ފައްޔާޒުގެ އެ ވާހަކަތައް މަޖިލީހުގެ ރައީސް އަބްދުއްރަހީމް އަބްދުﷲ ސިފަ ކުރެއްވީ ޓެރަރިޒަމަށް ހިތްވަރު ދެއްވުމުގެ އަމަލެއްގެ ގޮތުގަ އެވެ.
ރައްޔިތުންނަށް ދެރަ ދިނީމާ ރައީސް މުހައްމަދު އަމީންއަށް ހެދިގޮތް ހަދަން ޖެހޭ ކަމަށް ވިދާޅުވެ އެމްޑީޕީގެ ޗެއާޕާސަން ފައްޔާޒު އިސްމާއީލް ދެއްކެވި ވާހަކަތައް ކަމާގުޅޭ މުއައްސަސާތަކުން ވަގުތުން ބަލާ ތަހުގީގު ކުރަން ޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ފައްޔާޒު މި މޭރުމުން ވާހަކަ ދެއްކެވީ ކުރީގެ ރައީސް މުހައްމަދު އަމީންއަށް ވީގޮތް ރައީސް ޑރ. މުހައްމަދު މުއިއްޒުއަަށް ވެދާނެ ކަމަށް އެމްޑީޕީގެ އާންމު މެންބަރަކު ބުނި ބުނުން ދިފާއު ކޮށް ވާހަކަ ދައްކަވަމުންނެވެ. ކުޅުދުއްފުށީގައި އެމްޑީޕީން ބޭއްވި ޖަލްސާއެއްގައި އެ ރަށަށް ނިސްބަތްވާ އެމްޑީޕީގެ މެންބަރަކު ވަނީ ކުރީގެ ރައީސް މުހައްމަދު އަމީންއަށް ވީގޮތް ރައީސް ޑރ. މުހައްމަދު މުއިއްޒުއަަށް ވެދާނެ ކަމަށް ބުނެ ވާހަކަ ދައްކާފަ އެވެ.
ރައީސް އަމީންއާމެދު އެމަނިކުފާނުގެ ސިޔާސީ ވާދަވެރީން ގަސްތުގައި ދޮގު ފަތުރާ ރައްޔިތުންނަށް އޮޅުވާލުމުގެ ނަތީޖާއެެއްގެ ގޮތުން ރައްޔިތުންގެ ބަޔަކު ވަނީ އެމަނިކުފާނުގެ ހަށިކޮޅަށް އަރައިގަނެ ވަރަށް ބޮޑަށް އަނިޔާ ދެއްވާފަ އެވެ. އެމަނިކުފާނު އަވަހާރަވީ އެ ހާދިސާގައި ލިބިވަޑައިގެން އަނިޔާތަކުގެ ސަބަބުންނެވެ.
އެމްޑީޕީގެ ޕޯޑިއަމްގައި ދެއްކި ވާހަަކަތަކާއި ގުޅިގެން ނޫސްވެރިއަކު ސުވާލު ކުރުމުން އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވީ ރައީސް އަމީންއަށް ވީގޮތް ރައީސް މުއިއްޒުއަަށް ވެދާނެ ކަމަށް އެމީހާ ބުނީ ނަސޭހަތެއްގެ ގޮތުގައި ކަމަށެވެ.
އަދި ވިދާޅުވީ ރާއްޖޭގެ ތާރީހުގައި ހިނގާފައި ހުރި ކަންކަން ވެރިންނަށް ހަނދާން ކޮށްދިނުމަކީ އާންމު ރައްޔިތުން ކޮންމެހެން ކުރަންޖެހޭ ކަމެއް ކަމަށެވެ.
"... 'ރައްޔިތުންނަށް ދެރަ ދިނީމާ ހަމަ މުހައްމަދު އަމީންއަށް ހެދިގޮތް ހަދަން ޖެހޭނީ، އެހެން ކޮން ގޮތެއްތޯ ހަދާނީ' އެއީ ދިވެހިރާއްޖޭގެ ތާރީހު ދައްކާފައި އޮތް ހަގީގަތް. އަޅުގަނޑު ގަބޫލު ކުރާ ގޮތުގައި ކުޅުދުއްފުށީ ޕޯޑިއަމްގައި އެ ބޭފުޅަކު އެހެން އެ ވިދާޅުވީ ރައީސުލްޖުމްހޫރިއްޔާއަކަށް މިހާރު އެ ހުންނެވި ޑރ. މުއިއްޒުއަށް ނަސޭހަތުގެ ގޮތުގައި. އެހެންވިޔަ ނުދޭށޭ އެ ބޭފުޅަކު ވިދާޅުވީ އިނގޭތޯ،"
ފައްޔާޒުގެ އެ ވާހަކަތައް މަޖިލީހުގެ ރައީސް އަބްދުއްރަހީމް އަބްދުﷲ ސިފަ ކުރެއްވީ ޓެރަރިޒަމަށް ހިތްވަރު ދެއްވުމުގެ އަމަލެއްގެ ގޮތުގަ އެވެ.
"މިއީ ކަނޑައެޅިގެން ޓެރަރިޒަމަށް ހިތްވަރުދިނުން،" ފައްޔާޒުގެ ވާހަކަކޮޅުގެ ވީޑިއޯއެއް ހިއްސާ ކުރައްވާ އެކްސް ގައި އަބްދުއްރަހީމް ވިދާޅުވި އެވެ.
ސަރުކާރު ހިންގާ ޕީއެންސީގެ ޗެއާޕާސަންގެ މަގާމުގައި ވެސް ހުންނެވި އަބްދުއްރަހީމް ވަނީ މިއީ ކަމާގުޅޭ މުއައްސަސާތަކުން ވަރަށް ސީރިއަސްކަމާއެކު ވަގުތުން ބަލަން ޖެހޭ ކަމެއް ކަމެއް ކަމަށް ވިދާޅުވި އެވެ.
"އަމުދުން އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު މިފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެން ނުވާނެ،" ފައްޔާޒުގެ މައްސަލަ ބަލަން ޖެހޭ ކަމަށް ވިދާޅުވާ ވިދާޅުވުން ތަކުރާރު ކުރައްވާ އަބްދުއްރަހީމް ވިދާޅުވި އެވެ.
ރައީސް އަމީންއަށް ވީގޮތް ރައީސް މުއިއްޒުއަށް ވެދާނެ ކަމަށް ބުނެ އެ މީހާ ވާހަކަ ދެއްކީ ދުންފަތުގެ ބައެއް ބާވަތްތައް މުޅީން މަނާކޮށް ބައެއް ބާވަތްތަކުގެ ޑިއުޓީ ބޮޑުކުރި މައްސަލާގަ އެވެ. ރައީސް އަމީން ވެސް ވަނީ އެ ފިޔަވަޅު އަޅުއްވާފަ އެވެ. އޭރުވެސް ގިނަ ބަޔަކު އެކަމާ ދެކޮޅު ހެދި އެވެ. ނަމަވެސް އަމީންއާ ދެކޮޅަށް ރައްޔިތުން ނިކުތުމުގައި އެ ނޫން ވެސް އެތައް ކަންބޮޑުވުންތަކެއް އޭރު އޮތެވެ.