އަނަންތު އަމްބާނީ މަކުނުދޫއަށް | ގަތީ މުސަޅަކާއި ކުކުޅެއް

އޭޝިޔާ ސަރަހައްދުގެ އެންމެ ބޮޑު އެއް ސައުދާގަރުކަމަށްވާ މުކޭޝް އަމްބާނީގެ ދަރިފުޅު އަނަންތު އަމްބާނީ ހދ.މަކުނުދޫއަށް ޒިޔާރަތްކޮށް އެ ރަށުން ކުކުޅަކާއި މުސަޅެއް ގަނެފި އެވެ. 

އަނަންތު އެރަށަށް އައީ ޖެޓް ސްކީއެއްގައި އެކަނިކަމަށް އެ ރަށުން "މިރާ"އަށް މައުލޫމާތު ދިން މީހަކު ބުނެފައިވެ އެވެ. އަނަންތު ރަށަށް އަރައި ބަނދަރު މަތީ ތިބި މީހުން ކައިރިން އެދުނީ ކުކުޅަކާއި މުސަޅެއް ގަންނާށެވެ. 

އެ ރަށުގައި މުސަޅާއި ކުކުޅު ގެންގުޅޭ ތަނަކަށް ގެންދިއުމުން މުސަޅަކާއި ކުކުޅެއް އޭނާ ގަތެވެ. އެއަށްފަހު އޭނާ އެދުނީ އެ ރަށުގައި ދޫނި ގެންގުޅޭ ތަނަކަށް ދިއުމަށެވެ. 

ދޫނި ގެންގުޅޭ ގެއަކަށް އޭނާ ގޮވައިގެން ދިޔައިރު އެ ގޭގެ މީހުން އެވަގުތު ނެތުމުން އެތަނުން އޭނާ ދިޔައީ ބަނދަރަށެވެ. ބަނދަރަށް ދިޔައިރު އޭނާ ޗުއްޓީ ހޭދަކުރާ ރިސޯޓުގެ މުވައްޒަފުންނާއި އޭނާގެ ޑޮކްޓަރާއި، ސެކިއުރިޓީ ޓީމު ބަނދަރު މަތީގައި ތިބިކަމަށް ވެ އެވެ. 

އަނަންތު އަމްބާނީ ދުނިޔޭގެ ސަމާލުކަމަށް އައީ އޭނާގެ ކައިވެނީގެ ޕާޓީގެ ސަބަބުންނެވެ. ހޮލީވުޑާއި ބޮލީވުޑުގެ މަޝްހޫރު ތަރިންނާއި، ކުޅިވަރު ޝަހުސިއްޔަތުތަކާއި ސިޔާސީ ލީޑަރުންނާއި އަދި މުނިފޫހިފިލުވުމުގެ ދާއިރާގެ އެކި ފަންނާނުންނާއި، ބޮޑެތި މަހުޖަނުން ބައިވެރިވި މި ޕާޓީއަކީ މި ގަރުނުގައިވެސް ބޭއްވި އެންމެ އަގުބޮޑު ކާވެނި ޕާޓީކަމަށް ބައެއް މީހުން ބުނެ އެވެ. 

އޭނާ ޗުއްޓީ ހޭދަކުރަމުންދަނީ މަކުނުދޫ ފަޅުގައި އޮންނަ ސޮނޭވާ ސީކްރެޓްގަ އެވެ. މި ރިސޯޓަކީ ރާއްޖޭގެ އެންމެ އަގުބޮޑު އަދި އެންމެ އެކްސްކްލޫސިވް ރިސޯޓުތަކުގެ ތެރޭގައި ހިމެނޭ ތަނެކެވެ.