އެމްއެމްއޭގެ ހަރުދަނާ ގަވައިދާއެކު މަނީ އެކްސްޗޭންޖު ކުރަން 98 ހުށަހެޅުން

މަނީ އެކްސްޗޭންޖު ކުރަން ހުއްދަ ލިބިފައިވާ ތަންތަން މަދުކޮށް ބެލެހެއްޓޭނެ މެކޭނިޒަމެއް ގެނައުމުގެ ގޮތުން ހެދި މަނީ އެކްސްޗޭންޖު އާ ގަވައިދުގެ ދަށުން ހުއްދައަށް އެދި ހުށަހަޅާފައިވަނީ 98 ފަރާތަކުންނެވެ.  

މަރުކަޒީ ބޭންކުން ބުނި ގޮތުގައި ބޭރު ފައިސާ ގަނެ ވިއްކާ ފަރާތްތައް ހަރުދަނާ އުސޫލެއްގެ ދަށުން ބެލެހެއްޓޭނެ ނިޒާމެއް ގެނައުމަށްޓަކައި ހެދި ގަވައިދުގެ ދަށުން މަނީ އެކްސްޗޭންޖު ކުރުމުގެ ހުއްދައަށް އެދި މިދިޔަ މަހުގެ 30 ވަނަ ދުވަހުގެ ނިޔަލަށް ފުރުސަތު ހުޅުވާލުމުން ޖުމްލަ 98 އެޕްލިކޭޝަނެއް ވަނީ ލިބިފަ އެވެ. މީގެތެރޭގައި ހިމެނެނީ މިހާރު ވެސް ހުއްދަ ލިބިގެން އެ ހިދުމަތް ދެމުން ގެންދާ 49 ފަރާތެއް ވެސް ހިމެނެ އެވެ. ފައިސާ މާރު ކުރުމުގެ ހިދުމަތްދޭން އެމްއެމްއޭ އިން ހެދި ގަވައިދުގައި ދެ ގިންތިއެއް ހިމަނާގައިވެ އެވެ. މީގެ ތެރޭން ގިންތި އެކެއްގެ ދަށުން ލައިސަންސަށް އެދި 35 އެޕްލިކޭޝަން ހުށަހަޅާފައިވެ އެވެ. އަދި ދެވަނަ ގިންތީގެ ދަށުން  14 އެޕްލިކޭޝަން ހުށަހަޅާފައިވެ އެވެ. 

މަރުކަޒީ ބޭންކުގެ ޑެޕިއުޓީ ގަވަރުނަރު އަހުމަދު އިމާދު މިއަދު ވިދާޅުވީ ހުށަހަޅާފައިވާ އެޕްލިކޭޝަންތައް ބަލައި ހުށަހަޅާފައިވަނީ ރަނގަޅު ޑޮކިއުމެންޓްތަކެއްތޯ އެ އޮތޯރިޓީން ފުރިހަމަ ވެރިފިކޭޝަން ޕްރޮސެސްއެއްގެ ދަށުން ބަލާނެ އެވެ. އަދި ހުއްދަދޭނީ ފުރިހަމައަށް ބެލުމަށްފަހު އެވެ. 

ފައިސާ މާރު ކުރުމުގެ ގަވައިދުގައި ދެ ކެޓަގަރީއެއް ނުވަަތަ ގިންތިއެއް ހިމެނެ އެވެ. މީގެތެރެއިން ގިންތި އެކަކީ ބޭރު ފައިސާ ގަތުމާއި ވިއްކުމުގެ ވިޔަފާރި ކުރުމުގެ ހުއްދަ ލިބޭނެ ފަރާތްތަކެވެ. އަދި ދެވަނަ ގިންތީގައި ހިމެނެނީ ބޭރު ފައިސާ ވިއްކުމުގެ ވިޔަފާރި އެވެ. 

ރާއްޖޭގައި މިހާތަނަށް ފައިސާ މާރުކުރުމުގެ ވިޔަފާރި ކުރަނީ 1، މާރިޗު 1987 ވަނަ އަަހަރު ހަދާފައިވާ މަނީ އެކްސްޗޭންޖު ކަމުގެ ލައިސަންސް ލިބިފައިގެން ބޭރު ފައިސާ ގަނެ ވިއްކުމުގެ ވިޔަފާރި ކުރަންވީ ގޮތުގެ ގަވައިދުގެ ދަށުންނެވެ. މި ގަވައިދުގެ ދަށުން މަނީ އެކްސްޗޭންޖު ކުރުމުގެ ވިޔަފާރި ކޮންމެ މީހަކަށް ވެސް ފަސޭހަކަމާއެކު ކުރެ އެވެ. އެ ގަވައިދުގެ ދަށުން 212 ފަރާތްތަކަށް ލައިސަންސް ދީފައިވެ އެވެ. މީގެތެރޭގައި ހިމެނެނީ 134 ވިޔަފާރި އަކާއި 78 ރިސޯޓެކެވެ. މިގޮތަށް އުސޫލުން އޮތުމުން އެމްއެމްއޭއަށް މިކަން ރެގިއުލޭޓްކޮށް ބެލެހެއްޓޭނެ އެއްވެސް ގޮތެއް ނޯވެ އެވެ. އަދި އާއްމު ފަރާތުން ރިޕޯޓެއް ކުރިޔަސް ފައިސާ މާރުކޮށްފަ ރިސިޓެއް ދިނުން ފަދަ ކަމެއްވެސް ކުރަން ކުރީގެ ގަވައިދުން ލާޒިމެއް ނުކުރެ އެވެ. ނަމަވެސް އަލަށް ހެދި ގަވައިދާއެކު ފައިސާ މާރުކުރުމަށްފަހު މާރުކުރިކަމުގެ ރަސީދެއް ދޭން ލާޒިމްވެ އެވެ. އެހެންވެ ކަޅުބާޒާރު އަގުގައި ފައިސާ މާރުކޮށްފިނަމަ އާއްމު މީހާ އަށް ހެއްކާއެކު ރިޕޯޓް ކުރެވޭނެ އެވެ.

