ޖަދުވަލުގައި ނެތިގެން ބައެއް ޑްރަގު ނުހުއްޓުވޭ މައްސަލަ އައު ބިލުން ހައްލުވާނެ: ހުސްނީ

މިހާރު މަޖިލީހުގައި އޮތް މަސްތުވާތަކެތީގެ ގާނޫނު އިސްލާހުކުރުމުގެ ބިލުގެ ސަބަބުން ޖަދުވަލުގައި އައު ބާވަތްތަކުގެ މަސްތުވާތަކެތި ނުހިމެނިގެން އެ މައްސަލަ ހައްލުކުރުމަށް އެޅިފައި އޮތް ހުރަސް ނައްތައިލެވޭކަމަށް މުބާރިކު ވިދާޅުވި އެވެ.

ގާނޫނީ ވަކީލު އަދި މަޖިލީހުގެ މަނަދޫ ދާއިރާގެ މެންބަރު ހުސްނީ މުބާރަކު، ފޮޓޯ: މަޖިލިސް

މިހާރު އޮންނަ މަސްތުވާތަކެތީގެ ގާނޫނުގެ ދަށުން މަސްތުވާތަކެތި ހުއްޓުވުމަށް ކުރިމަތިވާ އެންމެ ބޮޑު ގޮންޖެހުމަކީ ކޮންޓްރޯލްޑް ޑްރުގެގެ ބާވަތްތައް އެ ގާނޫނުގެ ޖަދުވަލުގައި ބަޔާންކޮށްފައިވާއިރު، އެ ޖަދުވަލުގައި ނުހިމެނޭ މަސްތުވާތަކެތީގެ މައްޗަށް ގާނޫނު ނުހިންގުންކަން ފާހަގަކުރައްވައި އެ މައްސަލައަށް މިހާރު ސަރުކާރުން ހުށަހަޅާފައިވާ ބިލުން ހައްލެއް ލިބޭނެކަމަށް މަނަދޫ ދާއިރާގެ މަޖިލިސް މެންބަރު ހުސްނީ މުބާރިކު ވިދާޅުވެއްޖެ އެވެ. 

މަސްތުވާތަކެތީގެ ގާނޫނު އިސްލާހުކުރުމަށް ސަރުކާރުން ހުށަހަޅާފައިވާ ބިލާމެދު ބަހުސްކުރައްވަމުން މުބާރިކު ފާހަގަކުރެއްވި ގޮތުގައި މިހާރު މަސްތުވާތަކެއްޗާ ދެކޮޅަށް މަސައްކަތްކުރާ އިދާރާތަކަށް ދިމާވާ އެންމެ ބޮޑު ގޮންޖެހުމަކީ ގާނޫނުގެ ޖަދުވަލުގައި ބަޔާންކޮށްފައި ނެތް އައު ބާވަތްތަކުގެ މަސްތުވާތަކެތި އެތެރެކުރުމުން އެކަމުގައި ފިޔަވަޅު އަޅަން ދަތިވުމެވެ. 

"މިފަހުން މި މަސައްކަތުގައި ދިމާވި އެންމެ ބޮޑު ހުރަހަކީ މަސްތުވާތަކެއްޗާ ބެހޭ ގާނޫނުގައި މިހާރު ބަޔާންކޮށްފައި ހުރި ޖަދުވަލުތަކުގައި މަސްތުވާތަކެތީގެ ބާވަތްތައް ސްޕެސިފިކްކޮށް ބަޔާންކޮށްފައި ހުރިއިރު އަލަށް ޓްރެންޑްވަމުންދާ މަސްތުވާ އައު ބާވަތްތައް އެ ޖަދުވަލުގައި ބަޔާންކޮށްފަައިނުވާތީ ކުށް ގޮތުގައި ކަނޑައެޅިގެން އެ ތަންފީޒުކުރުމަށް ހުރަސްއެޅިގެންދިއުން،" މުބާރިކު ވިދާޅުވި އެވެ. 

މުބާރިކު ވިދާޅުވި ގޮތުގައި މިހާރު ޖަދުވަލުތައް ވަކިން ބަޔާންކޮށް، މަސްތުވާތަކެތި އުފެއްދުމަށް ބޭނުންކުރާ އާލަތްތަކަށްވެސް ވަކި ޖަދުވަލެއް ހިމެނިފައި އެބައޮތެވެ. އަދި ވަގުތީ ގޮތުން ކޮންޓްރޯލުކުރާ ޑްރަގުތައް ބަޔާންކުރުމަށްވެސް ވަކި ޖަދުވަލެއް މިހާރު ހުށަހަޅާފައިވާ ބިލުގައި ހިމަނާފަައި އޮތްކަން އޭނާ ފާހަގަކުރެއްވި އެވެ. 

