ގާނޫނު އަސާސީއަށް ގެނައި އިސްލާހުތަކަކީ މިނިވަންކަމާ ހަމަޖެހުމަށް މުހިންމު އިސްލާހުތަކެއް: ރައީސް

ރައްޔިތުން މަޖިލީހުން ފާސްކޮށް ގާނޫނު އަސާސީއަށް ގެނައި އިސްލާހުތަކަކީ ރައްޔިތުންނަށާއި ގައުމަށް ވަރަށް މުހިންމު އިސްލާހުތަކެއް ކަމަށާ މި އިސްލާހުތަކުގެ ސަބަބުން ގައުމުގެ މިނިވަންކަމާއި ސިޔާދަތު ރައްކާތެރި ކުރުމަށް ބާރުއަޅައި، ގައުމުގައި ހަމަޖެހުން ގާއިމުކުރުމަށް މަގުފަހިވެގެންދާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. 

އެމަނިކުފާނު މިހެން ވިދާޅުވީ ރޭ ދެއްވި ވީޑިއޯ މެސެޖެއްގަ އެވެ.

ރައީސުލްޖުމްހޫރިއްޔާގެ މެސެޖުގައި އެމަނިކުފާނު ވަނީ ރާއްޖޭގެ ސަރަހައްދަށް ބަދަލެއް ގެންނަ ނަމަ މީގެ ކުރިން އޮންނަނީ، ރައްޔިތުންގެ މަޖިލީހުގެ ތިންބައިކުޅަ ދެބައިގެ އަޣްލަބިއްޔަތުން ފާސްވުންކަމުގައި ފާހަގަކުރައްވާއެވެ. އެހެންނަމަވެސް އިއްޔެ ގެނައި އިސްލާހާ އެކު އެކަން އިތުރަށް ވަރުގަދަވެ، ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ތަނަވަސް އަޣްލަބިއްޔަތަކުން ފާސްކުރަން ޖެހޭގޮތަށް ކަނޑައެޅުނީ ކަމުގައި ވިދާޅުވިއެވެ.

ދެން ގެނައި އިސްލާހާ އެކު ރާއްޖޭގެ ކަނޑުގެ ސަރަޙައްދު އެކްސްކުލޫސިވް އިކޮނޮމިކް ޒޯން (އީއީޒެޑް) އާ ހަމައަށް ކަނޑައެޅޭނެ ކަމުގައި އެމަނިކުފާނު ވިދާޅުވި އެވެ. އަދި އެގޮތަށް ކަނޑައަޅާ ސަރަހައްދަކަށް ބަދަލު ގެނެވޭނީވެސް ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ވޯޓު ލިބި، އަދި އޭގެ އިތުރަށް ރައްޔިތުންގެ ފެންނަ ނުފެންނަ ވޯޓެއްވެސް ނަގައިގެންކަމުގައި އެމަނިކުފާނު ވިދާޅުވި އެވެ.

މީގެ އިތުރުން ރާއްޖޭގައި ބޭރުގެ އެއްވެސް ސިފައިންގެ މީހެއް، އަމަލީ ގޮތުން ޙަރަކާތްތެރި ވާނަމަ، އެކަމަށް މަޖިލީހުން ރުހުންލިބި ފާސްވާންޖެހޭ ކަމަށް ކަނޑައަޅާފައިވާކަން އެމަނިކުފާނު ފާހަގަކުރެއްވި އެވެ.

ރައްޔިތުންގެ ފެންނަ ނުފެންނަ ވޯޓު ނެގުމުގެ މާއްދާއަކީވެސް ރައްޔިތުންގެ މަޖިލީހުން ބަދަލު ގެނެވޭގޮތަށް މީގެ ކުރިން އޮތް މާއްދާއެއްކަމުގައި ފާހަގަކުރައްވާ، އިއްޔެ ގެނައި އިސްލާހަށް ފަހު ރައްޔިތުންގެ ފެންނަ ނުފެންނަ ވޯޓު ނަގާ ކަންކަމަށް ބަދަލު ގެނެވޭނީވެސް އެ ބަދަލު ގެނައުމަށްޓަކައި ރައްޔިތުންގެ ރުހުން އޮތްތޯ ބަލަން ވޯޓަކަށް އެހުމަށްފަހުގައި ކަމަށް ރައީސް ވިދާޅުވި އެވެ.

އަދި ވިދާޅުވީ ގައުމުގެ ހަމަޖެހުން ގާއިމުކުރުމަށްޓަކައި އެންޓި ޑިފެކްޝަން ގާނޫނު އަސާސީގައި ހިމެނުމަކީވެސް ރައްޔިތުންގެ މަޖިލީހުން ނިންމެވި ވަރަށް މުހިންމު ކަމެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. އިއްޔެ ރައްޔިތުންގެ މަޖިލީހުން ގާނޫނު އަސާސީއަށް ގެނައި އިސްލާހު ތަކުގެ ތެރޭގައި ރާއްޖޭގެ ތަރައްގީއަށް ކުރު މެދު އަދި ދުރު ރާސްތާގެ ޕްލޭންތައް ހެދުން ރައީސުލްޖުމްހޫރިއްޔާގެ މަސްއޫލިއްޔަތުގެ ތެރޭގައި ހިމެނިގެން ދިޔަ ކަމުގައި ވެސް ވިދާޅުވި އެވެ.

