"ޑިވްލޮޕްމަންޓް ބޭންކް ވާނީ ރާއްޖޭގެ ތަރައްގީގެ މުހިންމު ބައިވެރިޔާއަށް"

ރާއްޖޭގެ ޑިވްލޮޕްމަންޓް ބޭންކް ކުރިމަގުގައި ވެގެންދާނީ ރާއްޖޭގެ ތަރައްގީގެ އެންމެ މުހިމްމު ބައިވެރިޔާގެ ގޮތުގައި ކަމަށް މޯލްޑިވްސް ޑިވްލޮޕްމަންޓް ބޭންކް (ޑީބީއެމް) ގެ ސީއީއޯ ނޮއެލް ގްރެގާ ޕެޓާސަން ޖޯންސް ވިދާޅުވެއްޖެ އެވެ. 

ރާއްޖޭގެ ތާރީހުގައި އުފެއްދި ފުރަތަމަ ޑިވްލޮޕްމަންޓް ބޭންކުގެ އިފްތިތާހީ ޖަލްސާގައި ރޭ ވާހަކަ ދައްކަވަމުން ސީއީއޯ ނޮއެލް ގްރެގާ ޕެޓާސަން ޖޯންސް ވިދާޅުވީ މި ބޭންކްއަކީ ރާއްޖެއަކީ ތަރައްގީވެފައިވާ ގައުމަކަށް ރާއްޖެ ހެދުމަށް އެންމެ މުހިންމު ދައުރެއް އަދާކުރާނެ ފަރާތް ކަމަށާ ބޭންކް ކުރިމަގުގައި ވެގެންދާނީ ރާއްޖޭގެ ތަރައްގީގެ މުހިންމު ބައިވެރިޔާގެ ގޮތުގައި ކަމަށެވެ. ރައީސް ޑރ. މުހައްމަދު މުއިއްޒުގެ ތަސައްވުރު ކަމަށްވާ ރާއްޖެ 2040 ވަނަ އަހަރު އެންމެ ތަރައްގީވެފައިވާ ގައުމަކަށް ހެދުމުގެ ތަސައްވުރަށްދާން މި ބޭންކުން މުހިންމު ރޯލެއް ކުޅޭނެކަން އޭނާ ފާހަގަ ކުރެއްވި އެވެ. 

"ރާއްޖެ އަށް މާލީ ދަތިތަކެއް އެބަހުރި. އިމާރާތްކުރުމުގެ ދާއިރާގައި އިންވެސްޓްމެންޓް މަދުވުންފަދަ ދަތި ތަކެއް ވެސް އެބަހުރި.  ރާއްޖޭގެ ދަރަނި މަތިވުމުގެ މައްސަލަ ވެސް އެބައޮތް. ޑިވެލޮޕްމެންޓް ބޭންކާއެކު މާލީ ހާލަތު ރަނގަޅުކޮށް، މަޝްރޫއުތަކަށް އިންވެސްޓަރުން ހޯދައިދީ އިމާރާތްކުރުމުގެ ދާއިރާ އަށް ދިރުން ގެނެސްދޭނެ،" ބޭންކިން އާއި ފައިނޭންސިން ދާއިރާގެ ތަޖުރިބާކާރު ވިދާޅުވި އެވެ. 

އޭނާ ވިދާޅުވީ ޑީބީއެމް ވެގެންދާނީ ބޮޑެތި އިންވެސްޓްމަންޓްތަކަށް އެހީތެރިކަންދޭ ބޭންކްއެއްގެ އިތުރުން ރާއްޖޭގެ މެދުފަންތީގެ ވިޔަފާރިތަކަށްވެސް ދިރުން ގެންނަ ފަރާތްތަކަށް ކަމަށެވެ. މިކަމުގައި ބޭންކް މަސައްކަތް ކުރާނީ އިންޓަނޭޝަނަލް ޕާޓްނަރުންނާއެކުގައިކަން އޭނާ ފާހަގަ ކުރެއްވި އެވެ. 

ރާއްޖޭގެ ބޮޑެތި އިންވެސްޓްމަންޓްތަކަށް ފައިނޭންސް ހޯދަން އިންގިލާބީ ބަދަލެއް ގެނެސް ކުރިއަރުވަން ޑިވްލޮޕްމަންޓް ބޭންކެއް ހެދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން މި ބޭންކް އުފައްދާފައިވަނީ މިދާއިރާއިން ދުނިޔޭގެ ފެންވަރުގައި ފާހަގަކޮށްލެވޭ ފަރާތްތަކާއެކުގަ އެވެ. އެގޮތުން ޑިވެލޮޕްޕްމަންޓު ބޭންކުގެ ސީއީއޯގެ މަގާމަށް އައްޔަންކުރީ އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސް އެވެ. ޗެއާޕާސަންގެ މަގާމަށް އައްޔަންކުރީ ސިންގަޕޫރުގެ ރައްޔިތެއް ކަމަށްވާ އަރުނީ ގުނެތިލަކަ އެވެ. މި ދެބޭފުޅުންނަކީ ވެސް ދުނިޔޭގެ މާލީ އިދާރާތަކުގެ އިސް މަގާމު ތަކެއް ފުރުއްވާފައިވާ ބޭފުޅުންނެވެ. މީގެ އިތުރުން ބޯޑުގައި ހިމެނިވަޑައިގަންނަވަނީ އަހްމަދު އަލީ - މއ. ވޭސައިޑް 805 ފްލެޓް އާއި ސިންގަޕޫރުގެ ސައީދު އަބްދުއްނާސިރު ބިން ސައީދު ހަސަން އަލް ޖުނެއިދު އާއި އިނިގިރޭސިވިލާތުގެ ރޮބަޓް ޑުނިއެލް ކާންޓް އެވެ.