ލަމްހާ ދޫކޮށްލި މައްސަލަ ހައިކޯޓުން ބަލައިގަނެފި

ސަރުކާރުގެ މައި ހޮސްޕިޓަލު އައިޖީއެމްއެޗްގައި މަސައްކަތް ކުރި ފިލިޕިންސް ނަރުސް، މޭރީ ގްރޭސްގެ މަރުގެ މައްސަލާގައި ޝަރީއަތް ނިމެންދެން ބަންދު ކޮށްފައި ހުރި ހަލީމަތު ލަމްހާ ބަންދުން ދޫކޮށްލަން ކްރިމިނަލް ކޯޓުން ނެރުނު އަމުރު ދައުލަތުން ހައިކޯޓުގައި އިސްތިއުނާފް ކޮށްފި އެވެ.

މީގެ ތިން އަހަރު ކުރިން، މޭރީ މަރާލި ކަމަށް ބުނެ ދައުވާ ކޮށްފައި ވަނީ އޭނާގެ ފިރިމީހާ، މާވިން އެސްވައި ވާގަސް އަދި ލަމްހާގެ މައްޗަށެވެ.

ލަމްހާގެ ފަރާތުން ބަންދުން ދޫކޮށްދިނުމަށް ހުށަހެޅުމުން އޭނާ ދޫކޮށްލީ، ޝަރީއަތް ދިގުލައިގެން ދާތީ އާއި ލަމްހާގެ ގިނަ ހައްގުތަކެއް ގެއްލިގެންދާ ކަމަށް ބުނެ މި މަހުގެ 12 ވަނަ ދުވަހު އެވެ. ބަންދުން ދޫކޮށްލީ ޝަރުތުތަކެއް ކޮށްފަ އެވެ.

އެގޮތުން އޭނާ ދޫކޮށްލީ މާލެ ސަރަހައްދުން ބޭރަށް ނުދިއުމަށާއި ވަކި ވަގުތުތަކެއްގައި ގެއިން ބޭރަށް ނުނިކުތުމަށާއި ކޯޓުން އަންގާ ގަޑިއަށް ކޯޓަށް ހާޒިރުވުމަށް ޝަރުތު ކޮށްފަ އެވެ.

ދައުލަތުން އެ މައްސަލަ ހައިކޯޓުގައި އިސްތިއުނާފް ކޮށްފައި ވަނީ މިމަހުގެ 14 ވަނަ ދުވަހު އެވެ. މައުލޫމާތު ލިބޭ ގޮތުގައި އެ ކޯޓުން މިހާރު ވަނީ މައްސަލަ ބަލައިގެންފަ އެވެ. ނަމަވެސް ކޯޓުގެ ވެބްސައިޓުގައި ބަލައިގެންފައިވާކަން އާންމުކޮށްފައެއް ނުވެ އެވެ.

މިއީ ޝަރީއަތް ނިމެންދެން ބަންދުކޮށްފައި ހުއްޓައި ލަމްހާ ދޫކޮށްލި ދެވަނަ ފަހަރެވެ. މީގެ ކުރިން އޭނާ ދޫކޮށްލާފައި ވަނީ މިދިޔަ ނޮވެމްބަރު މަހުގެ 23 ވަނަ ދުވަހު، ތިން މަހަށެވެ. ނަމަވެސް ދައުލަތުން އެ އަމުރު ހައިކޯޓަށް ހުށަހެޅުމުން، އެކޯޓުން ވަނީ ލަމްހާ ބަންދު ކުރަން އަލުން އަމުރުކޮށްފަ އެވެ.

އޭރު ލަމްހާ ބަންދުން ދޫކޮށްލީ ތަކުރާރުކޮށް ބަންދުން ދޫކޮށްލައި ދިނުމަށް ލަމްހާގެ ފަރާތުން ކޯޓުގައި އެދެމުން ދަނިކޮށެވެ. ދެވަނަ ފަހަރަށް މިއަދު ވެސް ލަމްހާ ދޫކޮށްލާފައި ވަނީ ކުރިން ވެސް ބަޔާންކުރި ކަންކަމުގެ މައްޗަށް ރިއާޔަތްކޮށެވެ.

ލަމްހާ ބަންދުން ދޫކޮށްލިއިރު، މާވިން ހުރީ ބަންދުގަ އެވެ. ކުރިން ލަމްހާ ދޫކޮށްލިއިރު ވެސް މާވިންގެ ބަންދާމެދު ގޮތެއް ނިންމާފައެއް ނުވެ އެވެ.

މި މަސައްލައިގައި އަދިވެސް ކުރިއަށް ދަނީ ދައުލަތުގެ ފަރާތުން ހުށަހަޅާފައިވާ ހެކިންގެ ހެކިބަސް ނެގުމެވެ. މި ދެ މީހުންނާ ދެކޮޅަށް ދައުލަތުން ވަރަށް ގިނަ ހެކި ހުށަހަޅާފައިވެ އެވެ.