"ގާނޫނުއަސާސީގެ އުސޫލުތަކާ ހިލާފަށް އެމްޑީޕިން ގާނޫނުއަސާސީ ބަދަލުކުރި"
އޭނާ ވިދާޅުވީ މަޖިލީސް މެންބަރުންގެ ގޮޑި ގެއްލޭ ގޮތަށް ކުރީގެ ރައީސް އަބްދުﷲ ޔާމީންގެ ވެރިކަމުގައި އަދި އެމްޑީޕީގެ ދައުރުގައި ވެސް ގާނޫނުތައް ފާސްކޮށްފައިވާ ކަމަށެވެ.
"ގާނޫނުއަސާސީގެ ދިފާއުގައި" އެމްޑީޕީން މިއަދު ނުކުމެ އަޑުއުފުލަމުންދާއިރު، އެ ޕާޓީގެ މެޖޯރިޓީއޮތް ރައްޔިތުންގެ މަޖިލީހުގެ ދައުރުގައި ގާނޫނުއަސާސީގެ އުސޫލުތަކާ ހިލާފަށް އިސްލާހުތައް ގެނެސްފައިވާ ކަމަށް މަހިބަދޫ ދާއިރާގެ މެންބަރު އަހުމަދު ތޯރިގު ވިދާޅުވެއްޖެ އެވެ.
ސަރުކާރުން އެއް ދުވަހުން ގާނޫނުއަސާސީއަށް އިސްލާހުތަކެއް ގެނައުމުން އެކަމާމެދު އިދިކޮޅު ފަރާތްތަކުން ދަނީ ވަރަށް ބޮޑަށް ފާޑުކިޔަމުންނެވެ. އެންމެ ބޮޑަށް އެކަމާ ދެކޮޅަށް ނުކުމެ އޮތީ އެމްޑީޕީންނެވެ.
މިއަދު މަހިބަދޫގައި ކުރިއަށްދާ ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާ ޖަލްސާގައި ވާހަކަ ދައްކަވަމުން ތޯރިގު ވިދާޅުވީ އޭނާ މަޖިލީހުގައި ހޭދަކުރެއްވި 11 ވަރަކަށް އަހަރު އެކިފަހަރު މަތިން ގާނޫނުއަސާސީއަށް އިސްލާހުތައް ގެނެސްފައިވާ ކަމަށެވެ. އެމްޑީޕީން ގާނޫނުއަސާސީގެ އުސޫލުތަކާ ހިލާފަށް އޭނާ މަޖިލީހުގައި ހުންނަަވަނިކޮށް ގާނޫނުއަސާސީ ބަދަލުކޮށްފައިވާ ކަމަށެވެ.
"ގާނޫނުއަސާސީގަ ސާފުކޮށް ބަޔާންކޮށްފަ އޮވޭ ކުއްލި ނުރައްކަލުގެ ހާލަތުގައި ގާނޫނުއަސާސީ ބަދަލުނުކުރެވޭނެ ކަމަށް. ތިބޭފުޅުން ހަނދުމަފުޅު ހުންނާނެ ލޯކަލް ކައުންސިލްތަކުގެ ދައުރު ތިން އަހަރު ދުވަހަށް އޮއްވާ އެ ދައުރު ހަމަވެގެން އައީ ކުއްލި ނުރައްކަލުގެ ހާލަތު އޮއްވާ،"
ކުއްލި ނުރައްކަލުގެ ހާލަތު އޮއްވާ ކައުންސިލްތަކުގެ ދައުރު ދަންމާލަން ގާނޫނުއަސާސީއަށް އިސްލާހު ގެނެސްފައި ވަނީ އޭރު އިދިކޮޅުގައި ތިބެގެން އެކަން ނުކުރެވޭނެ ކަމަށް އަޑުއުފުލަމުން ދަނިކޮށް ކަމަށް ތޯރިގު ވިދާޅުވި އެވެ. އެކަން ހިނގާފައި ވަނީ ކޮވިޑް ދުވަސްވަރު އެވެ. އެހެންކަމުން މިއަދު އެވާހަކަ ދައްކަން އެ ޕާޓީން ލަދުގަންނަން ޖެހޭނެ ކަމަށް އޭނާ ވިދާޅުވި އެވެ.
އޭނާ ވިދާޅުވީ މަޖިލީސް މެންބަރުންގެ ގޮޑި ގެއްލޭ ގޮތަށް ކުރީގެ ރައީސް އަބްދުﷲ ޔާމީންގެ ވެރިކަމުގައި އަދި އެމްޑީޕީގެ ދައުރުގައި ވެސް ގާނޫނުތައް ފާސްކޮށްފައިވާ ކަމަށެވެ. މި ސަރުކާރުން އެކަން ކުރުމުން އެ ފަރާތްތަކުން ނުރުހުންވާންވީ އެއްވެސް ސަބަބެއް ނެތް ކަމަށެވެ.
"އެމްޑީޕީއަކަށްވެސް އަދި ވާދަވެރި އެހެން ޕާޓީއަކަށް ވެސް ރައްޔިތުންގެ މަޖިލީހުގެ މެންބަރުންގެ ޕާޓީ ބަދަލުކުރީމަ ގޮނޑި ގެއްލޭ މައްސަލައިގަ އިތުރަށް ސިޔާސީ ގޮތުން ވާހަކަދެއްކޭނެ ޖާގައެއް ނޯންނާނެ. އެއީ އެބޭފުޅުންގެ ވެރިކަންތަކުގަވެސް ހަމަކޮށްފަ އޮތީ އެގޮތަށް،" ތޯރިގު ވިދާޅުވި އެވެ.
ގާނޫނުއަސާސީއަށް ގެނައި އިސްލާހުތައް ޕީއެންސީގެ މެންބަރުން ދިފާއުކޮށްފައިވާއިރު ރައީސް މުއިއްޒު ވެސް ވަނީ އެކަން ދިފާއު ކުރައްވައި، ގެނައި ބަދަލުތައް ވަރަށް ތަފްސީލުކޮށް ވިދާޅުވެދެއްވާފަ އެވެ.
ކޮމެންޓް
Republic of Maldives