"މަސްވެރި ސިނާއަތުގެ އެންމެ ބޮޑު ގޮންޖެހުމަކީ މަސްވެރިން ބާނާ މަސް ރޯމަހުގެ ގޮތުގަ ދިވެހިރާއްޖޭން ބޭރަށް ފޮނުވަން ޖެހުން. އެއީ ސްޓޯރޭޖް ކެޕޭސިޓީ ވެސް ނެތީމަ، އަނެއްކަމަކީ މަސް ޕްރޮސެސް ރާއްޖޭގަ ނުކުރެވުން،" މިނިސްޓަރު ވިދާޅުވި އެވެ.
އަންނަ މަހު މަސް ޕްރޮސެސިން ކެޕޭސިޓީ އިތުރު ކުރުމުގެ މަސައްކަތް ފައްޓަވާނެ ކަމަށް ފިޝަރީސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ސަންގުޓީވީ އަށް ދެއްވި އިންޓަވިއުއެއްގައި މިނިސްޓަރު ޝިޔާމް ވިދާޅުވީ މިހާރު މަސްވެރި ސިނާއަތަށް އޮތް އެންމެ ބޮޑު ގޮންޖެހުމަކީ ރޯމަހުގެ ގޮތުގައި ރާއްޖޭން މަސް ބޭރުކުރަން ޖެހުމެވެ. އޭގެ ސަބަބުން މަހަށް ރަގަޅު އަގެއް ނުލިބޭ ކަމަށާއި، އެހެންކަމުން ސަރުކާރުގެ އެންމެ ބޮޑު އަމާޒަކީ ކޯލްޑް ސްޓޯރޭޖްގެ އިތުރުން މަސް ޕްރޮސެސިން ސްޓޯރޭޖް ވެސް އިތުރުކުރުން ކަމަށެވެ.
"މަސްވެރި ސިނާއަތުގެ އެންމެ ބޮޑު ގޮންޖެހުމަކީ މަސްވެރިން ބާނާ މަސް ރޯމަހުގެ ގޮތުގަ ދިވެހިރާއްޖޭން ބޭރަށް ފޮނުވަން ޖެހުން. އެއީ ސްޓޯރޭޖް ކެޕޭސިޓީ ވެސް ނެތީމަ، އަނެއްކަމަކީ މަސް ޕްރޮސެސް ރާއްޖޭގަ ނުކުރެވުން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ އަންނަ މަހުގެ 250 ޓަނުގެ މަސް ޕްރޮސެސިން ސްޓޯރޭޖް ރާއްޖޭގައި ގާއިމް ކުރެވިގެންދާނެ ކަމަށެވެ. އެއީ؛
"އަށް ގުނަ [ޕްރޮސެސިން ކެޕޭސިޓީ] އިތުރު މިވަނީ. އަށް ގުނަ އިތުރުވެގެން ދިޔައީމަ މިބަލަނީ ގާތްގަނޑަކަށް ރާއްޖޭން މިބާނާ މަހުގެ، އެވްރެޖް ރަގަޅު އަހަރެއްގަ 72،000 ޓަނު ކަމަށްވަންޏާ އަޅުގަނޑުމެންނަށް އިރާދަކުރެއްވިއްޔާ 90 އިންސައްތަ ޕްރޮސެސް ކުރެވޭނެ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މީގެ ކުރީ ސަރުކާރުތަކުން މިފްކޯއަށް ސަބްސިޑީގެ ގޮތުގައި އެތައް ބިލިއަން ރުފިޔާއެއް ހަރަދުކޮށް، ތަނުގެ ތަރައްގީއަށް އެއްވެސް މަސައްކަތެއް ކޮށްފައި ނުވާ ކަމަށެވެ. ސަބްސިޑީގެ ގޮތުގައި ދޭ ފައިސާ، ތަން ތަރައްގީ ކުރުމަށް ހަރަދު ކުރާނަމަ ލިބޭ ފައިސާ މާ ބޮޑުވާނެ ކަމަށް ވިދާޅުވި އެވެ.
މިނިސްޓަރު ކުރިން ވަނީ މިފްކޯގެ މަސް ގަތުމުގެ ކެޕޭސިޓީ 25،000 މެޓްރިކް ޓަނަށް އިތުރު ކުރައްވާނެ ކަމަށް ވިދާޅުވެފަ އެވެ. ކޯލްޑް ސްޓޯރޭޖް އިތުރުކުރުމުން، މަސް ގަންނަ ބޭރުގެ ފަރާތްތަކަށް އެމީހުން ބޭނުންވާ ވަގުތު އަގު ބޮޑުކޮށް މަސް ވިއްކުމުގެ ބާރު ރާއްޖެއަށް ލިބޭނެ ކަމަށް މިނިސްޓަރު ވިދާޅުވި އެވެ.
"ސްޓޯރޭޖް ކެޕޭސިޓީ އިތުރުކުރެވެއްޖިއްޔާ އަޅުގަނޑުމެންނަށް އޮންނާނެ ބާގެއިން ޕަވާ، އަޅުގަނޑުމެންނަށް އަގަށް ގޮތެއް ކިޔުމުގެ ބާރެއް ލިބިގެންދާނެ. މިހާރު މިވާގޮތަކީ އަޅުގަނޑުމެން އަތަކު ނޯވޭ ބާރެއް މަހުގެ އަގު ކަނޑައެޅުމުގެ،" މިނިސްޓަރު ވިދާޅުވި އެވެ.
ޝިޔާމު ވިދާޅުވެފައިވަނީ ރައީސް ޑރ. މުހައްމަދު މުއިއްޒުގެ ވެރިކަމުގެ ފަސް އަހަރުގެ ދައުރު ނިންމައިލާނީ 25،000 ޓަނުގެ ކޯލްޑް ސްޓޮރޭޖު ރާއްޖޭގެ އެކި ކަންކޮޅުތަކަށް ބެހިގެންދާ ގޮތަށް ގާއިމުވެގެން ކަމަށެވެ.