ކެލައަށް ފުލުހުން އަރާ ބޮޑު އޮޕަރޭޝަނެެއް: ސިހުރު ހަދާކަމަށް ތުހުމަތުވާ ބަޔަކު ހައްޔަރު

"މިއަދު ދިއްދޫ އިން ފުލުހުންގެ ޓީމެއް އައީ. އައިސް އެ ކަންކުރާ [ސިހުރުހަދާ] ކަމަށް ތުހުމަތު ކުރެވޭ މީހުންގެ ގެތަކަށް ވަދެ ވަނީ ފާސްކޮށްފައި. ބައެއް މީހުން ފުލުހުން ހައްޔަރު ވެސް ކުރި،"

ހއ. ކެލާ -- ފޮޓޯ: ޒުވާން މަސްވެރިޔާ

ތިލަންދުންމަތީ އުތުރުބުރީ ކެލައަށް ފުލުހުންގެ ޓީމެއް ގޮސް އެ ރަށުގެ ބައެއް ގޭގޭ ފާސްކޮށް ސިހުރު ހަދަން ބޭނުން ކުރާ ކަމަށް ބެލެވޭ ބައެއް އާލަތްތަކާއި މީހުން ފުލުހުންގެ ބެލުމުގެ ދަށަށް ގެނެސްފި އެވެ.

ކެލާ އިން މިރާއާ ވާހަކަ ދެއްކި ބައެއް މީހުން ބުނާ ގޮތުން ފުލުހުންގެ ބޮޑު ޓީމެއް އެ ރަށަށް އައިސް ބައެއް ގެތައް ބަލާ ފާސްކޮށް ބަޔަކު ހައްޔަރު ކޮށްފައި ވަނީ ސިހުރު ޖެހިގެން އެ ރަށުން ބަޔަކު ވަރަށް ބޮޑަށް ބަލިވުމާއި ގުޅިގެންނެވެ. ގޮތް ނޭންގޭ އުނދަގޫތަކެއް ވާން ފެށުމުން އެ މީހުންނަށް ރުގުޔާ ކުރުމުން ސިހުރު ޖެހިފައިވާ ކަން އެނގުނު ކަމަށާ އެކަން ފުލުހުންގެ ސަމާލު ކަމަށް ގެނައުމުން އެ މައްސަލަ ބަލަން ފެށީ ކަމަށް އެ މީހުން ބުންޏެވެ.

"މިއަދު ދިއްދޫ އިން ފުލުހުންގެ ޓީމެއް އައީ. އައިސް އެ ކަންކުރާ [ސިހުރުހަދާ] ކަމަށް ތުހުމަތު ކުރެވޭ މީހުންގެ ގެތަކަށް ވަދެ ވަނީ ފާސްކޮށްފައި. ބައެއް މީހުން ފުލުހުން ހައްޔަރު ވެސް ކުރި،"

ސިހުރުގެ ސަބަބުން ކެލާގައި ބޮޑު ނުތަވަސް ކަމެއް އުފެދިފައިވާ ކަމަށް ވެސް އެ މީހުން ބުންޏެވެ.

"އަހަރެމެންނަށް ޔަގީންވޭ އެއީ އެކަހަލަ [ސިހުރުހަދާ] މީހުން ކަމަށް. އޭގެ ކިތަންމެ ބަޔަކު މިރަށުގައި އެބަ އުޅޭ. އެ މީހުންގެ ނުބައި އަމަލުތަކުގެ ސަބަބުން އެތައް ބައެއްގެ ދިރިއުޅުން ވަނީ ޖަހަންނަމައަށް ދުއްވާލާފައި،" އެ ރަށުގެ މީހަކު ބުންޏެވެ.

ހއ. ކެލާ -- ފޮޓޯ: ޒުވާން މަސްވެރިޔާ

މިކަމާ ގުޅޭގޮތުން ފުލުހުން އަދި ރަސްމީކޮށް އެއްވެސް ވާހަކައެއް ނުދައްކަ އެވެ. މި އޮޕަރޭޝަން ހިންގީ އެންމެ އުތުރުގެ ވެރިރަށް -- ދިއްދޫގައި ގާއިމުވެ ތިބޭ ފުލުހުންނެވެ.

ކެލާ ކައުންސިލުން ވެސް ބުނީ ފުލުުހުންގެ ޓީމެއް އެ ރަށަށް އައިސް ބައެއް ގެތައް ފާސް ކޮށްފައިވާ ކަމަށެވެ. އަދި ފުލުހުންގެ ތަހުގީގަށް ބައެއް ގެތަކުން ގިނަ އަދަދެއްގެ ތަކެތި ގެންގޮސްފައިވާ ކަމަށެވެ.

"ބައެއް މީހުން ބަންދު ވެސް ކުރި ކަމުގެ މައުލޫމާތު ލިބިފައިވޭ. އެކަން ކައުންސިލުން ވެސް މި ދަނީ ބަލަމުން،" ކައުންސިލް މެންބަރަކު ވިދާޅުވި އެވެ.

ސިހުރުގެ ބަލިމަޑުކަމަކީ މުޅި ރާއްޖޭގައި އޮތް ވަރަށް ބޮޑު ބަލިމަޑުކަމެކެވެ. ރާއްޖޭގެ ވަރަށް މަދު ރަށެއްގައި ނޫނީ ސިހުރުގެ ބިރުވެރިކަން އެބަ އޮތެވެ. އުތުރުގެ ގިނަ ރަށްތަކުގައި ވެސް އެކަން ބޮޑެވެ. އެކަމުގެ ސަބަބުން އެތައް ބައެއްގެ ދިރުއުޅުމަށް ވަނީ އަސަރު ކޮށްފަ އެވެ.

ސިހުރު ހެދުމަކީ ހަރާމް ކަމެކެވެ. އެއީ އެންމެ ބޮޑެތި -- ހަލާކުކުރަނިވި ހަތް ފާފައިގެ ތެރޭގައި ހިމެނޭ ފާފައެއް ކަމަށް ނަބިއްޔާ ހަދީސް ކުރައްވާފައިވެ އެވެ.

ކޮމެންޓް

0
450

މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ

Newsroom
Phone: 7819333
Email: news@themirror.mv
Marketing
Phone: 7399333
Email: marketing@themirror.mv
H. Fairlin, Bodu thakurufaanu magu, Male
Republic of Maldives
© 2025 Mi. All rights reserved.