ފައިސާ ޗާޕުކުރެވޭ މިންވަރު މަތިކުރުމުން އަމީރުގެ ފާޑުވިދާޅުވުން

ދައުލަތުގެ ހަރަދަށް ޒިންމާވުމުގެ ގާނޫނު ބަދަލުކޮށް ފައިސާ ޗާޕުކުރެވޭ މިންވަރު އިތުރުކުރުމާ ގުޅިގެން ކުރީގެ ފިނޭންސް މިނިސްޓަރު އިބްރާހީމް އަމީރު ސަރުކާރަށް ފާޑުވިދާޅުވެއްޖެ އެވެ. 

ކުރިން އަމަލުކުރަމުން އައި ހަރަދަށް ޒިންމާވުމުގެ ގާނޫނުގެ ބަދަލުގައި ފިސްކަލް ޒިންމާގެ ގާނޫނު އެކުލަވައިލާ ރައީސުލްޖުމްހޫރިއްޔާވަނީ ތަސްދީގު ކުރައްވާފަ އެވެ. ކުރިން އަމަލުކުރަމުން އައި ގާނޫނުގައި ޕަބްލިކް އެކައުންޓް އޯވާ ޑްރޯ ކުރެވޭ މިންވަރު އައު ގާނޫނުންވަނީ އިތުރުކޮށްފަ އެވެ. 

ކުރީގެ ގާނޫނުގެ ދަށުން އޯވާޑްރޯ ކުރެވޭ ލިމިޓެއްގެ ގޮތުގައި އޮންނަނީ ފާއިތުވި ތިން އަހަރުގެ އެވެރެޖު އާމްދަނީގެ %1 އެވެ. ނަމަވެސް މިހާރު އެ ލިމިޓުވަނީ ފާއިތުވި ތިން އަހަރުގެ އެވެރެޖު އާމްދަނީގެ 2.5 އިންސައްތައަށް މަތިކޮށްފަ އެވެ. 

މިކަމާ ގުޅިގެން މިރޭ އެކްސްގައި ކުރެއްވި ޕޯސްޓެއްގައި އަމީރު ވިދާޅުވީ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވުމުގެ ކުރިން ދެއްކެވި އެންމެ މުހިއްމު ވާހަކަފުޅަކީ އެމްއެމްއޭއިން ފައިސާ ޗާޕުނުކުރުމުގެ ވާހަކަ ކަމަށެވެ. ނަމަވެސް މިހާރު ޕަބްލިކަ އެކައުންޓު އޯވާ ޑްރޯކުރެވޭ މިންވަރު މަތިކޮށްފައިވާ ކަމަށް އަމީރު ވިދާޅުވި އެވެ. 

އަމީރު ވިދާޅުވި ގޮތުގައި ގާނޫނަށް ގެނައި ބަދަލާއެކު މިހާރު އެމްއެމްއޭ މެދުވެރިކޮށް ފައިސާ ޗާޕުކުރެވޭ މިންވަރު މަހެއްގެ މައްޗަށް 800 މިލިއަން ރުފިޔާއަށް މަތިވީ އެވެ. 

އަމީރުގެ ފިނޭންސް މިނިސްޓަރުކަމުގައި 2020 އިން ފެށިގެން 2023 ގެ ނިޔަލަށް އަށް ބިލިއަން ރުފިޔާ ޗާޕުކުރި އެވެ. އެ ފިޔަވަޅު ދިފާއުކުރައްވަމުން އަމީރު ވިދާޅުވީ އެމްޑީޕީ ސަރުކާރުގައި އޯވަޑްރޯ ކުރީ ގާނޫނުގައި ކުރިއްސުރެ އޮތް އިސްތިސްނާއީ ހާލަތެއް މެދުވެރިވެގެން ކަމަށެވެ. 

ކޮވިޑް-19އާ ގުޅިގެން 2020 ގައި އަދި 2021 ގައި ފައިސާ ޗާޕުކުރި ނަމަވެސް 2022 އަދި 2023 ގައި ފައިސާ ޗާޕުކުރުން ހުއްޓައިލުމަށާއި އެގޮތަށް ޗާޕުކުރަމުންދާނަމަ ބޭރު ފައިސާއަށް އޮތް ޕްރެޝަރު ބޮޑުވެ ޑޮލަރުގެ އަގު އަރާނެ ކަމުގައި އައިއެމްއެފް ފަދަ މާލީ އިދާރާތަކުން ދިޔާއީ އެއިރު ބުނަމުންނެވެ. ނަމަވެސް އެއިރުގެ ސަރުކާރުން އެކަމަށް މާބޮޑު ސަމާލުކަމެއް ނުދެ އެވެ. 

އަމީރު ސިފަކުރެއްވި ގޮތުގައި ޗާޕުކުރެވޭ އަދަދު އިތުރުކުރަން ގާނޫނަށް ގެނައި ބަދަލަކީ ދާއިމީ ބަދަލަކަށްވާއިރު އެފަދަ ބަދަލެއް ގެންނަަންޖެހޭ އެއްވެސް ޒަރޫރަތެއްވެސް ނެތެވެ. އޭނާ ތުހުމަތުކުރެއްވި ގޮތުގައި އެމްއެމްއޭއިން ދަރަންޏަށް ފައިސާ ނުނަގަންވީ ވައުދުވެސްވީ ބޮޑު އޮޅުވައިލުމަކަށެވެ. 

މިފަދައިން އަމީރު ވިދާޅުވި ނަމަވެސް އެމްއެމްއޭއިން މަހުން މަހަށް އާންމުކުރަމުންދާ ހިސާބުތަކަށް ބަލާއިރު 2023 ވަނަ އަހަރުގެ ޑިސެންބަރު މަހުން ފެށިގެން ނޮވެންބަރު މަހުގެ ނިޔަލަށް އެއްވެސް ފައިސާއެއް މި ސަރުކާރުން ޗާޕުކޮށްފައި ނެތެވެ.