މާރުކުރުން ލާޒިމުކުރާ ބިލާއެކު މުހިއްމު އިގުތިސާދީ ތަފާސްހިސާބު ލިބޭނެ: މުނައްވަރު
މުނައްވަރު ވިދާޅުވި ގޮތުގައި ބޭރު ފައިސާއާ ބެހޭ ބިލު ގާނޫނަަކަށްވުމުން މަނިޓަރީ ސިޔާސަތު ހަރުދަނާކޮށް ބޭރު ފައިސާގެ ބާޒާރު ރަނގަޅަށް މޮނިޓާކުރުމަށް މުހިއްމު ގިނަ މައުލޫމާތުތަކެއް އެމްއެމްއޭއަށް ލިބިގެންދާނެ އެވެ.
މިހާރު އެކުލަވައިލާފައިވާ ބޭރު ފައިސާއާ ބެހޭ ބިލު ގާނޫނަކަށްވުމުން ފައިސާއާ ގުޅޭ ސިޔާސަތު އެކުލަވައިލުމަށް ކޮންމެހެން ބޭނުންވާ މުހިއްމު ތަފާސްހިސާބުތައް މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީއަށް ލިބޭނެ ކަމުގައި އެ އޮތޯރިޓީގެ ގަވަރުނަރު އަހްމަދު މުނައްވަރު ވިދާޅުވެއްޖެ އެވެ.
އެމްއެމްޓީވީގެ ޕްރޮގުރާމެއްގައި ވާހަކަދައްކަވަމުން މުނައްވަރު ވިދާޅުވީ ބޭރު ފައިސާގެ ކަންކަން ރެގިއުލޭޓުކުރާ ގާނޫނުތައް ނުހުންނަނީ ވަރަށް މަދު ގައުމެއްގައި ކަމަށާއި، ތަރައްގީވެފައިވާ އަދި ތަރައްގީވަމުން އަންނަ ގިނަ ގައުމުތަކުގައި ބޭރު ފައިސާ ރެގިއުލޭޓުކުރުމާ ގުޅޭ ގާނޫނުތަައް ހުންނަ ކަމަށެވެ.
އެފަދަ ގާނޫނެއް ރާއްޖޭގައި އެކުލަވައިލަނީ އަލަށްކަން ފާހަގަކުރައްވަމުން ގަވަނަރު ވިދާޅުވީ އަލަށް މިފަދަ ކަމެއް ކުރާއިރު ބައެއް ކަހަލަ ދަތިތައް ކުރިމަތިވާނެ ކަމަށެވެ. ނަމަވެސް އެ ބިލުގައި އެކުލަވައިލާ ނިޒާމުތައް ގާއިމުކުރުމުގެ މަސައްކަތުގައި ބޮޑެތި ކުރިއެރުންތަކެއް ހޯދިފައިވާކަމަށްވެސް ގަވަނަރު ވިދާޅުވި އެވެ.
އަދި މި ބިލު ގާނޫނަކަށްވުމުން އެމްއެމްއޭއަށް ލިބޭނެ އެންމެ މުހިއްމު އެއްޗަކީ ތަފާސްހިސާބުކަމަށް ދެކެވަޑައިގަންނަވާ ކަމަށާއި، އެމްއެމްއޭއަށް ބޭނުންވާ ތަފާސްހިސާބު ހޯދޭނެ ގޮތަކާމެދު ޓޫރިޒަމް އިންޑަސްޓްރީއާއެކު ވަރަށް ކުރީއްސުރެ މަޝްވަރާކުރެވެމުން އަންނަ ކަމަށް މުނައްވަރު ވިދާޅުވި އެވެ.
މުނައްވަރު އިތުރަށް ފާހަގަކުރެއްވި ގޮތުގައި ޓެކްސް ގާނޫނުތަކާއެކު ފަތުރުވެރިކަމާ ގުޅުންހުރި މުހިއްމު ތަފާސްހިސާބުތައް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އަށް ލިބުނު ނަމަވެސް ޓެކްސް ގާނޫނުތައް ހުރި ގޮތުން މީރާއަށް ލިބޭ ހުރިހާ ތަފާސްހިސާބުތަކެއް އެހެން އިދާރާތަކާ ހިއްސާކުރެވެން ނޯވެ އެވެ.
