މި އަހަރު ސުލޫކީ މައްސަލަތަކުގައި 20 ފުލުހަކު ވަޒީފާއިން ވަކިކުރި

މި އަހަރު ސުލޫކީ މައްސަލަަތައް މެދުވެރިވެގެން 20 ފުލުހަކު ވަޒީފާއިން ވަކިކޮށްފައިވާކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ. 

ސަަރުކާރަށް އަހަރު ފުރުމާ ގުޅިގެން ދައުލަތުގެ މީޑިޔާ ޕީއެސްއެމްއިން ގެނެސްދޭ ހަފުތާ 52 ޕްރޮގުރާމުގައި ވާހަކަދައްކަވަމުން ޝުޖާއު ވިދާޅުވީ ފުލުހުންގެ ގާނޫނާއި އުސޫލުތައް ނިޔާކުރަނީ ފުލުހުންގެ ހިދުމަތަކީ އެއްވެސް ފަރާތެއްގެ ނުފޫޒެއް ނެތި މިނިވަންކަމާއެކު މަސައްކަތްކުރާ މުއައްސަސާއެއްގެ ގޮތުގައި އޮތުން ކަމަށެވެ. 

ފުލުހުންގެ ހިދުމަތުގައި މަސައްކަތްކުރާ ކޮންމެ ފުލުހަކީ ގާނޫނުތަކާއި އެ ހިދުމަތުގެ އުސޫލުތަކުގައި ބަޔާންކުރާ ހަމަތަކުގައި ހިފަހައްޓައިގެން މަސައްކަތްކުރާ ފުލުހަކަށް ހެދުމަށް އެ ހިދުމަތުން ވަރަށް ބޮޑަށް ސަމާލުކަންދޭ ކަމަށްވެސް ޝުޖާއު ވިދާޅުވި އެވެ. 

އިތުރަށް އޭނާ ވިދާޅުވީ ތަފާތު ނުފޫޒުތަކަށް ލެނބިގެން ފުލުހުން އެކިކަހަލަ ކަންކަންކުރާ ކަމަށް ތުހުމަތުވެފައި އެބަހުރި ކަމަށެވެ. އަދި ޝުޖާ ވިދާޅުވީ ފުލުހުންގެ ތެރޭގައި އެފަދަ މައްސަލަތައް ބެލުމަށް އެކަށައަޅާފައިވާ އުސޫލުތަކާއި އޮނިގަނޑުގެ ތެރެއިން އެ މައްސަލަތައް އެ ހިދުމަތުން ބަލައި ފިޔަވަޅުއަޅާފައިވާ ކަމަށެވެ. 

އެގޮތަށް ތުހުމަތުވާ މައްސަލަތައް ބެލިބެލުމުން އެ މައްސަލަތަކުގައި ފުލުހުންގެ ސުލޫކީ މިންގަަނޑާަ ހިލާފަށް އަމަލުކޮށްފައިވާކަން ސާބިތުވެ 50 އަށްވުރެ ގިނަ ފުލުހުންނަށް ފިޔަވަޅު އަޅާފައިވާކަމަށާއި، އެއިން 20 މީހަކު ފުލުހުންގެ ހިދުމަތުން ވަކިކޮށްފައިވާ ކަމަށް ސީޕީ ވިދާޅުވި އެވެ. 

"އެހެންނަމަވެސް އަޅުގަނޑުމެން ހަގީގަތަށް ވާހަކަދައްކާނަމަ އަޅުގަނޑުމެންނާ ދިމާލަށް އެބަހުރި އެކި ކަހަލަ ނުފޫޒުތަކުން، އެކި ކަހަލަ ކަންތައްތައް ކުރި ކަމުގެ އިނގިލި ދިއްކޮށްފައި،" ސީޕީ ވިދާޅުވި އެވެ. 

"މިއަހަރު އަޅުގަނޑުމެން އޭގެ ތަފާސްހިސާބަކަށް ދާނަމަ ފުލުހުންގެ އެކިއެކި މިސްކޮންޑަކްޓް އަދި މުޖުތަމައުގެ ތެރެއިން ވެސް އަދި ސޯޝަލް މީޑިއާގައި ވެސް ފުލުހުންނާ ގުޅޭ ގޮތުން ހުށަހެޅިފައިވާ ޝަކުވާތައް ބަލައި 50އަށް ވުރެ ގިނަ ފުލުހުންނަށް ފިޔަވަޅު އަޅައިފައިވޭ. އޭގެ ތެރެއިން ވެސް 20 ފުލުހަކު ވާނެ މޯލްޑިވްސް ޕޮލިސް ސާވިސްއިން ވަކިކުރެވިފައި،"

ފުލުހުންގެ ތެރެއިން ބައެއް މީހުން ބާރު ނަހަމަ ގޮތުގައި ބޭނުންކުރުމާއި، ފުލުހުންގެ ސުލޫކީ މިންގަނޑާ ހިލާފު އަމަލުތައް ހިންގާކަމަށް ދޭތެރެ ދޭތެރެއިން މީސްމީޑިޔާގައި ވާހަކަ ދެކެވެ އެވެ. މި ދުވަސްކޮޅު އެންމެ ބޮޑަށް ދެކެވެނީ ފުލުހަކާއި އޭނާގެ އަންހެނުން ބައިވެރިވެގެން މީހެއްގެ ވައިބާ އެކައުންޓު ހެކުކޮށްގެން އޭނާ ދަންނަ މީހުން އަތުން އޮޅުވާލައިގެން ފައިސާ އަތުލަމުންދާކަމަށް ކުރެވޭ ތުހުމަތެވެ. 

އޮޅުވާލައިގެން މީހުންގެ އަތުން ފައިސާ ހޯދާ މައްސަލަ ފުލުހުން ތަހުގީގުކުރަމުންދާކަމަށް އެ އިދާރާއިން ބުނިއިރު އެ އެއިދާރާއިން ޔަގީންކަން ދިން ގޮތުގައި އެ މައްސަލާގައި ފުލުހެއްގެ ބައިވެރިވުމެއް ނެތެވެ.