މިހާރު ގާނޫނުގައި ބުނެފައިވާ ގޮތުން ޖަދުވަލުތަކަށް މަސްތުވާތަކެތި އިތުރުކޮށް އުނިކުރެވޭނީ ޑްރަގް ކޮންޓްރޯލުކުރުމާ ގުޅޭ ކައުންސިލުގެ ލަފާގެ މަތިން ރައީސުލްޖުމްހޫރިއްޔާ ނެރުއްވައި ސަރުކާރުގެ ގެޒެޓުގައި ޝާއިއުކުރައްވާ ގަރާރަކުންނެވެ. އެ ގަރާރު ނެރެންޖެހެނީ މަޖިލީހުގެ ރުހުމާއެކު އެވެ.  

މުބާރިކު ވިދާޅުވި ގޮތުގައި މިހާރުވެސް ބައެއް ގާނޫނުތަކުގައި މިގޮތަށް ކަންކަން ކަނޑައެޅުމުގެ ބާރު ރައީސަށް އޮވެ އެވެ. އެގޮތުން ޓެރަރިޒަމް ގާނޫނުގެ ދަށުން ޓެރަރިސްޓު ޖަމާއަތްތައް ކަނޑައެޅުމުގެ ބާރުވެސް ރައީސަށް ލިބިދީފައިވާކަން މުބާރިކު ފާހަގަކުރެއްވި އެވެ. އަދި އޭނާ ވިދާޅުވީ ބިލުގައި އޮތް ގޮތަށް މަޖިލީހަށް ހުށަހަޅަންޖެހުމުގެ ބަދަލުގައި ރައީސަށް ބާރު ދޫކޮށްލާފައި ބޭއްވުމަށް ތާއީދުކުރައްވާ ކަމަށެވެ. 

ގާނޫނުގައި ބަޔާންކުރާ ޑްރަގް އޮފެންޑާ ރިމާންޑު ސެންޓަރެއް ނެތުމުގެ ސަބަބުން ރިމާންޑު ޖަލުތަކުގައި މަސްތުވާތަކެތި ބޭނުންކުރާ ފަރާތްތައް ބައިތިއްބައިގެން ފަރުވާ ދިނުން ލާޒިމުވާނެ ކަމެއްކަން ފާހަގަކުރައްވަމުން މުބާރިކުވަނީ ފުރިބާރުވެފައި ހުރި ރިމާންޑު ޖަލުތަކުގައި އެފަދަ ފަރާތްތަކަށް ފަރުވާދިނުމުގެ ކަންކަން އެކަށީގެންވާ ގޮތަށް ކުރިއަށްގެންދެވިދާނެ ކަމާމެދު ސުވާލު އުފައްދަވާފަ އެވެ. 

އަދި ކޮންޓްރޯލްޑް އޮޕަރޭޝަންތައް ހިންގާއިރު 24 ގަޑިއިރަށްވުރެ ދިގުލައިގެންދާ އޮޕަރޭޝަންތަކުގައި ބަންދުގައި ބަހައްޓާ މީހާގެ ބަންދާމެދު 24 ގަޑިއިރު ތެރޭގައި ގޮތެއް ނިންމުމަށް ކޯޓަށް ހާޒިރުކުރުން ނޫން މެކޭނިޒަަމެއް އޮތުމަކީ އެފަދަ އޮޕަރޭޝަންތައް ރަނގަޅަށް ކުރިއަށްގެންދިއުމަށް މުހިއްމު ކަމެއްގެ ގޮތުގައި އޭނާ ފާހަގަކުރެއްވި އެވެ. 

މަސްތުވާކެތީގެ މައްސަލަތަކުގައި ކުށުގެ ޒިންމާ އުފުލަންނުޖެހޭ ކުޑަކުދިން ބޭނުންކުރާ ކުރުމަކީ ވަކި ހާއްސަ ކުށްތަކެއްގެ ގޮތުގައި މަސްތުވާތަކެތީގެ ގާނޫނުގައި ކަނޑައެޅުމަކީވެސް ބޭނުންތެރިކަމެއް ކަމަށް މެންބަރު ފާހަގަކުރެއްވި އެވެ. 

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.