އިހަވަންދިއްޕޮޅު މެރިޓައިމް ވިޔަފާރި | އެމްޕީއެލް އިން ބޯޓްތަކަށް ފެން ފޯރުކޮށްދޭ އުޅަނދެއް

އިހަވަންދިއްޕޮޅުގައި އެމްޕީއެލް އިން ފެށި މެރިޓައިމް ވިޔަފާރީގެ ދަށުން ބޭރުން އަންނަ އުޅަނދު ފަހަރަށް ބޭނުންވާ ފެން ފޯރުކޮށްދޭން ހާއްސަ އުޅަނދެއް ބާލައިފި އެވެ.

ތިލަފުށީގައި މިއަދު ބޭއްވި ރަސްމިއްޔާތެއްގައި އެމްޕީއެލް މެރިޓައިމް ވިޔަފާރިއާ އަލަށް ގުޅިފައިވަނީ އެ ކުންފުނިން ބަނދެފައިވާ "ވޯޓާ ބަންކަރިން" އަށް ހާއްސަ ފެން ބާޖެކެވެ.

މިއީ 200 ޓަނުގެ ފެން ރައްކާ ކުރެވޭ ބާޖެކެވެ. މީގެ ފަހުން ވޯޓާ ބަންކަރިން އަށް ބެއިނުން ކުރެވޭނީ މި ބާޖެވެ. މި ބާޖުގެ ޚިދުމަތް ފުރިހަމަ ކުރުމަށްޓަކައި ލަސްތަކެއް ނުވެ، ބާޖުގައި ފެން ޕުލާންޓެއް ބަހައްޓައިގެން ފެން ފޯރުކޮށްދޭން ފަށަން އެމްޕީއެލްއިން ދަނީ ތައްޔާރު ވަމުންނެވެ.

އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ ރާއްޖޭގެ އިގުތިސާދު ހަރުދަނާ ކުރެއްވުމުގެ ގޮތުން، އިގުތިސާދީ އައު ސިނާޢަތްތައް އުފެއްދެވުމުގެ މަސައްކަތްތައް ފެށްޓެވީ އަދުގެ ރައީސުލް ޑރ. މުޙައްމަދު މުޢިއްޒު އެވެ. އެގޮތުން ރައީސްގެ ވެރިކަމަށް އެއް އަހަރު ނުފުރެނީސް އިގުތިސާދަށް ދިރުން ގެނެސްދޭނޭ މުހިންމު މަސައްކަތްތަކެއް ފެށްޓެވި އިރު، އެއިގެ ތެރެއިން މުހިއްމު އެއްކަމަކީ އިންޓަރނޭޝަނަލް އޯފުޝޯ ބަންކަރިންގ ގެ ޚިދުމަތެވެ.

އޭނާ ވިދާޅުވި ގޮތުގައި މިދިޔަ ސެޕްޓެމްބަރ މަހު 19 ވަނަ ދުވަހު ފެށި މިޚިދުމަތުގައި، ވޯޓަރ ބަންކަރިން ހިދުމަތަށް ފުރަތަމަ ބެއިނުން ކޮށްފައި ވަނީ، ކޮޅުވެއްޓި އެއްގައި ކަޅު ހަން ބަހައްޓައިގެންނެވެ. އެއިގެ ފަހުން ދެމަސް ދުވަސް ނުވަނީސް، މިއަދު މިވަނީ ވޯޓަރ ބަންކަރިން އަށް ތައްޔާރު ކުރި “ފެން ބާޖު” ހިދުމަތަށް ނެރެވިފައި އެވެ. މިއީ ތިލަފުށީގައި އޮންނަ އެމްޕީއެލް ގެ ޑޮކުޔާޑުގައި، އެމްޕީއެލް އިން ތައްޔާރު ކުރި ބާޖެކެވެ.