ދައުލަތުގެ ގެރެންޓީގައި އެސްޓީއޯއަށް ހަތަރުވަނަ ލޯނު؛ 319 މިލިއަން ޑޮލަރަށް އަރާ

އެސްޓީއޯއިން ކާޑުގެ ބާވަތްތަކާއި ބޭސް ގަތުމަށް ދައުލަތުގެ ގެރެންޓީގައި ނެގި 50 މިލިއަން ޑޮލަރުގެ ލޯނާއެކު ދައުލަތުގެ ގެރެންޓީގައި އެކުންފުނިން ފާއިތުވި ހައެއްކަ އަހަރު ނަގާފައިވާ ލޯނުތަކުގެ ޖުމްލަ ފައިސާގެ އަދަދު 319 މިލިއަނަށް އަރަ އެވެ.

އެސްޓީއޯ އެމްޑީ ޝިމްހާދު އިބްރާހިމް

އެސްޓީއޯއިން ދައުލަތުގެ ގެރެންޓީގައި ނަގާފަައިވާ ލޯނުތަކުގެ އަދަދު ހަތަރަކަށް އަރައި އެފަދައިން ނެގި ލޯނުތަކުގެ ފައިސާގެ އަދަދު 319 މިލިއަން ޑޮލަރަށް އަރައިފި އެވެ. 

އެންމެ ފަހުން އެސްޓީއޯއިން ނަގާފައިވަނީ 50 މިލިއަން ޑޮލަރު / 771 މިލިއަން ރުފިޔާގެ ލޯނެކެވެ. މި ލޯނަކީ ބޭސް އަދި ކާޑުގެ ބާވަތްތައް ގަތުމަށް ނެގި ލޯނެކެވެ. 

މިކަން ހާމަވީ ބުރާސްފަތިދުވަހު އޮތް މާލިއްޔަތު ކޮމިޓީގެ ބައްދަލުވުމުގައި ފިނޭންސް މިނިސްޓްރީން މި ލޯނުގެ ތަފުސީލުތައް މަޖިލީހުގެ މާލިއްޔަތު ކޮމިޓީއާ ހިއްސާކޮށް ފޮނުވި ސިޓީން ބައެއް ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހްމަދު ސަލީމު އިއްވެވުމުންނެވެ. 

ކޮމިޓީ ފައްޓަވަމުން ސަލީމުވަނީ މާލިއްޔަތު ކޮމިޓީއަށް ފިނޭންސް މިނިސްޓްރީން ފޮނުވި ސިޓީއާ ހަވާލާ ދެއްވައި އެސްޓީއޯއިން 50 މިލިއަން ޑޮލަރު (771 މިލިއަން ރުފިޔާ)ގެ ލޯނެއް އެސްޓީއޯއިން ނަގާފައިވާކަމަށް ވިދާޅުވެފަ އެވެ. ނަމަވެސް އެ މިންވަަރަށް ވިދާޅުވެވުމާއެކު މައިކް ކަނޑައިލުމާ ގުޅިގެން އިތުރު ތަފުސީލެއް އަޑުނީވެ އެވެ. 

ދައުލަތުގެ ގެރެންޓީގައި އެސްޓީއޯއިން ނަގާފައިވާ ލޯނުތައް

  •  2021 ގައި 25 މިލިއަން ޑޮލަރު
  •  2022 ގައި 189 މިލިއަން ޑޮލަރު
  •  2022 ގައި 55 މިލިއަން ޑޮލަރު

ކޮމިޓީގެ ބައެއް މެންބަރުންނާ ""މިރާ""އިން ވާހަކަދެއްކެމުން ބައެއް ތަފުސީލުތައް އެ މެންބަރުން މި ނޫހާ ހިއްސާކުރައްވާފައިވެ އެވެ. 

އެގޮތުން މެންބަރުން ވިދާޅުވި ގޮތުގައި މި ލޯނު ނަގާފައިވަނީ ބޭރު ފަރާތަކުންނެވެ. ލޯނަށް ސަރުކާރުންވަނީ ގަރަންޓީ ދީފަ އެވެ. އަދި ލޯނުގެ އިންޓަރެސްޓު ރޭޓަކީ 13.3 އިންސައްތަ ކަމަށް އެ ބޭފުޅުން ވިދާޅުވި އެވެ. 

މި ލޯނާއެކު އެސްޓީއޯއިން ދައުލަތުގެ ގެރެންޓީގައި ނަގާފައިވާ ލޯނުތަކުގެ ޖުމްލަ ފައިސާގެ އަދަދު 319 މިލިއަން ޑޮލަރު ނުވަތަ އެއް ބިލިއަން ރުފިޔާއަށްވުރެ މައްޗަށް އަރާނެ އެވެ. އެސްޓީއޯއިންވަނީ ފާއިތުވި ދައުރުގައި ދައުލަތުގެ ގެރެންޓީގައި ތިން ލޯނެއް ނަގާފަަ އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.