މާލީ ސިޔާސަތުގެ މިސްރާބު | ހަރަދު ބޮޑުވާ މިންވަރު ކޮންޓުރޯލުވެއްޖެ

ސަރުކާރުގެ މާލީ ސިޔާސަތަށް ގެނެސްފައިވާ ބޮޑެތި ބަދަލުތަކާއެކު އަހަރުން އަހަރަށް ސަރުކާރުގެ ހަރަދުތައް ބޮޑުވަމުން އަންނަ މިންވަރު ފާއިތުވި އަހަރުތަކާ އަޅާބަލާއިރު މި އަހަރު ކޮންޓުރޯލުކުރެވިފައިވާކަން ފިނޭންސް މިނިސްޓްރީގެ މާލީ ހިސާބުތަކުން ދައްކައިފި އެވެ. 

ދައުލަތުގެ މާލީ ހިސާބުތަކަށް ބަލާއިރު ކޮވިޑް-19 އަށްފަހު ކޮންމެ އަހަރަކުވެސް އޭގެ ކުރީ އަހަރަށްވުރެ ދައުލަތުގެ ހަރަދުތައް އައީ އިތުރުވަމުންނެވެ. ހަފުތާއަކު އެއް ފަހަރު ފިނޭންސް މިނިސްޓްރީން އާންމުކުރާ މާލީ ހިސާބުތަކުން މި ހަގީގަތް ފެނެ އެވެ. 

އެގޮތުން 2020 ވަނަ އަހަރުގެ ޑިސެންބަރު މަހުގެ ނުވަވަނަ ދައުވަހުގެ ނިޔަލަށް 26.482 ބިލއިަން ރުފިޔާ ހަރަދުވިއިރު ޖެހިގެން އައި 2021 ވަނަ އަހަރު އެ އަދަދު 30.5 ބިލިއަން ރުފިޔާއަށް އެރި އެވެ. އެއީ 15.2 އިންސައްތައިގެ އިތުރުވުމެކެވެ. 

އަދި 2022 ވަނަ އަހަރުގެ ޑިސެންބަރު މަހުގެ ފުރަތަމަ ހަފުތާ ނިމުނުއިރު 35.3 ބިލިއަނަށްވުރެ ގިނަ ރުފިޔާ ދައުލަތުގެ ބަޖެޓުން އޮތީ ހަރަދުވެފަ އެވެ. އެއީ 2021 ވަނަ އަހަރުގެ އެ މުއްދަތާ އަޅާބަލާއިރު %15.5 ގެ އިތުރުވުމެކެވެ. 

އަަދި 2023 ވަނަ އަހަރުގެ އެ މުއްދަތުގައި ދައުލަތުގެ ހަރަދުތަކަށް އެ މުއްދަތުގައި 42.4 ބިލިއަން ރުފިޔާ ހަރަދުވިކަން މާލީ ވުޒާރާގެ ހިސާބުތަކުން ދައްކަ އެވެ. އެހެންކަމުން އެ އަހަރު 2022 ވަނަ އަހަރުގެ އެ މުއްދަތުގައި ހަރަދުވި މިންވަރަށްވުރެ ގާތްގަނޑަކަށް %16 އިންސައްތަ އިތުރަށް ހަރަދުވި އެވެ. 

މި ހިސާބުތަކަށް ބަލާއިރު 2020 ވަނަ އަހަރުން ފެށިގެން 2023 ވަނަ އަހަރާ ހަމައަށް ދައުލަތުގެ ހަރަދުތައް އައީ އަހަރުން އަހަރަށް އެވެރެޖުކޮށް 15 އިންސައްތައިގަ އިތުރުވަމުންނެވެ. 

ނަމަވެސް މިހާތަނަށް ފިނޭންސް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު ދައުލަތުގެ ހަރަދުތައް މި އަހަރު އިތުރުވީ ފާއިތުވި އަހަރުތަކާ އަޅާބަލާއިރު ކުޑަކޮށެވެ. އަދި ހަރަދު ބޮޑުވުމުން ކޮންޓުރޯލުކުރެވިފައިވާކަމަށް ހިސާބުތަކުން ދައްކަ އެވެ. 

އެގޮތުން މި އަހަރު ޑެސެންބަރު މަހުގެ ފަސްވަނަ ދުވަހާ ހަމައަށް ދައުލަތުގެ ބަޖެޓުން ހަރަދުވެފައިވަނީ 43.5 ބިލިއަން ރުފިޔާ އެވެ. ނިމުނު އަހަރުގެ އެ މުއްދަތުގައި ހަރަދުވީ 42.8 ބިލިއަން ރުފިޔާ އެވެ. މި ހިސާބުތަކަށް ބަލާއިރު މި އަހަރު ފާއިތުވި އަހަރަށްވުރެ ދައުލަތުގެ ހަރަދުތައް އިތުރުވީ އެންމެ %1.5 އިންނެވެ. 

މި އަހަރު ދައުލަތުގެ ހަރަދުތައް ކުޑަކުރުމަށް އެޅި ފިޔަވަޅުތަކުގެ ސަބަބުން ރިކަރަންޓު ހަރަދުތަކުގެ ތެރެއިން އާސަންދައާއި ސަބްސިޑީއަށް ކުރި ހަރަދުތައް ފާއިތުވި އަހަރަށްވުރެ ދަށްކުރެވިފައިވެ އެވެ.