ނޭނގި ޔާރު ވަކިވީ – އެޕިސޯޑް 77
- އެޕިސޯޑް 77 –
ޝަރާގެ ދެލޮލުން ފޭބި ކަރުނަތައް ދާއިން ފޮހެލެމަށްފަހު ޝަރާގެ މޫނަށް ރަނގަޅަށް ބަލާލިއެވެ. އެވަގުތު ލީޒާ ވެސް ދާއިންއާ ގާތަށް ޖެހެލިއެވެ.
"ޝަރާ.. އަހަރެން ބަލާނަން އަޔާޒް ގެނެވޭތޯ.. އަޔާޒަށް ގުޅާނަން.. އަޔާޒް ގެނެވޭތޯ މަސައްކަތް ކުރާނަން.."
ދާއިން ހިންދިރުވާލަމުން ބުނެލިއެވެ.
"ބުނޭ! އަހަރެން ބުންޏޭ! އަހަރެން ވަރަށް ބަލިއޭ.. އަހަރެން ބޭނުމޭ ވާހަކައެއް ބުނަން.. އަހަރެން ބޭނުން ވަނީ ހަމައެކަނި ދަރިފުޅު އަޔާއާ ހަވާލު ކުރަން.، އަޔާގެ ދަރިއެއްކަން އަންގަން.. އިތުރު ކަމެއް އަހަރެން އަޔާއަށް އަންގާކަށް ބޭނުމެއް ނޫން.. އަޔާ ގާތުގަ ބުނޭ ޤަބޫލު ނުކުރެވެންޏާ، ޑީއެންއޭ ހަދައިގެން ވެސް ބަލާށޭ! އެ ދަރިފުޅު ބައްޕަގެ ލޯބިން މަހުރޫމް ނުކުރާށޭ!"
ޝަރާ ވަރަށް ހިތްވަރުކޮށްލާފައި ބުނެލިއެވެ. ލީޒާއަށް އެއްޗެއް ނުބުނެ ހުުންނާކަށް ކެތެއް ނުވިއެވެ.
"ޝަރާ.. ޝަރާ ކީއްވެތަ ތި ކަމާ ތި ވިސްނަނީ؟ އަހަރެން ވެސް މި ހުރީނު؟ ދާއިން ވެސް.. އަހަރެންނަށް ވެސް އަކްޔަން ބެލޭނެ.. މާ ރަނގަޅަށް ވެެސް ބެލޭނެ.. އަހަރެން އަކްޔަން ދެކެ ވަރަށް ލޯބިވޭ.. ވަރަށް ބޮޑަށް ލޯބިވޭ.. އިންތިހާއަށް ލޯބިވޭ.. އަކްޔަންއާ ނުލާ އަހަރެންނަށް އުޅެން ވެސް ދަތި ވާނެ.. އެވަރަށް އަހަރެން އަކްޔަން ދެކެ ލޯބިވޭ.. ކޮންމެ ގޮތެއް ވިޔަސް، އަކްޔަން ބާކީ އެއް ނުވާނެ ޝަރާ.. އަކްޔަން އަކީ ހުރިހާ އުފަލަކާ ލޯތްބެއް ލިބިގެން ބޮޑު ވާނެ ދަރިއެއް.. މާތް ރިވެތި އަޚްލާޤުގަ، ޝަރާ ފަޚުރުވެރި ވާނެ ފަދަ ދަރިއެއްގެ ގޮތުގަ އަކްޔަން ބޮޑު ވާނެ... އަދި އެއީ އިރާދަކުރެއްވިއްޔާ ޝަރާއާ އެކުގަ.. ކިހިނެއް އެނގޭނީ؟ މާތްﷲގެ ނިންމެވުން.. ދެތިން ފަހަރަކު ހިތަށް އެރި ޝަރާ ދެން ނާންނާނެއޭ.. ޝަރާ އެ ދިޔައީއޭ.. އެކަމު މާތްﷲގެ ކުޅަދުންވަންތަ ކަމުން ޝަރާ އަދިވެސް ތިހުރީ.. އިރާދަކުރެއްވިޔާ ޝަރާ ރަނގަޅު ވާނެ.. ޝަރާ އަހަރެމެންނާ ވަކިވެގެން ނުދާނެ.. ޝަރާ މާބޮޑަށް ނުވިސްނާ.."
ލީޒާގެ ދެލޮލުން ކަރުނަ ހިލިގެން ދިޔައީ އޭނާ އަށް ވެސް ނޭނގިއެވެ. ޝަރާ މަޑުމަޑުން ލީޒާގެ އަތުގައި ހިފާލިއެވެ. އަދި ގަދަކަމުން ހިނިތުންވެލިއެވެ.
