ޝަރީފް ނިޔާވީ ކެފޭއެއްގައި އިންދާ މެޔަށް ތަދެއް އަރައިގެން ހޮސްޕިޓަލަށް ގެންގޮސް ފަރުވާ ދެނިކޮށް

މިއަދު އޭޑީކޭގައި ނިޔާވީ ކެފޭއެއްގައި އިންދާ މެޔަށް ތަދެއް އަރައިގެން ހޮސްޕިޓަލަށް ގެންދިޔަ މީހެއް ކަމަށް ފުލުހުން ބުނެފި އެވެ.

ފުލުހުން މިހެން ބުނީ ކުރީން ހާމަކުރި މައުލޫމާތު ގޯސް ކަން ފާހަގަކޮށް މީޑިއާތަކަށް ދެންމެ ފޮނުވި މެސެޖެއްގަަ އެވެ. ފުލުހުން ކުރީން ބުނީ އުމުރުން 53 އަހަރުގެ އައްޑޫ ހިތަދޫއަށް ނިސްބަތްވާ އަހުމަދު ޝަރީފް މިއަދު ހެނދުނު 8:56 ހާއިރު މަގުމައްޗަށް ވެއްޓުނީ އާޓިފިޝަލް ބީޗު ކައިރިން ކަމަށެވެ. އަދި އެވަގުތު ފުލުހުން އެޓެންޑްވެ، އޭނާ ވަގުތުން ހޮސްޕިޓަލަށް ގެންގޮސްފައިވާ ކަމަށެވެ.

މިއަދު ހެނދުނު މިހާދިސާ ހިނގި ތަނުގެ ބައެއް ވީޑިއޯތައް ވަނީ ސޯޝަލް މީޑިއާގައި އާންމުވެފަ އެވެ. ވީޑިއޯ އިން ފެންނަ ގޮތުގައި އެމީހާ ހޮސްޕިޓަލަށް ގެންދިޔައީ ޕިކަޕަކަށް އަރުވައިގެންނެވެ. ޕިކަޕުގައި އާއިލާގެ ދެ މީހަކާއި ފުލުހުން ތިބި މަންޒަރު ފެނެ އެވެ.

ފުލުހުން ދެންމެ ބުނީ އެ މީހާ ހޮސްޕިޓަލަަށް ގެންގޮސްފައި ވަނީ މަގުމައްޗަށް ވެއްޓިފައި ވަނިކޮށް ކަމަށް މައުލޫމާތު ދެވުނީ އެ ވަގުތު ލިބުނު މައުލޫމާތުގެ ކުށަކުން ކަމަަށެވެ.

އޭނާ ގެންދިޔައީ އާޓިފިޝަލް ބީޗުތެރޭ ހުރި ކެފޭއެއްގައި އިންދާ މެޔަށް ތަދެއް އަރައިގެން ކަމަށެވެ.

ޝަރީފްގެ ޖަނާޒާ އޮތީ އިޝާ ނަމާދަށް ފަހު އާސަހަރާގަ އެވެ.