"މިއީ ޕޮޒިޓިވް ނިޝާނެއް، މިފަހަރު ރިސޯޓް ހަދާ ރަށްތައް ގިނައިން ނެގީ ދިވެހިން"
މިނިސްޓަރު ފާހަގަ ކުރެއްވި ގޮތުގައި 11 ރަށެއް ވަނީ ޓޫރިސްޓް ރިސޯޓް ހަދަން ދޫކޮށް ދައުލަތަށް 36 މިލިއަން ޑޮލަރު ހޯދައި ދެވިފަ އެވެ. މިއީ 400 މިލިއަން ޑޮލަރުގެ އިންވެސްޓްމަންޓެވެ.
މި ސަރުކާރު އައިސް ޓޫރިޒަމަށް ދޫކުރި ގިނަ ރަށްތައް ނަގާފައިވަނީ ދިވެހިން ކަމަށާ މިއީ ވަރަށް ޕޮޒިޓިވް ނިޝާނެއް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ސަރުކާރަށް އެއް އަހަރު ފުރުމާ ގުޅިިގެން ދުވަހުނޫސް މިހާރަށް ދިން އިންޓަވިއުއެއްގައި މިނިސްޓަރު ފައިސަލް ވިދާޅުވީ ދޫކުރި ރަށްތަކުގެ ތެރޭން ގިނަ ރަށްތަކުގެ އެވޯޑް ލެޓާ ހަވާލުކޮށް ލާރިވެސް ދައުލަތަށް ވަނީ ދަށްކާފަ އެވެ. އަދި ގިނަ ރަށްތައް ނަގާފައިވަނީ ދިވެހިން ކަމަށާ މިއީ އުފާކުރަން ޖެހޭކަމެއް ކަމަށް މިނިސްޓަރު ވިދާޅުވި އެވެ.
"ރާއްޖޭގެ ޓޫރިޒަމް ޑޮމިނޭޓް ކުރަނީ ދިވެހިން. މިފަހަރު ރަނގަޅަށް އިވެލުއޭޓްކޮށްފަ ހެދޭނެ މީހުން ނެގީވެސް. ދެކެން ބޭނުންވަނީ ދިވެހިން ގިނަ ރަށްތައް ހެދޭނެ ކަމަށް،" ފައިސަލް ވިދާޅުވި އެވެ.
ޓޫރިޒަމް މިނިސްޓަރީން ބުނެފައިވާ ގޮތުގައި 11 ރަށެއް މި އަހަރު ދޫކޮށް އެކުއިޒިޝަން ކޯސްޓުގެ ގޮތުގައި 32.6 މިލިއަން ޑޮލަރު ވަނީ ދައުލަތަށް ދައްކާފަ އެވެ.
މާލެއާ ދުރުގަ ޓޫރިޒަމް އުފައްދަން ގިނަ ލުއިތަކެއް ބޭނުންވޭ
މިނިސްޓަރު ފާހަގަ ކުރެއްވި ގޮތުގައި ދޫކުރި ރަށްތައް ތަރައްގީ ކުރަން 400 މިލިއަން ޑޮލަރުގެ އިންވެސްޓް ކުރާނެ ކަމަށާ ރާއްޖެއަށް އިންވެސްޓަރުންގެ ޝައުގުވެރިކަން ބޮޑު ކަމަށެވެ. މިކަން އެނގޭ ސަބަބެއްގެ ގޮތުގައި މިނިސްޓަރު ސިފަކުރެއްވީ ކްރޮސް ސަބްސިޑީގެ ފަސް މަޝްރޫއެއް މި ސަރުކާރުން އެކި ކުންފުނިތަކާ ހަވާލުކޮށްފައިވުމެވެ.
"ކްރޮސް ސަބްސިޑީގެ ތެރޭން ތަނެއް ނަގާނަމަ ފަސް މިލިއަން ޑޮލަރު ދައުލަތަށް ދައްކަން ޖެހޭ. މިހާތަނަށް މިވީ ދުވަސްތަކުގައި އެނގުނީ ޓޫރިޒަމް ނެތް ތަންތަނަށް ޓޫރިޒަމް ގެންނަން ގިނަ ލުއިތަކެއް ދޭން ޖެހޭކަން. އެއީ ޓެކްސްތެރެއިން ވެސް،" ފައިސަލް ވިދާޅުވި އެވެ.
ކޮމެންޓް
Republic of Maldives