އެމްއެމްޓީވީއާއި އެންސްޕާއާ ގުޅުވައިގެން ހުށަހެޅި ކުއްލި މައްސަލަ ބަލައިނުގަތް

އަލަށް ފެށި ޓީވީ ޗެނަލެއްކަމަށްވާ އެމްއެމްޓީވީ ހިންގަނީ އެންސްޕާއިން ކުއްޔަށް ހިފާފައިވާ ތަނެއްގައި ކަމަށް ކުރެވޭ ތުހުމަތުތަކާ ގުޅިގެން ގަލޮޅު ދެކުނު ދާއިރާގެ މެންބަރު މީކާއީލް ނަސީމް ރައްޔިތުންގެ މަޖިލީހަށް ހުށަހެޅުއްވި ކުއްލި މައްސަލަ ބަލައިނުގަނެ މަޖިލީހުން މިއަދު ބޭރުކޮށްފި އެވެ. 

އެ މައްސަލައާ ގުޅޭ ގޮތުން މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ މީކާއީލް ހުށަހެޅުއްވި ކުއްލި މައްސަލާގައި މަޖިލީހުގެ ގަވާއިދުގައި ކުއްލި މައްސަލަތަކުގައި ފުރިހަމަވާންޖެހޭނެކަމަށް ބަޔާންކުރާ ޝަރުތުތައް ފުރިހަމަނުވާ ކަމަށެވެ. 

"ގަލޮޅު ދެކުނު ދާއިރާގެ މަޖިލިސް މެންބަރު، މީކާއިލް އަހުމަދު ނަސީމް ފޮނުއްވާފައިވާ ކުއްލި މައްސަލައެއް ވަނީ ލިބިފައި، އެ މައްސަލައިގައި ރައްޔިތުންގެ މަޖިލީހުގެ 197 ވަނަ މާއްދާާގެ ކ. ގައި ކުއްލި މައްސަލައެއްގައި ހުންނަންވާނެ ކަމަށް ބަޔާން ކޮށްފައިވާ ޝަރުތު ފުރިހަމަ ނުވާތީ އެ މައްސަލަ މި ޖަލްސާއަށް ހުށަހެޅެން ނެތް ވާހަކަދަންނަވަން،" އަބްދުއްރަހީމް ވިދާޅުވި އެވެ.

މީކާއީލު ހުށަހެޅުއްވި ކުއްލި މައްސަލާގައި ތުހުމަތުކުރައްވާފައިވަނީ ނެޝަނަލް ޓެންޑަ ބޯޑު މެދުވެރިކޮށް އެންސްޕާގެ އޮފީސް ހިންގުމަށް ތަނެއް ކުއްޔަށް ހިފުމަށް ބިޑުކުރަން އިއުލާނުކުރުމުން ކުރިމަތިލީ ކުންފުނިތަކުގެ ތެރެއިން މޯލްޑިވްސް މީޑިޔާ ހައުސް ޕްރައިވެޓް ލިމިޓެޑް ކިޔާ ކުންފުންޏަކުން ފަސް އަހަރުގެ ކުލީގެ ގޮތުގައި 34.8 މިލިއަން ރުފިޔާއަށް ހަތަރު ފުލޯ ކުއްޔަށް ނަގާފައިވާ ކަމަށެވެ. 

އިތުރަށް މެންބަރު ތުހުމަތުކުރެއްވި ގޮތުގައި އެންސްޕާއިން ކުއްޔަށް ނެގި ހަތަރު ފުލޯގެ ތެރެއިން ދެ ފުލޯގައި މޯލްޑިވްސް މީޑިޔާ ހައުސްއިން އެމްއެމްޓިވީގެ ނަމުގައި ހިންގަމުންދާ ޗެނަލްގެ ސްޓޫޑިއޯއާއި އޮފީސް ގާއިމުކޮށްފައިވެ އެވެ. 

އަދި މީކާއީލު ތުހުމަތުކުރައްވާފައިވަނީ އެ ޓީވީގައި މަސައްކަތްކުރާ ޕްރެޒެންޓަރުންނާއި ދައުލަތުގެ އެކި އިދާރާތަކުގެ މަސައްކަތް ކުރަމުންދާ މުވައްޒަފުން ހިމެނޭ ކަމަށާއި، އެ މުވައްޒަފުންނަށް މުސާރަ ދެމުން އަންނަނީ ދައުލަތުގެ ބަޖެޓުން ކަމަށެވެ. 

ކުއްލި މައްސަލާގައި މީކާއިލު ވިދާޅުވެފައިވަނީ ދައުލަތުގެ ފައިސާއަށް ހިޔާނާތްތެރިވެ ރައްޔިތުންގެ ފައިސާ ނަހަމަ ގޮތުގައި ބޭނުންކޮށްގެން ހިންގަމުންދާ ޣައިރު ގާނޫނީ އަމަލުތައް ކުށްވެރިކޮށް، މަޖިލީހުގެ ކަމާ ބެހޭ ކޮމިޓީން އެ މައްސަލަ އިތުރަށް ބަލައިދިނުމާައެކު، އެކަމުގައި ޝާމިލުވާ އެންމެހާ ފަރާތްތަކާމެދު ގާނޫނުގައިވާ ގޮތުގެ މަތިން ފިޔަވަޅު އެޅުމަށް މަޖިލީހަށާއި ސަރުކާރަށް ގޮވައިލާ ކަމަށެވެ. 

އެންސްޕާގެ އޮފީސް ހިންގުމަށް ތަނެއް ކުއްޔަށް ހިފުމުގައި ކޮރަޕްޝަން އެކުލެވޭކަމަށް ކުރެވޭ ތުހުމަތާ ގުޅިގެން އެންސްޕާއިންވަނީ އެ މައްސަލަ ބަލައިދިނުމަށް އެންޓި ކޮރަޕްޝަން ކޮމިޝަނުގައި އެދިފަ އެވެ. އެންސްޕާއިން ބުނި ގޮތުގައި އެ އިމާރާތް ކުއްޔަށް ހިފީ އުސޫލުގެ ތެރެއިންނެވެ.