އިމްޕޯޓު ހިސާބު | ކާބޯތަކެއްޗަށް ހަ ބިލިއަން، ތެލަށް ނުވަ ބިލިއަން

މި އަހަރުގެ ސެޕްޓެންބަރު މަހުގެ ނިޔަލަށް ކާބޯތަކެތީގެ އިމްޕޯޓަށް 6.1 ބިލިއަން ރުފިޔާ އަދި ތެލުގެ އިމްޕޯޓަށް ނުވަ ބިލިއަަނަށްވުރެ ގިނަ ރުފިޔާ ހަރަދުވެފައިވާކަން ތަފާސްހިސާބުތަކުން ދައްކައިފި އެވެ. 

ތަފާސްހިސާބާ ބެހޭ ގައުމީ އިދާރާއިން އާންމުކޮށްފައިވާ ހިސާބުތަކަށް ބަލާއިރު މި އަހަރުގެ ޖަނަވަރީން ފެށިގެން ސެޕްޓެންބަރުގެ ނިޔަލަށް ކާބޯތަކެތީގެ އެކްސްޕޯޓަށް ޖުމްލަ 6،195.8 މިލިއަން (6.1 ބިލިއަން) ރުފިޔާ ހަރަދުވި އެވެ. އެއީ ރަސްމީ ޑޮލަރު ރޭޓުން ބަލާނަމަ 401 މިލިއަނެއްހައި ޑޮލަރެވެ. 

އެ މުއްދަތުގައި ކާބޯތަކެތީގެ އިމްޕޯޓަށް އެންމެ ބޮޑު ހަރަދެއް ހިނގީ އޯގަސްޓުގަ އެވެ. އެ މަހު ކާބޯތަކެތީގެ އިމްޕޯޓަށް އެއް ބިލިއަނަށްވުރެ ގިނަ ރުފިޔާ ހަރަދުވި އެވެ. ދެން ކާބޯތަކެތީގެ އިމްޕޯޓަށް އެންމެ ގިނަ ފައިސާ ހަރަދުވި ސެޕްޓެންބަރުގައި 918 މިލިއަން ރުފިޔާގެ ކާބޯތަކެތި އިމްޕޯޓުކޮށްފައިވެ އެވެ. 

މި އަހަރު ކާބޯތަކެތީގެ އިމްޕޯޓަށް އެންމެ ކުޑަ އަދަދެއް ހަރަދުވީ ޖޫންގަ އެވެ. އެ މަހު އިމްޕޯޓުކޮށްފައިވަނީ 799.9 މިލިއަން ރުފިޔާގެ ކާބޯތަކެެއްޗެވެ. 

މި މުއްދަތުގައި އެންމެ ގިނަ ފައިސާ ހަރަދުވެފައިވަނީ ތެލުގެ އިމްޕޯޓަށެވެ. އެގޮތުން ޖަނަވަރީން ސެޕްޓެންބަރުގެ ނިޔަލަށް ތެލުގެ އިމްޕޯޓަށް ޖުމްލަ 9.1 ބިލިއަން ރުފިޔާ ހަރަދުވި އެވެ. އަދި ރަސްމީ ޑޮލަރު ރޭޓުން ބަލާނަމަ އެ މުއްދަތުގައި ތެލުގެ އިމްޕޯޓަށް އެކަނި 590.3 މިލިއަން ޑޮލަރު ހަރަދުވި އެވެ.

ތެލުގެ އިމްޕޯޓަށް އެންމެ ބޮޑު ހަރަދެއް ހިނގީ އޭޕްރީލާއި، ޖޫން އަދި މޭ މަހު އެވެ. އެއިން ކޮންމެ މަހަކުވެސް ބިލިއަނަކަށްވުރެ ގިނަ ރުފިޔާ ތެލުގެ އިމްޕޯޓަށް ހަރަދުވި އެވެ. ތެލުގެ އެންމެ ބޮޑަށް ހަރަދުވި މަސްތަކުގެ ހިސާބުތައް: 

މި މުއްދަތުގައި ތެލުގެ އިމްޕޯޓަށް އެންމެ މަދު އަދަދެއްގެ ފައިސާ ހަރަދުވީ ޖަނަވަރީގަ އެވެ. އެ މަހު 733.7 މިލިއަން ރުފިޔާ ހަރަދުވިއިރު ދެން އެންމެ މަދުން ތެލުގެ އިމްޕޯޓަށް ހަރަދުވި އޯގަސްޓު މަހު ތެލުގެ އިމްޕޯޓަށް ހަރަދުވެފައިވަނީ 741 މިލިއަން ރުފިޔާ އެވެ. 

އެމްއެމްއޭއިން ބުނާ ގޮތުގައި ރާއްޖޭގެ ބޭރު ފައިސާގެ ރިޒާވްއަށް އެންމެ ބޮޑު ޕްރެޝަރެއް ކުރިމަތިވަނީ ތެލުގެ އިމްޕޯޓަށް ކޮންމެ އަހަރަކުވެސް ކުރަންޖެހޭ ހަރަދުގެ ސަބަބުންނެވެ. ބައެއް މަސްމަހުގައި މުޅި ރިޒާވް ތެލުގެ އިމްޕޯޓަށް ހަރަދުވެ އެވެ.