އައު ހިދުމަތްތަކާއެކު ދަރުމަވަންތަ ހޮސްޕިޓަލް ރަސްމީކޮށް ހުޅުވައިފި
ރޭ ރައީސް މުއިއްޒު ދަރުމަވަންތަ ހޮސްޕިޓާ ރަސްމީކޮށް ހުޅުވައިދެއްވިއިރު، ހޮސްޕިޓަލުގައި ކުޑަކުދިންގެ އައިސީޔޫއާއި އީއާރް އަދި ހައިބްރިޑް ކެތުލެބާއި، ޒަމާނީ ހިދުމަތްތައް ލިބޭނެ ފާޓިލިޓީ ސެންޓަރެއްވަނީ ގާއިމުކޮށްފަ އެވެ.
ރައީސް އަބްދުﷲ ޔާމީނުގެ ވެރިކަމުގައި ބިނާކުރެއްވި ދަރުމަވަންތަ ހޮސްޕިޓަލު ބޭނުންކުރަން ފެށިތާ ފަސް އަހަރު ފަހުން ރޭ ރަސްމީކޮށް ހުޅުވައިފި އެވެ.
ދަރުމަވަންތަ ހޮސްޕިޓަލް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. ހޮސްޕިޓާ އަލުން ހުޅުވީ ހޮސްޕިޓަލުގައި ކުރަންޖެހިފައި ހުރި މަރާމާތުގެ ބޮޑެތި މަސައްކަތްތައް ނިންމައި އައު ގިނަ ހިދުމަތްތަކެއްވެސް ގާއިމުކޮށްފަ އެވެ.
އެގޮތުން ހޮސްޕިޓަލު ހުޅުވާފައިވަނީ ފާޓިލިޓީ ސެންޓަރަކާއެކު އެވެ. ދަރިމަވައިވުމުގެ ސިއްހަތާ ގުޅޭ ފަރުވާތައް ފޯރުކޮށްދޭ މި މަރުކަޒުގައި އައިވީއެފްއާއި ސްޕާމް އަދި އެމްބްރިއޯ ގަނޑުކުރުމާއި އައިޔޫއައި ފަދަ ޒަމާނީ ހިދުމަތްތައް ލިބޭނެ އެވެ.
ދަރިމައިވުމުގެ ސިއްހަތާ ގުޅޭ ފަރުވާ ރާއްޖެއިން ލިބޭނެ އިންތިޒާމު ހަމަޖެއްސެވުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ.
އޭގެ އިތުރަށް ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި ހުރި ހައިބްރިޑް ކެތްލެބު ބޭނުންކުރަންވަނީ ފަށާފަ އެވެ. މިއީ އެންމެ ޒަމާނީ ވަސީލަތްތަކާއެކު ހިތުގެ އަދި ނާރުގެ އޮޕަރޭޝަންތައް ކުރެވޭ ގޮތަށް ގާއިމުކޮށްފައިވާ ތަނެކެވެ.
ފާއިތުވި ފަސް އަހަރު އެތަނުގެ ބޭނުންނުކުރުމާއެކު، އެތަނުގައި ހުރި މެޝިނަރީތައް ބަލަހައްޓާފައިނުވާތީ ގިނަ ތަކެތި ހަލާކުވެ އައުކުރަންޖެހުނެވެ. އެތަން ބޭނުންކުރަން ފެށީ ހުރިހާ މަރާމާތެއް ނިންމައި އައުކުރަންޖެހުނު ހުރިހާ މެޝިންތައް އައުކުރުމަށްފަހު އެވެ.
އޭގެ އިތުރަށް ދަރުމަވަންތަ ހޮސްޕިޓަލުގެ އެމަޖެންސީ ޔުނިޓަކީ ކުޑަކުދިންނަށް އެމަޖެންސީ ފަރުވާ ދިނުމަށް ހާއްސަ އީއާރްއެއްގެ ގޮތުގައި ހަަމަޖައްސާފައިވެ އެވެ. އަދި އެ ހޮސްޕިޓަލުގައި ކުޑަކުދިންގެ ހާއްސަ އައިސީޔޫއެއްވެސް ގާއިމުކޮށްފައިވެ އެވެ.
ރައީސް އަބްދުﷲ ޔާމީނުގެ ވެރިކަމުގައި 25 ބުރީގެ ހޮސްޕިޓަލުގެ މަސައްކަތްތައް ނިމުނު ނަމަވެސް ހޮސްޕިޓާ ބޭނުންކުރަން ފެށީ 2019 ވަނަ އަހަރު އެ ހޮސްޕިޓާ ބޭނުންނުކޮށް ހުހަށް ބަހައްޓާފައި ހުންނާތީ ގިނަ ބައެއްގެ ފާޑުކިޔުން އަމާޒުވުމާ ގުޅިގެންނެވެ.
ފާއިތުވި ފަސް އަހަރު އެ ހޮސްޕިޓަލުގައި ކުރަންޖެހޭ މަރާމާތުތައް ނުކޮށް އޮތުމުންނާއި ހޮސްޕިޓަލުގެ އެއްވެސް މަސައްކަތެއް ރަނގަޅަށް ކުރިއަށްނުގެންދިއުމުގެ ސަބަބުން ހޮސްޕިޓަލުގައި ފުރިހަމަ ހިދުމަތް ދިނުމަށް ބޮޑެތި މަސައްކަތްތަކެއް މި ސަރުކާރަށް ކުރަންޖެހުނެވެ.
ކޮމެންޓް
Republic of Maldives