"ހިޔާވަހި ސްކީމުގެ މުއްދަތު ހަމަވާތާ ތިން މަސް ތެރޭ ލޯނު ދޫކުރާނަން"

ސަރުކާރުން އިފްތިތާހުކޮށްފައިވާ "ހިޔާވަހި ފައިނޭންސިން" ސްކީމްގެ ދަށުން ހައުސިން ލޯނަށް އެދުމުގެ މުއްދަތު ހަމަވާތާ ތިން މަސް ދުވަހުގެ ތެރޭގައި ލޯނު ދޫކުރަން ފަށާނެ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.

ރާއްޖޭގެ ތިން ބޭންކަކާ ގުޅިގެން ގެދޮރުވެރިކަމަށް ފަސް ޕަސެންޓް ޕްރޮފިޓް މާޖިނެއްގައި ގެދޮރުވެރިކަމުގެ ލޯނު ދޫކުރުމަށް ހިޔާވަހި ފައިނޭންސިން ސްކީމު ތައާރަފްކޮށްފައި ވަނީ މިމަހުގެ ފަސްވަނަ ދުވަހު އެވެ. އަދި މިމަހުގެ އަށްވަނަ ދުވަހު ވަނީ އެ ސްކީމަށް އެދުމުގެ ފުރުސަތު، ހަ މަސް ދުވަހަށް ހުޅުވާލާފަ އެވެ.

ޕީއެސްއެމް ނިއުސްގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ވިދާޅުވީ އެޕްލިކޭޝަން ފޯމުތައް ލިބޭ ހިސާބުން ފޯމުތައް އިވެލުއޭޓް ކުރަން ފަށާނެ ކަމަށެވެ. އަދި އެޕްލިކޭޝަން ހުށަހަޅުމުގެ މުއްދަތު ހަމަވާތާ ތިން މަސް ދުވަސް ތެރޭގައި ފުރަތަމަ ބުރުގެ ލޯނުތައް ދޫކުރުމުގެ މަސައްކަތް ފައްޓަވާނެ ކަމަށެވެ.

އިސްލާމީ ބޭންކިން އުސޫލުތަކުގެ ތެރެއިން ލޯނު ދޫކުރާ މި ފައިނޭންސިން ސްކީމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެެއްގެ ދަށުން އެކުލަވައިލެވިފައިވާ ފައިނޭންސިން ސްކީމެކެވެ. މި ފައިނޭންސިން ސްކީމުގެ ދަށުން ތިން ކެޓަގަރީއެއްގެ ފައިނޭންސިން ސްކީމު ދޫކުރުމަށްވަނީ ހަމަޖެހިފަ އެވެ.

މި ޕްރޮގުރާމުގައި ހިމެނެނީ އަތޮޅު ތެރޭގެ ރަށްތަކުގައި ގެދޮރު އެޅުމަށް ދޫކުރާ ލޯނާއި ސަރުކާރުން ކަނޑައަޅާފައިވާ އާބަން ސެންޓަރުތަކުގައި ގެދޮރު އެޅުމަށް ދޫކުރާ ލޯނުތަކާއި، މާލޭގެ ސަރަހައްދުގައި ގެދޮރު އެޅުމަށް ދޫކުރާ ލޯނުތަކެވެ. 

މި ޕްރޮގުރާމުގެ ތެރެއިން އަތޮޅު ތެރޭގެ ރަށްތަކުގައި ގެދޮރު އެޅުމަށް ދޫކުރާ އެއް މިލިއަން ރުފިޔާގެ ލޯނުތައް ދޫކުރާނީ ހައުސިން ފައިނޭންސިން ކޯޕަރޭޝަން (އެޗްޑީއެފްސީ) މެދުވެރިކޮށެވެ. އާބަން ސެންޓަރުތަކަށާއި މާލެއަށް ދޫކުރާ ލޯނުތައް ދޫކުރާނީ ބޭންކް އޮފް މޯލްޑިވްސް (ބީއެމްއެލް) އަދި މޯލްޑިވްސް އިސްލާމިކް ބޭންކު (އެމްއައިބީ) މެދުވެރިކޮށެވެ. 

މި ސްކީމަށް އެދުމުގެ ފުރަތަމަ ބުރުގެ ސުންގަޑި އަކީ އޭޕްރީލް 8، 2025 ވާ އަންގާރަ ދުވަހުގެ ރޭ 23:59 އެވެ.