މަޝްވަރާ ކުރަން ދެކޮޅު ހަދައި، ޕާޓީ ބަދަލުކުރުމުން ގޮނޑި ގެއްލޭ ބިލު ކޮމެޓީން ފާސްކޮށްފި

ޕާޓީ ބަދަލުކުރާ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ހުށަހަޅާފައިވާ އިސްލާހުތަކުގެ ބިލުގެ މަސައްކަތް މުޅި މަޖިލީހުގެ ކޮމެޓީން ދޮޅު ގަޑިއިރު ތެރޭގައި ނިންމާލައިފި އެވެ.

މިއަދު މަޖިލީހަށް ތައާރަފް ކުރި މި ބިލުގެ ބަހުސް ނިންމައި، މުޅި މަޖިލީހުގެ ކޮމެޓީއަށް ފޮނުވުމަށްފަހު މިއަދުން މިއަދަށް ކޮމެޓީން ވަނީ ބިލުގެ މަސައްކަތް ނިންމާލާފަ އެވެ.

ގާނޫނުއަސާސީއަށް އިސްލާހު ގެނައުމަށް ސަރުކާރުގެ ފަރާތުން ހުޅުދޫ ދާއިރާގެ މެންބަރު، މުހައްމަދު ޝާހިދު ހުށަހެޅުއްވި މި ބިލުގައި ތިން ކަމެއް އިސްލާހު ކުރަން ހުށަހަޅުއްވާފައިވެ އެވެ. އެއްކަމަކީ މަޖިލީސް މެންބަރުން އެހެން ސިޔާސީ ޕާޓީއަކަށް ބަދަލުވުން ގޮނޑި ގެއްލުމާއި، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން ގޮނޑި ގެއްލުމެވެ.

އަނެއް އިސްލާހަކީ ރައީސުލްޖުމްހުރިއްޔާއަށް ލިބިދޭ ބާރުތަކުގެ ތެރެއަށް މާއްދާއެއް އިތުރުކުރުމެވެ. އެގޮތުން ދައުލަތުގެ މައިގަނޑު ސިޔާސަތުތައް ކަނޑައަޅައި، އެ ސިޔާސަތުތައް ސަރުކާރުގެ ކަމާބެހޭ އިދާރާތަކާއި މުއައްސަސާތަކަށް އަންގައި، އެ ތަންތަނަށް ބޭނުންވާ އިރުޝާދު ދިނުމުގެ އިތުރުން، ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުމުގެ ބާރު ރައީސަށް ލިބޭ ގޮތަށް އިސްލާހު ގެނެސްފައިވެ އެވެ.

ދެން އޮތް އިސްލާހަކީ ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތުންކަމާއި އަދި ރާއްޖޭގެ ސަރަހައްދާއި ކަނޑުގެ ސަރަހައްދަށް ބަދަލެއް ގެނެވޭނީ ވެސް މަޖިލީހުގެ އަގުލަބިއްޔަތުން ކަމެވެ.

މުޅި މަޖިލީހުގެ ކޮމެޓީގައި މި ބިލަށް ބައެއް އިސްލާހުތައް ވަނީ ހުށަހަޅާފަ އެވެ. އެގޮތުން، ގާނޫނުއަސާސީއަށް މި ބަދަލުތަކާ ގުޅޭ ގޮތުން ކަމާ ގުޅުންހުރި ފަރާތްތަކާ މަޝްވަރާ ކުރަން ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި އެވެ. ނަމަވެސް އެ އިސްލާހު ބަލައިގަނެފައެއް ނުވެ އެވެ. އެ އިސްލާހާ ދެކޮޅަށް 69 މެންބަރުން ވަނީ ވޯޓް ދީފަ އެވެ.

ސަރުކާރުގެ ފަރާތުން ބިލަށް ގެނައި އިސްލާހުތަކުގެ ތެރޭގައި ރާއްޖޭގެ ސަރަައްދަށް އެއްވެސް ބަދަލެއް ގެނެވޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅައިގެ ތިންބައި މެންބަރުން ކަމަށް ބަދަލުކޮށްފައިވެ އެވެ. އަދި ރާއްޖޭގެ ސަރަހައްދީ ކަނޑާއި، ހާއްސަ އިގްތިސޯދީ ސަރަހައްދަށް އެއްވެސް ބަދަލެއް ގެނެވޭނީ ވެސް މަޖިލީހުގެ ޖުމްލަ މެންބަރުންގެ ހަތަރުބައިކުޅައިގެ ތިންބައި މެންބަރުން ފާސްކުރާ ގާނޫނަކުން ކަމަށްވެސް އިސްލާހު ގެނެސްފައިވެ އެވެ. ބިލުގައި ކުރިން އޮތީ ދެބައިކުޅަ އެއްބައި މެންބަރުންގެ ވޯޓުން ކަމަށެވެ.

ސަރުކާރުގެ ފަރާތުން ބާރަށު ދާއިރާގެ މެންބަރު އިބްރާހިމް ސުޖާއު ހުށަހެޅުއްވި އިސްލާހުތަކާއެކު މި ބިލު ކޮމެޓީން ފާސްކޮށްފައި ވަނީ 75 މެންބަރުންގެ ވޯޓުންނެވެ. ބިލާ ދެކޮޅަށް 13 މެންބަރުން ވަނީ ވޯޓު ދީފަ އެވެ.

މި ބިލު މަޖިލީހުން ފާސްކުރުމަށް، މިއަދު 5:30 ގައި މަޖިލީހުގެ ޖަލްސާއެއް ވަނީ ތާވަލުކޮށްފަ އެވެ.