އެމަނިކުފާނު ވިދާޅުވީ މި ޒަމާނަށް އަޅުގަނޑުމެން ހޭލަންވާނީ ވަރުގަދަ އަޒުމަކާއި، ހިތްވަރާއެކު، ކަމުގެ އިލްމާއި ހުނަރާއި ފަންނުތައް ދަސްކޮށް، އެ ކަންކަމަށް ހޭލުންތެރިވެގެން ކަމަށެވެ.
ޒުވާނުންނަކީ ފަންނީ ގޮތުން ހުނަރުވެރި ބަޔަކަށް ހެދުމަށްޓަކައި ސަރުކާރުން ކުރަމުންދާ މުހިންމު މަސައްކަތުގައި އަމަލާއި ބަހުން ޝާމިލްވެ، ގައުމީ ތަރައްގީއަށް ބޭނުންވާ ލަނޑުދަނޑިތައް ހާސިލު ކުރުމަށް ނައިބް ރައީސް ހުސެއިން މުހައްމަދު ލަތީފް ގޮވާލައްވައިފި އެވެ.
ހުރަވީ ދުވަހުގެ ޖަލްސާގައި ރޭ ވާހަކަ ދައްކަވަމުން ނައިބް ރައީސް ވިދާޅުވީ ސަރުކާރުން ދިވެހި ގައުމުގެ އެންމެ މަތީ މަސްލަހަތުން ފެށިގެން އާންމު މަސްލަހަތުތައް ހިމާޔަތްކުރުމަށް ގިނަ މަސައްކަތްތަކެއް ކުރަމުންދާ ކަމަށާއި، ފަންނިއްޔާތުގެ ދާއިރާއަށް އަންނަމުންދާ ހަލުވި ތަރައްގީއާއި، މަސްނޫއީ ވިސްނުން ފުޅާވާމުން އަންނަ އައުމާއެކު ސައިބާ ސަލާމަތީ ފިޔަވަޅުތައްވެސް ކަމާބެހޭ ފަރާތްތަކުގެ ފަންނީ އެހީއާއެކު ހަރުދަނާ ކުރަމުން ގެންދަމުންދާ ކަމަށެވެ.
އެކަން އެހެން އޮއްވައި، މިއަދު ހަނގުރާމަތައްކޮށް ގައުމުތައް ސުންނާފަތި ކުރުމުގައި ބޭނުން ހިފަނީ ހައިބްރިޑް ހަތިޔާރާއި އޭގެ އުކުޅުތައް ނުވަތަ ކައްޗަރީ ވިސްނުމާއި އޭގެ ހުނަރުތައް ކަމަށްވާއިރު، މިއަދު އެންމެ ބޮޑަށް ސަމާލުކަން ދޭންޖެހިފައި ވަނީ މިފަދަ ނުރައްކާތަކުން ދަފަރާވުމުގެ މައްޗަށް ކަމަށާއި، މި ހަނގުރާމައާ ކުރިމަތިލާން ބޭނުންވާ ފަންނިއްޔާތުގެ ހުނަރުތައް ދަސްކުރުމަށް އަދުގެ ޒުވާނުންނަށް، ނައިބް ރައީސް ވަނީ ގޮވާލައްވާފަ އެވެ.
އެމަނިކުފާނު ވިދާޅުވީ މި ޒަމާނަށް އަޅުގަނޑުމެން ހޭލަންވާނީ ވަރުގަދަ އަޒުމަކާއި، ހިތްވަރާއެކު، ކަމުގެ އިލްމާއި ހުނަރާއި ފަންނުތައް ދަސްކޮށް، އެ ކަންކަމަށް ހޭލުންތެރިވެގެން ކަމަށާއި، 21 ވަނަ ގަރުނުގެ ތަހުޒީބާއި ތަމައްދުންގެ އުކުޅުތަކާއި ގޮތްތައް ދަސްކުރުމަށް، އަދުގެ ކޮންމެ ބޭފުޅަކަށްވެސް އިލްތިމާސްކުރައްވާ ކަމަށެވެ.
ނައިބް ރައީސް އިތުރަށް ވިދާޅުވީ ރައީސް ޑރ. މުހައްމަދު މުއިއްޒުގެ ދުރު ވިސްނުންފުޅާއެކު ގައުމީ މަސްލަހަތަށްޓަކައި ކަމާބެހޭ އެންމެހައި ފަރާތްތަކާއި، ގައުމީ މަސްލަހަތުވެރީންނާ، އެކުވެރި ގުޅުންތަކާއެކު އުހުއްވަތްތެރިކަމުގެ ވިޔުގައެއް ގާއިމުކުރަމުންދާ ކަމަށެވެ. އަދި ދިވެހި އަސްކަރީ ބާރުވެރިކަމާއި، ދިވެހި ރައްޔިތުންނަށް ދެމުންދާ ސަލާމަތީ ހިދުމަތުގެ ދަންމަރު އެމަނިކުފާނު ގެންދަވަނީ ދުވަހެއް ދުވަހަކަށް ވަރުގަދަކުރައްވަމުން ކަމަށް ވެސް ވިދާޅުވި އެވެ.
ރާއްޖޭގެ ތަރައްގީ އާއި ތަހުޒީބު، އަދި އިޖުތިމާއީ ރައްކާތެރިކަމާއި، މުޖުތަމައުގެ ދުޅަހެޔޮކަމަށްޓަކައި ރައީސް ގެންދަވަނީ ގިނަގުނަ މަސައްކަތްޕުޅުތައް ކުރައްވަމުންކަން ކަމަށާއި، ދިވެހި ގައުމު އާރާސްތުކުރައްވައި ގައުމުގެ ހައިބަތާއި އިއްޒަތް ދުނިޔެއަށް ހާމަކުރެއްވުމުގައި ރައީސް ކުރައްވަމުން ގެންދަވާ އަގުހުރި، މަސައްކަތްޕުޅުތަކަށް ނައިބް ރައީސް ވަނީ ޝުކުރު ދަންނަވާފަ އެވެ.