ހައުސިން މިނިސްޓްރީގައި ރޯވި އަލިފާން އެ އިމާރާތް ޖެހިގެން ހުރި ގްރީން ބިލްޑިންއަށް ފެތުރުނު ގޮތާއި އަލިފާން ނިއްވުމަށް ގިނަ ވަގުތު ނެގި ސަބަބާމެދު ސުވާލު އުފެއްދުމާއެކު އެމްޑީޕީންވަނީ ސަރުކާރަށް އިހުމާލުގެ ތުހުމަތު އަމާޒުކޮށްފަ އެވެ.
ހައުސިން މިނިސްޓްރީ ހިންގަމުން އައި އިމާރާތުގައި ފާއިތުވި ބުރާސްފަތި ދުވަހު ހިނގި އަލިފާނުގެ ހާދިސާއާ ގުޅިގެން އިދިކޮޅު އެމްޑީޕީން ސަރުކާރަށް އިހުމާލުގެ ތުހުމަތުކޮށްފި އެވެ.
މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ހޯރަފުށީ ދާއިރާގެ ކުރީގެ މެންބަރު އަހްމަދު ސަލީމު ފުރަތަމަ އަދި މުހިއްމު ސުވާލަކީ އަލިފާނުގެ ހާދިސާ ކޮންޓުރޯލުކުރަން މިހާ ވަގުތު ނެގި ސަބަބަކީ ކޮބައިތޯ އެވެ. އަލިފާނުގެ ހާދިސާ ހިނގި އިމާރާތާއި ސިފައިންގެ ފަޔާ އެންޑް ރެސްކިއުގެ މައި މަރުކަޒުގެ މެދުގައި ސަތޭކަ މީޓަރުގެ ދުރުމިންވެސް ނުހުންނާނެކަމާއި ތިރީހަކަށް މީޓަރު ކައިރީގައި ޓީ-ޖެޓީ އޮތްކަން ފާހަގަކުރައްވައި އަލިފާން ނިއްވައިލުމަށް ހައެއްކަ ގަޑިއިރު ހޭދަވި ސަބަބާމެދު ސަލީމު ސުވާލު އުފެއްދެވި އެވެ.
ދެވަނަކަމަކަށް ސަލީމު ފާހަގަކުރެއްވީ އެންވަޔަރަމެންޓު މިނިސްޓްރީ ހިންގަމުން އައި ގްރީން ބިލްޑިންގް އަލިފާނުގެ ހާދިސާގައި އަދައިގެން ދިއުމެވެ. އޭނާ ވިދާޅުވީ އެތަނުގައި މަސައްކަތްކުރާ މުވައްޒަފުން އޮފީހަށް ގޮސް އެތަނުގައި ހުރި ސާވާތައް ފަދަ ތަކެތި ނެރެން އުޅުމުން އެ އިމާރާތަށް ގެއްލުން ނުލިބޭނެ ކަމުގެ ޔަގީންކަން އެ މުވައްޒަފުން އެތަނުގައި ތިބި އަލިފާން ނިއްވާ ފަރާތްތަކުން ދިން ކަމަށެވެ.
އެ އިމާރާތަކީ މުޅިން ވަކިން ހުރި އިމާރާތަކެއްކަމަށާއި، ހައުސިން އަދި ކޮންސްޓްރަކްޝަން މިނިސްޓްރީ ހިންގި އިމާރާތާ ހިލާފަށް އެ އިމާރާތަކީ ރަނގަޅު ފެންވަރަށް ހެދިފައި ހުރި ޒަމާނީ ފަހުގެ އިމާރާތެއް ކަމަށްވެސް ސަލީމު ވިދާޅުވި އެވެ.
"އެކަށީގެންވާ ވަގުތު ލިބި އެ އިމާރާތް ސަލާމަތް ނުކުރެވުނީ ކީއްވެތޯ، އަދި އެ އިމާރާތް ސަލާމަތްނުކުރެވުމުގެ އިތުރުން އެ އިމާރާތުގައި ހުރި ކްރިޓިކަލް އިންފްރަސްޓްރަކްޗާ ރައްކާތެރި ނުކުރެވުނީ ކީއްވެތޯ؟،" ސަލީމު ސުވާލުކުރެއްވި އެވެ.
"ބައެއް މުވައްޒަފުން އެދެމުންދިޔަކަަމަށްވޭ ސާވާ ކަހަލަ މުހިއްމު ބައެއް އެއްޗެހި ނެރެން ތިމަންްމެން އުޅެންތޯ މައުލޫމާތު އެބަދޭކަމަށްވަނީ ތި އިމާރާތަށް ގެއްލުމެއް ނުވާނޭ. އެހެންކަމަށްވާނަމަ ކަލްކިއުލޭޝަންސް ގޯސްތޯ، ތުރެޓް އެސެސްމެންޓު ގޯސްތޯ މިއީ އަޅުގަނޑުމެންގެ ހިތުގައި އުފެދޭ ސުވާލު،"
ސަލީމު ވިދާޅުވީ ގްރީން އިމާރާތު އަދައިގެން ގޮސް އެ އިމާރާތުގައި ހުރި މުހިއްމު އެތައް ވަސީލަތެއް ގެއްލިގެން ދިއުމާމެދު ބޮޑެތި ސުވާލުތަކެއް އުފެދޭއިރު އެ އިމާރާތް ހަލާކުވެގެން ދިއުމަށް މެދުވެރިވީ ކޮންމެވެސް މިންވަރެއްގެ އިހުމާލުތަކެއް ވެގެން ކަމަށް އެމްޑީޕީއަށް ބުރަވެވޭ ކަމަށެވެ.
އެމްޑީޕީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ނާޒިލު ވިދާޅުވީ އަލިފާން ނިއްވުމުގައި ބޮޑެތި އިހުމާލުތަކެއްވެފައިވާ ކަމަށެވެ. އަލިފާނުގެ ހާދިސާ ފެށިގެންދިޔައިރު އެކަމުގެ މައުލޫމާތު ލިބިފައި އޮތް ގޮތަށް ބަލާއިރު ހަ ގަޑިއިރު ކޮންޓުރޯލުކުރަން އުޅެގެން ހަންމަތަނުވާ ގޮތަށް ހިނގަމުންދިޔަ ކަމެއް ނޫންކަމަށް މައުލޫމާތު ލިބިފައިވާކަމަށް ނާޒިލު ވިދާޅުވި އެވެ.
ނާޒިލު އިހުމާލުގެ ބޮޑު ތުހުމަތު އަމާޒުކުރެއްވީ ގައުމީ ދިފާއީ ބާރަށެވެ. އޭނާ ވިދާޅުވީ އެކަމުގައި އެންމެ ބޮޑަށް އިހުމާލުވީ އެމްއެންޑީއެފްކަމަށާއި، އެމްއެންޑީއެފުން އިހުމާލުވެފައ އޮތްކަން ޔަގީންވާ ކަމަށެވެ. އަލިފާނުގެ ހާދިސާ ހިނގަމުންދާކަން ފަތިހު 6:00 އާއި 6:30 އާ ދެމެދުގައި އެމްއެންޑީއެފަށް މައުލޫމާތު ލިބުނުކަމަށާއި، އެ އަލިފާނުގެ އަސަރު އިމާރާތުން ބޭރަށް ފެންނަން ފެށީވެސް އޭގެ ދޮޅުގަޑިއިރެއްހަައިއިރު ފަހުންކަމަށް ވިދާޅުވެ، އަލިފާން ހަންމަތަކުރުމަށް އެކަށީގެންވާ ގޮތަށް އެމްއެންޑީއެފްއަށް މަސައްކަތްކުރެވުނުތޯ އޭނާ ސުވާލު އުފެއްދެވި އެވެ.
"އެ ބޭފުޅުންނަށް އަލިފާނުގެ ހާދިސާ ހިނގާކަން ގާތްގަނޑަކަަށް 6:30 ގެ ކުރިން، ހައަކާއި ހަގަޑި ބައާއި ދޭތެރޭގައި އެބޭފުޅުންނަށް އެނގިއްޖެ. އަލިފާން ބޭރަށް ފެނިފައި މިއިންނަނީ އޭގެ ގާތްގަނޑަކަށް ދޮޅުގަޑިއިރެއްހައި އިރު ފަހުން. އެހެންވީމާ އެބޭފުޅުންނަށް އެކަމުގައި މަސައްކަތްކުރެވުނީ އެންމެ އެކަށީގެންވާ ގޮތަށްތޯ މިއީ އަޅުގަނޑުމެން އުފައްދާ އެންމެ ބޮޑު ސުވާލު،" ނާޒިލު ވިދާޅުވި އެވެ.
އިތުރަށް ނާޒިލު ވިދާޅުވީ އަލިފާނުގެ ހާދިސާ ހިނގަން ފެށުމުން ދިފާއީ ވުޒާރާއިން ފިޔަވަޅުތައް އެޅީ ކިހިނެއްތޯ ސުވާލު އުފެދޭ ކަމަށެވެ. އަދި އެއާޕޯޓުގެ އަލިފާން ނިއްވައިލުމުގައި ހަރަކާތްތެރިވާ އުޅަނދުތައް އެތަނަށް އައުން ލަސްވި ސަބަބާމެދުވެސް ނާޒިލު ސުވާލު އުފެއްދެވި އެވެ.
މި އަލިފާނުގެ ހާދިސާގައި ލިބުނު ގެއްލުމުގެ ބޮޑުކަން އަދި ރަނގަޅަށް އަންދާޒާވެސް ނުކުރެވޭކަން ފާހަގަކުރައްވައި ނާޒިލު ވިދާޅުވީ މިފަދަ މުހިއްމު ދަނޑިވަޅެއްގައި ސަރުކާރުގެ ވެރިން ދަތުރުފުޅުތަކުގައި ފުރާވަޑައިގަތުމަކީވެސް ބޮޑު ކަންބޮޑުވުމެއް ކަމަށެވެ.