ރައީސުލްޖުމްހޫރިއްޔާގެ ވީޑިއޯ މެސެޖު ނިންމަވައިލައްވަމުން، އެމަނިކުފާނު ވަނީ ރައްޔިތުންގެ މަޖިލީހުންގެނައި އިސްލާހު ތަކަކީ ރާއްޖޭގެ ރައްޔިތުންގެ ހައްގު ގައި ރާއްޖޭގެ މިނިވަންކަމާއި ސިޔާދަތާއި ތަރައްގީއާ ހަމަޖެހުމަށްޓަކައި ނުހަނު ޖޯޝާއެކު ގައުމީ ރޫޙުގައި ނިންމެވި ވަރަށް މުހިންމު ނިންމެވުންތަކެއްކަމުގައި ވިދާޅުވެފައެވެ. އަދި އެފަދަ ނިންމެވުމެއް ރައްޔިތުންގެ މަޖިލީހުގެ މެންބަރުން ނިންމެވީތީ، އެ ބޭފުޅުންނަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.

ސަރުކާރުގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން، ގާނޫނުއަސާސީއަށް ހުށަހަޅާފައިވާ އިސްލާހުތައް އިއްޔެ ފާސްކުރީ އެންމެ ހަތް ގަޑިއިރުތެރޭ ވަރަށް އަވަސް އަރުވާލައިގެންނެވެ.

އިއްޔެ ހެނދުނު އޮތް ޖަލްސާގައި މަޖިލީހަށް ތައާރަފް ކުރި މި ބިލުގެ ބަހުސް ނިންމައި، މުޅި މަޖިލީހުގެ ކޮމެޓީއަށް ފޮނުވުމަށްފަހު އިއްޔެ އިން އިއްޔެއަށް ކޮމެޓީން ވަނީ ބިލުގެ މަސައްކަތް ނިންމާލާފަ އެވެ. މުޅި މަޖިލީހުގެ ކޮމެޓީން ވެސް މި ބިލް ފާސްކުރީ އެންމެ ދޮޅު ގަޑިއިރު ތެރޭގަ އެވެ.

ގާނޫނުއަސާސީއަށް އިސްލާހު ގެނައުމަށް ސަރުކާރުގެ ފަރާތުން ހުޅުދޫ ދާއިރާގެ މެންބަރު، މުހައްމަދު ޝާހިދު ހުށަހެޅުއްވި މި ބިލުގައި ތިން ކަމެއް އިސްލާހު ކުރަން ހުށަހަޅުއްވާފައިވެ އެވެ. އެއްކަމަކީ މަޖިލީސް މެންބަރުން އެހެން ސިޔާސީ ޕާޓީއަކަށް ބަދަލުވުން ގޮނޑި ގެއްލުމާއި، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން ގޮނޑި ގެއްލުމެވެ.

އަނެއް އިސްލާހަކީ ރައީސުލްޖުމްހުރިއްޔާއަށް ލިބިދޭ ބާރުތަކުގެ ތެރެއަށް މާއްދާއެއް އިތުރުކުރުމެވެ. އެގޮތުން ދައުލަތުގެ މައިގަނޑު ސިޔާސަތުތައް ކަނޑައަޅައި، އެ ސިޔާސަތުތައް ސަރުކާރުގެ ކަމާބެހޭ އިދާރާތަކާއި މުއައްސަސާތަކަށް އަންގައި، އެ ތަންތަނަށް ބޭނުންވާ އިރުޝާދު ދިނުމުގެ އިތުރުން، ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުމުގެ ބާރު ރައީސަށް ލިބޭ ގޮތަށް އިސްލާހު ގެނެސްފައިވެ އެވެ.

ދެން އޮތް އިސްލާހަކީ ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތުންކަމާއި އަދި ރާއްޖޭގެ ސަރަހައްދާއި ކަނޑުގެ ސަރަހައްދަށް ބަދަލެއް ގެނެވޭނީ ވެސް މަޖިލީހުގެ އަގުލަބިއްޔަތުން ކަމެވެ.

މުޅި މަޖިލީހުގެ ކޮމެޓީގައި މި ބިލަށް ބައެއް އިސްލާހުތައް ވަނީ ހުށަހަޅާފަ އެވެ. އެގޮތުން، ގާނޫނުއަސާސީއަށް މި ބަދަލުތަކާ ގުޅޭ ގޮތުން ކަމާ ގުޅުންހުރި ފަރާތްތަކާ މަޝްވަރާ ކުރަން ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި އެވެ. ނަމަވެސް އެ އިސްލާހު ބަލައިގަނެފައެއް ނުވެ އެވެ. އެ އިސްލާހާ ދެކޮޅަށް 69 މެންބަރުން ވަނީ ވޯޓް ދީފަ އެވެ.