"ލީޒާ.. ތީ ޑޮކްޓަރެއް... އަހަރެންގެ ޙާލަތު އަހަންނަށް ވުރެ ބޮޑަށް އެނގޭނެ.. އެކަމު، ލީޒާ މީ ދިރިއުޅުމެއް ނޫން.. އަހަރެން މި ގޮތުގަ، މި ވޭނުގަ ދުނިޔޭގަ ހުންނަން އެއީ އަހަރެންނަށް ކޮންމެ ދުވަހަކު ލިބޭނެ ކިހާ ބޮޑު އަނިޔާއެއް.. މި އަނިޔާގަ ކެތް ކުރެވޭނީ ވެސް ވަކި ވަރަކަށްނު؟ އަހަރެން އެދެނީ ހަމަ އެންމެ ފަހަރަކު ނަމަވެސް، އަޔާ ފެނިލަން.. އަޔާ ނުފެނި ހުންނާތީ ހިތަށް ވަރަށް އުނދަގޫވޭ.. އަހަރެން ބޭނުން ވަނީ އަޔާ އައިސް އަކްޔަންއަކީ އަޔާގެ ދަރި އެކޭ ބުނަން... އަޔާ އަހަރެން ދެކެ ލޯބިވާ ވާހަކަ ބުނާ އަޑު އަހާލަން ވެސް ބޭނުންވޭ.. އެކަމު އެކަން ނުވިޔަސް، އަކްޔަންއަށް ލޯބި ދޭނެ ކަމުގެ ޔަޤީންކަން އަޔާ ދިނީމަ، އަހަރެންނަށް ހަމަޖެހެވޭނެ.. އޭރުން މި ހަނގުރާމާގަ އަހަރެންނަށް އަމާން ދެވޭނެ... ކެންސަރާ ހަނގުރާމަ ކޮށްކޮށް އަހަރެން ބަލިކަށި ވެއްޖެ.. އަހަރެން ބޭނުން އަޔާ ގެންނަން.. ޕްލީޒް ދާއިން.. ޕްލީޒް ލީޒާ.. އަހަންނަށް މިކަން ކޮށްދީ.."
ޝަރާ ރޯން ފެށިއެވެ. ދާއިން އަނެއްކާ ވެސް ބެލީ ޝަރާގެ ރުއިން ހުއްޓުވޭތޯއެވެ. އަޔާޒް ގެންނާނެ ކަމުގެ ޔަޤީންކަން ދެމުންނެވެ.
***
ދަންވަރުގެ ހިމޭން ވަގުތެވެ. ސުހާ ކޮޓަރިން ނުކުމެގެން ސިޓިންރޫމްގެ ސޯފާގައި އިށީންނެވެ. އަދި ފޯނު ހުޅުވާލާ ވާރިޝްއަށް މެސެޖެއް ކޮށްލިއެވެ. އެވަގުތު ވާރިޝް އޮތީ ހޭލައެވެ. އެއީ ސުހާގެ ފަރާތުން ތަފާތު ކަމެއް ފެނިދާނެތީ އެކަމުގެ ބިރަށްޓަކައެވެ.
"އާދޭ! ސިޓިންގރޫމަށް.. އަހަރެން މީނީ އެކަނި."
ސުހާގެ މެސެޖު ކިޔާލުމާ އެކުގައި ވާރިޝް ބަލައިލީ އެނދުގައި ނިދާފައި އޮތް އީމާގެ މޫނަށެވެ.
"އަވަސް ކުރޭ! ވަގުތު ބޭކާރު ނުކުރޭ.. ލަވް.."
އަނެއްކާ ވެސް ލިބުނީ ސުހާގެ މެސެޖެކެވެ. މެސެޖު ކިޔާލުމާ އެކުގައި ވާރިޝް މެސެޖަށް ރިޕްލައި ކޮށްލަން ފެށިއެވެ.
"މީހަކަށް ފެނިދާނޭ! އެހާ ރައްކާތެރި އެއް ނޫން ގޭތެރޭގަ ދިމާ ކުރުން.. އަދި މިގަޑީގަ.."
ވާރިޝްގެ ރިޕްލައި ފެނިފައި ސުހާ ހިތްހަމަ ނުޖެހޭގޮތްވިއެވެ.
"އެހެންވީމަ.. ވަންނަން ވީތަ ތި ކޮޓަރިއަށް.."
