް ކަމަށެވެ. 

"މި ސަރުކާރުގެ ކަންކަން ހުރި ގޮތުން ފުލުހުންގެ ތެރެއިން ސެލެކްޓްކުރެވިގެން އިންސާފުވެރިކޮށް ހިނގައިދާނެކަމަށް އަޅުގަނޑުމެން ނުބަލަން. ކޮންމެހެން ހިދުމަތުގައި ގިނަ ދުވަސްވީ ފުލުހުންނަށް ނޫނީ މަސައްކަތުގެ އަހުލާގު ރަނގަޅު ފުލުހުންނަށް ބަލައިގެންނެއް ނޫން މި ސަރުކާރުން ދޭ ކަމަށްވަންޏާ ދޭނީކީ. ހަމަ ސިޔާސީ ގޮތުން އެ ދޭނީ،" މައުރޫފު ވިދާޅުވި އެވެ. 

ފާއިތުވި އެމްޑީޕީ ސަރުކާރުގައި ހިންގި ގެދޮރުވެރިޔާ ސްކީމުގެ ދަށުން ހައްގުވެރިން ކަަނޑައަޅާފައިވާ 4،000 ހައުސިން ޔުނިޓު ލިބުނު މީހުންގެ ލިސްޓުގައި ބޮޑެތި މައްސަލަތަކެއް ހުރިކަން ފާހަގަކޮށް އެ ފުލެޓުތައް ހަވާލުކުރުމުގެ ކުރިން އެ މައްސަލަތައް ހައްލުކުރަން އޭސީސީންވަނީ އަންގާފަ އެވެ. 

އޭސީސީން އެންގި އެންގުމާ ގުޅިގެން ދެ ކޮމިޓީއެއް އެކުލަވާލައިގެން އެ ލިސްޓު އެކުލަވައިލުމުގެ މަސައްކަތް ސަރުކާރުން ފެށި ނަމަވެސް، އެ ލިސްޓު އާންމުކުރާނެ އެކި ތާރީހުތައް ސަރުކާރުން އިއުލާނުކުރި ނަމަވެސް މިހާތަނަށް އެ ލިސްޓު ހާމަަކުރެވިފައިނުވެ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.