"ރައީސްގެ ސިޔާސަތުތައް ދުނިޔެއިން ވެސް ބަލައިގަނެފި"

ރައީސް ޑރ. މުހައްމަދު މުއިއްޒު ގެންގުޅުއްވާ ހާރިޖީ ސިޔާސަތުތައް މުޅި ދުނިޔެއިން ވެސް ބަލައިގަންނަމުންދާ ކަމަށާއި އޭގެ ސަބަބުން ގައުމަށް އެތައް ފައިދާއެއް ވަމުންދާ ކަމަށް ނައިބް ރައީސް ހުސެއިން މުހައްމަދު ލަތީފް ވިދާޅުވެއްޖެ އެވެ.

މި ސަރުކާރަށް އަހަރު ފުރުމުގެ މުނާސަބަތުގައި ޕީއެސްއެމް ނިއުސްއަށް ދެއްވި އިންޓަވިއުއެއްގައި ނައިބް ރައީސް ވިދާޅުވީ އެއްއަހަރު ދުވަހުގެ ތެރޭގައި ގައުމު ހަމަ މަގަށް އެޅުވިފައި މިވަނީ އެތައް ގޮންޖެހުންތަކުން އަރައިގަތުމަށްފަހު ކަމަށެވެ. 

ހާއްސަގޮތެއްގައި ކުރީ ސަރުކާރުން ކަންކަން ބިނާކުރި ގޮތުން ހުރި ގޮންޖެހުންތައް ނައިބް ރައީސް ފާހަގަކުރެއްވި އެވެ. އެމަނިކުފާނު ވިދާޅުވީ ހަދާފައިވާ ގާނޫނުތަކާއި ގަވާއިދުތަކާ ހިލާފަށް އޭރުގެ ސަރުކާރުން މާލީ ނިޒާމުގެ ކަންކަން ބައްޓަންކޮށްފައިވާ ގޮތުން މި ސަރުކާރަށް ބޮޑެތި ދަތިތަކާ ކުރިމަތިވި ކަމަށެވެ. އޭގެ އެއް މިސާލަކަށް އެމަނިކުފާނު ދެއްކެވީ ދަރަނީގެ މައްސަލަ އެވެ.

ވިދާޅުވީ، އޭގެ ކުރީގެ 40 އަހަރާ ނުބައްދަލު ދަރަނި ނަންގަވާފައި ހުރި ކަމަށާއި، އެ ދަރަނިތައް ނަގާފައި ވަނީ ދެއްކޭނެ ގޮތެއް ނުހޯދައި ކަމަށެވެ. ރައީސް މުއިއްޒު ވެެރިކަމާ ހަވާލުވެވަޑައިގެން ވިސްނުންތެރިކަމާއި ހިކުމަތްތެރިކަމާއެކު އެޅުއްވި ފިޔަވަޅުތަކުގެ ސަބަބުން އެކަން މިއަދު ހަމައަކަށް އެޅިފައިވާ ކަމަށް ވިދާޅުވި އެވެ.

އެކަންކަން ހަމައަކަށް އެޅުނީ އެމަނިކުފާނު ގެންގުޅުއްވާ ހާރިޖީ ސިޔާސަތުތައް ރަގަޅު ކަމުން ކަމަށް ވެސް ނައިބް ރައީސް ވިދާޅުވި އެވެ. ދަރަނި ނަގާފައި ހުރި ގައުމުތަކާ ގުޅުން ބަދަހިކޮށް، އެގައުމުތަކުން ލިބެމުންދާ ފައިދާތަކުގެ ސަބަބުން މިއަދު ގައުމު ދަނީ ރަގަޅު މިސްރާބަކަށްކަން ފާހަގަކުރެއްވި އެވެ.

"ދުނިޔެ ގަބޫލުކޮށްފި ރައީސްގެ ސިޔާސަތުތައް. އެއީ އަޅުގަނޑުމެންނަށް ލިބެމުންދާ އެންމެ ބޮޑު ކާމިޔާބީއަކީ،" ނައިބް ރައީސް ވިދާޅުވި އެވެ.

ނައިބް ރައީސް ވިދާޅުވީ ރައްޔިތުންގެ ފުދުންތެރިކަމާއި ކާމިޔާބާ ގުޅިފަވަނީ ގައުމުގެ މިނިވަންކަން ކަމަށާއި، އެކަން ވެސް ރައީސް ކަށަވަރުކޮށްދެއްވާފައިވާ ކަމަށެވެ. އެކަން ވެސް ކަށަވަރުވެގެެން ދިޔައީ އެމަނިކުފާނުގެ ހާރިޖީ ސިޔާސަތުތައް ރަގަޅުކަމުންކަން ވެސް ފާހަގަކުރެއްވި އެވެ.

"ގައުމުގެ މިނިވަންކަން ކަށަވަރު ކުރުމަށްފަހު އިޖުތިމާއީ ހަމަޖެހުން ގެނައުމާއި އިގްތިސޯދީ ގޮތުން ރައްޔިތުން ބޭނުންވާ ފުދުންތެރިކަން ގެނައުމުގެ މަސައްކަތް މިވަނީ ކުރިއަށް ނެރެވިފަ. މިއީ އިރާދަކުރެއްވިއްޔާ އަޅުގަނޑުމެންނަށް ލިބެމުންދާ ކާމިޔާބީގެ ކަންކަން މިހިރި ފާހަގަވެގެން ދަނީ،" ނައިބް ރައީސް ވިދާޅުވި އެވެ.