ސުހާގެ މެސެޖާއެކުގައި ވާރިޝްއަށް ފުންމައިގެން އެނދުން ތެދުވެވުނެވެ. އަދި ޓީޝާޓު ލައިގެން ވަރަށް އަވަހަށް ކޮޓަރިން ނުކުތެވެ. ސުހާ އައިސް ވަދެފާނެތީއެވެ.
"ސުހާ.. ކިހިނެއް ތި އުޅެނީ.. އަހަރެން މިދިޔައީ ސިއްސައިގެން.. ވަންނަންވީހޭ އެހީމަ.."
ވާރިޝް އައިސް ހުއްޓުނީ ސުހާގެ ކުރިމަތީގައެވެ. ސުހާ ކޮޅަށް ތެދުވިއެވެ. ވަގުތުކޮޅަކު ސުހާ ބަލަން ހުރީ ވާރިޝްގެ ސީދާ މޫނަށެވެ. ކުއްލިއަކަށް ސުހާ ވަރަށް ބާރަށް ވާރިޝްގެ ގައިގައި ބައްދައިގަތެވެ.
"ސުހާ.."
ވާރިޝް މަސައްކަތް ކޮށްލީ ސުހާއާ ދުރަށް ދެވޭތޯއެވެ. ސުހާ ކުއްލިއަކަށް ވާރިޝްގެ ހަށިގަނޑާ ވަކިވެގެން ދިޔައެވެ. އެއީ ތަންކޮޅެއް ބާރަށް ވާރިޝް ސުހާގެ ދެއަތް ދުރުކޮށްލުމުންނެވެ.
"ޕްލީޒް ސުހާ.. މިތާކު ނޫން.. ކޮންމެ މީހަކަށް ވެސް ފެނިދާނެ.. އޭރުން ދެމީހުންގެ ދިރިއުޅުން ވެސް ހަލާކު ވީނު؟ ޕްލީޒް.."
ވާރިޝް ވާހަކަ ދައްކަމުން ދިޔައީ ވައި އަޑަކުންނެވެ.
"އާދެބަލަ! ޕްލީޒް.."
ސުހާ ހިފައިލީ ވާރިޝްގެ އަަތުގައެވެ. ދެމީހުން ގޮސް ވަނީ ބަދިގެ އަށެވެ. މުޅި ތަނަށް ވެރިވެފައި ވަނީ އަނދިރި ކަމެވެ. ސުހާ ބަލާކަށް ނުހުރެ ވާރިޝްގެ ބަނޑުގައި ދެއަތް ޖައްސާ ކޮށްޕާލީ ފާރަށެވެ. އަދި ސުހާ އޭނޭގެ މޫނު ވާރިޝްގެ މޫނާ ގާތް ކޮށްލިއެވެ. ވާރިޝްއަށް ވެސް ދުވަސްތަކަކަށް ފަހު ސުހާއާ ވަރަށް ގާތްވެލުމުން، ވާރިޝް ވެސް އެ މަސްތުގައި ވަގުތުން ޖެހިއްޖެއެވެ. ވަގުތުކޮޅަކު އެދެމީހުން އެތަނުގައި ތިބުމަށްފަހު ސިޓިންގރޫމަށް ދިޔައެވެ.
"ތޭންކްސް.."
ސުހާ ހީނލަމުން އޭނާގެ ކޮޓަރިއަށް ވަންނަން ހިނގައިގަތެވެ. ވާރިޝް ބަލަން ހުރީ ސުހާއަށެވެ. ވާރިޝް ހުރީ އަދިވެސް ލިބުން ވަގުތުކޮޅަކު ކުޑަ ވެފައެވެ.
"އައި ލަވް ޔޫ.." ސުހާގެ ފިޔަވަޅު ތަކަށް ހުއްޓުން އެރިއެވެ. ސުހާ ފަހަތަށް އެނބުރި "ލަވް ޔޫ ޓޫ" ބުނެ ކޮޓަރިއަށް ވަނެވެ. (ނުނިމޭ)
ކޮމެންޓް
އެހާ ދުވަސް ކޮށްފަ ގެނެސްދޭއިރު ވެސް ހާދަ ކުރޭ... ދެން އިން ބައި ތަންކޮޅެއް އަވަހަށް އަދި މިއަށް ވުރެ ދިގުކޮށް ގެނެސް ދޭނެ ކަމަށް އުނމީދު ކުރަން.... މި ވައި ވެސް ވަރަށް ވަރަށް ރީތި......
Republic of Maldives