ގިނަ ހިދުމަތްތައް ހުއްޓުމަކަށް، ބައެއް ހިދުމަތްތައް އެހެން ތަންތަނުން ދެނީ
މިނިސްޓްރީތަކުގެ ހިދުމަތްތައް ހުއްޓުން އަރާފައިވާއިރު، އީޕީއޭ އިން ދެމުންގެންދާ ހިދުމަތްތައް ވެސް ވަނީ މެދުކަނޑާލައިފަ އެވެ.
ސަރުކާރުގެ ތިން މިނިސްޓްރީއެއް ހިންގާ މ ގްރީން ބިލްޑިން އިމާރާތުގައި މިއަދު ހިނގި އަލިފާނުގެ ހާދިސާގެ ސަބަބުން ގިނަ ހިދުމަތްތައް ހުއްޓުން އަރައިފި އެވެ.
އަލިފާން ރޯވެފައި ވަނީ ހައުސިން މިނިސްޓްރީއާއި އިންފްރާސްޓްރަކްޗާ މިނިސްޓްރީ އަދި އެންވަޔަރަމެންޓް މިނިސްޓްރީ ހިންގާ އިމާރާތުގަ އެވެ. އެތަނުގައި ހުތި އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އާއި މާލެ ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީސްވެސް ވަނީ އަނދާ ހުލިވެފަ އެވެ.
މިނިސްޓްރީތަކުގެ ހިދުމަތްތައް ހުއްޓުން އަރާފައިވާއިރު، އީޕީއޭ އިން ދެމުންގެންދާ ހިދުމަތްތައް ވެސް ވަނީ މެދުކަނޑާލައިފަ އެވެ.
ނަމަވެސް ސިޓީ ކައުންސިލުން ބުނެފައި ވަނީ ވައިޓަލް ރެޖިސްޓްރޭޝަން އޮފީހުން ދެމުންއައި ހިދުމަތްތައް އެ ކައުންސިލްގެ ހުޅުމާލެ އޮފީހަށް ބަދަލުކޮށްފައިވާ ކަމަށެވެ. އަލިފާން ރޯވި ތަނުގައި ހުރި ގިނަ ލިޔެކިޔުންތައް ވަނީ އެތަނުން ސަލާމަތުން ނެރެފަ އެވެ.
އަލިފާން މިހާރު ކޮންޓްރޯލް ކޮށްފައިވީ ނަމަވެސް، އިމާރާތުގެ އެތެރެއިން އަނދާފައިވާ ބައިން އަލިފާނުގެ އަސަރު ފިލުވަން ވަގުތު ނަގާނެ ކަމަށް އެމްއެންޑީއެފް އިން ވަނީ ބުނެފަ އެވެ. ޓިނުން ހަދާފައި ހުރި އިމާރާތް ވަނީ އެއްކޮށް ބިމާ ހަމަވެފަ އެވެ.
މިތަނުގައި ހުރި އިދާރާތަކުން ކަށަވަރުކޮށްދޭ ގޮތުން އެއްވެސް މުވައްޒަފަކަށް އަނިޔާއެއް ނުވެ އެވެ. އެމްއެންޑީއެފް އިން ވެސް ބުނެފައި ވަނީ އެއްވެސް މީހަކު ގެއްލިގެން އަދި އަނިޔާވެގެން އެއްވެސް ރިޕޯޓެއް ލިބިފައި ނުވާ ކަމަށެވެ.
ކޮމެންޓް
Republic of Maldives