ޑްރަގާއެކު ހައްޔަރުކުރި ސަލީމު | ގޭ ބަންދަށް ބަދަލުކުރީ އެމްޑީޕީ ވެރިކަމުގައި

ގިނަ އަދަދެއްގެ މަސްތުވާތަކެއްޗާއެކު ހައްޔަރުކުރި އުމުރުން 62 އަހަރުގެ މީހާއަކީ އުމުރު ދުވަހުގެ ޖަލު ހުކުމެއް ތަންފީޒުކުރަމުންދަނިކޮށް އެމްޑީޕީގެ ވެރިކަމުގައި ގޭ ބަންދަށް ބަދަލުކުރި މީހެއްކަން ދިވެހި ފުލުހުންގެ ހިދުމަތުން ހާމަކޮށްފި އެވެ. 

މަސްތުވާތަކެތި ބޭނުންކޮށް ވިޔަފާރިކުރި ކަމުގެ މި މައްސަލައިގައި ހައްޔަރުކޮށްފައިވަނީ ރ. އިންނަމާދޫ، ފެމޯރާ، މުހައްމަދު ސަލީމް، 65އ، އެވެ.

މިއަދު ހަވީރު އިސްކަންދަރު ކޮށީގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި ފުލުހުންވަނީ ސަލީމަށް ކުރެވޭ ތުހުމަތުތަކުގެ ތަފުސީލު މީޑިޔާއާ ހިއްސާކޮށްފަ އެވެ. ފުލުހުން ބުނި ގޮތުގައި އޭނާގެ ހަށިގަނޑު ބަލައިފާސްކުރިއިރު ހަށިގަނޑުގައި މަސްތުވާތަކެތި ކަމަށް ބެލެވޭ ތަކެތި ހުރި 13 ރަބަރު ޕެކެޓެއް ފޮރުވާފައިވަނިކޮށް ފެނިފައިވެ އެވެ. 

ސަލީމުގެ ހަށިގަނޑުން ފެނުނު ޑްރަގުގެ އިތުރަށް އޭނާ ދިރިއުޅޭ ގެ ބަލައިފާސްކުރުމުން މަސްތުވާތަކެތި ކަމުގައި ބެލެވޭ ތަކެތިތަކެއް ރައްކާކޮށްފައި ހުރި ރަބަރު ޕެކެޓުތަކެއްވަނީ ފެނިފަ އެވެ، ކޯޓު އަމުރެއްގެ ދަށުން އޭނާ ދިރިއުޅޭ ތަން ބަލައިފާސްކުރުމުެން ޖުމްލަ އަށް ރަބަރު ޕެކެޓު ފެނުނެވެ. 

ފުލުހުން އިތުރަށް ބުނެފައިވަނީ ސަލީމަކީ 2016 ވަނަ އަހަރު ޑައިމޯފިން ޓްރެފިކް ކުރި މައްސަލައެއްގައި ކުށް ސާބިތުވެ އުމުރަށް ޖަލަށްލާން ހުކުމްކޮށްފައިވާ މީހެކެވެ. އަދި އޭނާ ޖަލު ބަންދުގައި ހުއްޓާ ގެއަށް ބަދަލުކުރީ އެމްޑީޕީ ވެރިކަމުގައި 2021 ވަނަ އަހަރުގެ ޖުލައި މަހުގެ އަށްވަނަ ދުވަހު ކަމަށް ފުލުހުން ބުންޏެވެ. 

ގޭ ބަންދުގައި އޭނާ ހުރިއިރު 2023 ވަނަ އަހަރުން ފެށިގެން އިތުރު ދައުވާއެއްގެ މައްސަލަ ކޯޓުގައި ހިނގަމުންދާކަމަށް ފުލުހުން ބުނެފައިވެ އެވެ. އެއީވެސް ޑައިމޯފިން ޓްރެފިކްކުރުމުގެ މައްސަލައެކެވެ. 

ރައީސް އިބްރާހީމް މުހައްމަދު ސޯލިހުގެ ވެރިިކަމުގަައި އަދަބު ލުއިކޮށްދިނުމާއި މައާފު ދިނުމުގެ ގާނޫނުގެ ދަށުން ގިނަ އަދަދެއްގެ ކުށްވެރިން ދޫކޮށްފައިވެ އެވެ. އެގޮތުން ހަމައެކަނި ނިމުނު އަހަރުވެސް 436 މީހަކު ޖަލުން މުޖުތަމައު ތެރެއަށް ދޫކޮށްފައިވެ އެވެ. އެ މީހުންގެ ތެރެއިން އެންމެ ގިނައީ މަސްތުވާތަކެތީގެ މައްސަލަތަކުގައި ޖަލުގައި ތިބި މީހުންނެވެ.