ފުރަތަމަ ބާވަތުގެ ލައިސެންސް ދޫކުރާނީ ކުންފުނީގެ ގާނޫނުގެ ދަށުން ހަމައެކަނި ފައިސާ ގަތުމާއި ވިއްކުމަށް ރަޖިސްޓަރީކޮށްފައިވާ ކުންފުނިތަކަށެވެ. އަދި އެ ކުންފުނިތަކުގެ ހަގީގީ ވެރިންނަށް ވާންޖެހޭނީ ދިވެހިންނެވެ. މާނައަކީ އެއިން ކުންފުންޏެއްގައި އެހެން ވިޔަފާރިއެއްގެ ހިއްސާ އޮތަސް އެ ވިޔަފާރީގެ މިލްކުވެރިންނަކީ ވެސް ދިވެހިންކަމަށްވާން ޖެހޭނެ އެވެ. އަދި އެ ވިޔަފާރީގައި ހަރަކާތްތެރިވާ މުވައްޒަފުންވެސް ދިވެހިންނަށްވާން  ޖެހޭނެ އެވެ. 

ފަސް އަހަރުގެ މުއްދަތަށް އެފަދަ ވިޔަފާރިތަކަށް ދޫކުރާ ލައިސެންސް ހޯދުމަށް ހުށަހަޅާއިރު އެޕްލިކޭޝަން ފީއެއްގެ ގޮތުގައި 20،000 ރުފިޔާ އަދި ލައިސަންސް ފީއެއްގެ ގޮތުގައި އަހަރަކު 24،000 ރުފިޔާ ދައްކަންޖެހޭނެ އެވެ. ޑިޕޮސިޓުގެ ގޮތުގައި 50،000 އެމެރިކާ ޑޮލަރު ބަހައްޓަންޖެހޭނެ އެވެ.

މި ކެޓަގަރީގެ ވިޔަފާރިތަކަށް އެއް ފަހަރާ ކަސްޓަމަރަކަށް ނަގުދު ފައިސާއން ގިނަވެގެން މުއާމަލާތްކުރެވޭނީ 50،000 ރުފިިޔާ ނުވަތަ އެއާ އެއްވަރުގެ އަދަދަކަށް ބޭރު ފައިސާއިންކަމަށް ގަވާއިދުގައި ބަޔާންކޮށްފައިވެ އެވެ. އަދި އެ ފަރާތުން ކުރާ ބޭރު ފައިސާ ގަނެ ވިއްކުމުގެ ހުރިހާ މުއާމަލާތްތަކެއް މޮނީޓާ ކުރެވޭނެ އިލެކްޓްރޯނިކް ނިޒާމެއް ގާއިމުކުރަންޖެހޭނެ އެވެ.

ބޭރު ފައިސާ ވިއްކަން އެކަނި ހުއްދަ ދޭނީ ޓޫރިޒަމް ރިސޯޓު ހިންގުމުގެ ހުއްދަ އޮންނަ ކުންފުނިތަކަށް އެކަންޏެވެ. އެ ދަރަޖައިގެ ހުއްދައަށް އެދޭއިރު ފީގެ ގޮތުގައި 1،300 ޑޮލަރު އަދި ލައިސެންސްގެ އަހަރީ ފީގެ ގޮތުގައި މަހަކު 1،800 ޑޮލަރު ދައްކަންޖެހޭނެ އެވެ.

އެ ކުންފުނިތަކަށް ބޭރު ފައިސާ ވިއްކުމުގެ ވިޔަފާރިކުރެވޭނީ ބޭންކެއް މެދުވެރިކޮށް ކަމަށާއި އަދި އެއްވަނަ ދަރަޖައިގެ ހުއްދަ އޮތް ވިޔަފާރިއަކާއެކު ނަގުދު ފައިސާ އިން މުއާމަލާތް ކުރެވިދާނެ ކަމަށް ގަވާއިދުގައި ބުނެފައިވެ އެވެ. މި ކުންފުނިތަކުންވެސް ލައިސެންސް ހޯދުމަށް ހުށަހަޅާއިރު 50،000 ޑޮލަރުގެ ޑިޕޮސިޓެއް ބަހައްޓަންޖެހޭނެ އެވެ.