ސަރުކާރުގެ ފަރާތުން ބިލަށް ގެނައި އިސްލާހުތަކުގެ ތެރޭގައި ރާއްޖޭގެ ސަރަައްދަށް އެއްވެސް ބަދަލެއް ގެނެވޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅައިގެ ތިންބައި މެންބަރުން ކަމަށް ބަދަލުކޮށްފައިވެ އެވެ. އަދި ރާއްޖޭގެ ސަރަހައްދީ ކަނޑާއި، ހާއްސަ އިގްތިސޯދީ ސަރަހައްދަށް އެއްވެސް ބަދަލެއް ގެނެވޭނީ ވެސް މަޖިލީހުގެ ޖުމްލަ މެންބަރުންގެ ހަތަރުބައިކުޅައިގެ ތިންބައި މެންބަރުން ފާސްކުރާ ގާނޫނަކުން ކަމަށްވެސް އިސްލާހު ގެނެސްފައިވެ އެވެ. ބިލުގައި ކުރިން އޮތީ ދެބައިކުޅަ އެއްބައި މެންބަރުންގެ ވޯޓުން ކަމަށެވެ.

ސަރުކާރުގެ ފަރާތުން ބާރަށު ދާއިރާގެ މެންބަރު އިބްރާހިމް ސުޖާއު ހުށަހެޅުއްވި އިސްލާހުތަކާއެކު މި ބިލު ކޮމެޓީން ފާސްކޮށްފައި ވަނީ 75 މެންބަރުންގެ ވޯޓުންނެވެ. ބިލާ ދެކޮޅަށް 13 މެންބަރުން ވަނީ ވޯޓު ދީފަ އެވެ.

ބިލް ފާސްކުރުމަށް އިއްޔެ ހަވީރު 5:30 ގައި ފެށި ޖަލްސާ ގައި އިދިކޮޅު އެމްޑީޕީގެ މެންބަރުން ވަނީ އިހުތިޖާޖު ކޮށް އަވަސް އަރުވާލައިގެން ގާނޫނު އަސާސީއަށް މިގޮތަށް ބަދަލު ގެނައުމާއި ދެކޮޅަށް އަޑުއުފުލާފަ އެވެ. މަޖިލީހުގެ ތަޅުމުގައި ދުންމާރިފުމެ އިހުތިޖާޖު ކޮށްފައިވެ އެވެ.

ގާނޫނު އަސާސީއަށް ހުށައެޅި އިސްލާހުގެ ބިލަށް އެމްޑީޕީން ވަނީ އިސްލާހުތަކެއް ވެސް ހުށައަޅާފަ އެވެ. ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށައެޅީ މެންބަރު ކަމުން ވަކިވާނެ ހާލަތްތަކެކެވެ. އެއީ ޕާޓީއެއްގެެ ޓިކެޓްގައި އިންތިހާބުވުމަށް ފަހު އަމިއްލަ އިސްނެގުމަށް ޕާޓީން ވަކިވުން ނުވަތަ އެހެން ޕާޓީއަކާއި ގުޅުން ނުވަތަ އަމިއްލަ ގޮތުން އިންތިހާބު ވުމަށް ފަހު ސިޔާސީ ޕާޓީއަކާ ގުޅުން ފަދަ ހާލަތްތަކެވެ. ނަމަވެސް ޕީއެންސީގެ މެޖޯރިޓީ ބޭނުންކޮށްގެން އެ އިސްލާހުތައް ވަނީ ބޭރުކޮށްލާފަ އެވެ.

ގާނޫނު އަސާސީއަށް އިސްލާހު ގެނައުމަށް ގެނުނު ވޯޓް ގައި 91 މެންބަރުން ބައިވެރިވި އެވެ. އެ ބިލް ފާސްކުރަން ވޯޓް ދިނީ 78 މެންބަރުންނެވެ. ދެކޮޅަށް ވޯޓް ދިނީ 13 މެންބަރުންނެވެ. ގާނޫނު އަސާސީއަށް ބަދަލު ގެނެވޭނީ މަޖިލީހުގެ 4/3 މެންބަރުންްގެ ވޯޓުން ކަމަށްވުމުން މި ވޯޓްގައި މަޖިލީހުގެ ރައީސް އަބްދުއްރަހީމް އަބްދުﷲ ވެސް ބައިވެރިވެވަޑައިގެން ވޯޓް ދެއްވި އެވެ.

ވަރަށް އަވަސް އަރުވާލައިގެން ގެނައި މި ބޮޑު ބަދަލުގެ ރައީސް މުއިއްޒު ވަނީ ވަގުތުން ތަސްދީގު ކުރައްވާފަ އެވެ. އަދި މިހާރު ވަނީ ސަރުކާރުގެ ގެޒެޓްގައި ޝާއިއުކޮށްފަ އެވެ.