"މި ބިލު ތަސްދީގުކުރެވިގެން ދިޔައީމަ، އެމްއެމްއޭއަށް ލިބިގެންދާނެ އެންމެ މުހިއްމު އެއްޗަކީ އަޅުގަނޑު ގަބޫލުކުރާ ގޮތުން ތަފާސްހިސާބު. އަޅުގަނޑު ހަނދާންވާ ގޮތުން އަޅުގަނޑުމެން ޓުއަރިޒަމް އިންޑަސްޓްރީގެ ބޭފުޅުންނާ ވަރަށް ކުރީއްސުރެއް މަޝްވަރާކުރަމުންދާ ކަމެއް ކިހިނެއްތޯ އެމްއެމްއޭއަށް ތަފާސްހިސާބު ހޯދިގެންދާނީ،" މުނައްވަރު ވިދާޅުވި އެވެ.
"އަޅުގަނޑު ހީކުރީ މީރާގެ ގާނޫނުތަކެއް ހެދިގެން މީރާއަށް ތަފާސްހިސާބުތައް ލިބެން ފެށުމުން އަޅުގަނޑުމެންނާ ހިއްސާކުރެވޭނެ ކަމަށް. އެހެންނަމަވެސް އެހެނެއްނުވޭ. މީރާގެ ގާނޫނު އިންނަ ގޮތުން އަޅުގަނޑުމެންނަށް ތަފާސްހިސާބު ދެވޭކަށް ނޯންނާނެ.،"
މުނައްވަރު ވިދާޅުވި ގޮތުގައި މިހާރު ބިލު ފަރުމާކޮށްފައި އޮތީ ރާއްޖޭގެ ބޭރު ފައިސާގެ ބާޒާރާ ގުޅޭ މުހިއްމު މައުލޫމާތުތައް އެއްކޮށް ޝާމިލު ރަނގަޅު ދިރާސާތައް ކުރުމަށް މަގުފަހިވާނެ ގޮތަށެވެ. ހާއްސަަކޮށް ބެލެންސް އޮފް ޕޭމެންޓްސް ނުވަތަ އެތެރެވާ އަދި ބޭރުވާ ބޭރު ފައިސާގެ ހިސާބުތައް ރަނގަޅަށް ބެލެހެއްޓުމަށް އެ މައުލޫމާތު ލިބުމުން މަގުފަހިވާނެކަމުގައި މުނައްވަރު ވިދާޅުވި އެވެ.
ގަވަނަރު ފާހަގަކުރެއްވި ގޮތުގައި މިހާރު އެމްއެމްއޭއަށް ލިބޭ މައުލޫމާތުގައި ބައެއް މުހިއްމު މައުލޫމާތު މަދެވެ. އެގޮތުން އޭނާ ވިދާޅުވީ ރާއްޖޭގެ އަމިއްލަ ވިޔަފާރިތަކުގެ ބޭރުގެ ދަރަނި ހުރި މިންވަރެއްވެސް މިހާރު އެމްއެމްއޭއަށް ނޭނގޭ ކމަށެވެ. އެކަމުގައިވެސް އެ އިދާރާއިން ގެންގުޅެނީ އަންދާޒާތަކެއްކަން ގަވަރުނަރު ފާހަގަކުރެއްވި އެވެ.
"ގާނޫނުން މިހޯދާ އެންމެ މުހިއްމުކަމަކީ އިތުރު މައުލޫމާތުތަކެއް މިހޯދަނީ، އަޅުގަނޑުމެންގެ ފޮރިން އެކްސްޗޭންޖު މޮނިޓާަކޮށް މަނިޓަރީ ސިޔާސަތު ހަރުދަނާކުރަން ކޮންމެހެން ބޭނުންތެރި ތަފާސްހިސާބުތަކެއް މިހޯދަނީ.،" މުނައްވަރު ވިދާޅުވި އެވެ.
ކޮމެންޓް
Republic of Maldives