ސިޔާސީ ޕާޓީތައް ޖޫރިމަނާ ކުރެވޭ ބިލު ފާސްކޮށްފި
ބިލުގައި އިތުރަށް ހިމަނާފައި ވަނީ، ޕާޓީއެއް އުވާލައިފިނަމަ، އެ ޕާޓީގެ ނަމާއި ނިޝާނާއި ސިއްކަ އާއި ކުލަ ފަދަ ޕާޓީ ރަމްޒުކޮށްދޭ ތަކެތި ޕާޓީ އުވާލާތާ ފަސް އަހަރު ނުވާ ނަމަ ބޭނުން ނުކުރެވޭނެ ކަމަށެވެ.
ސިޔާސީ ޕާޓީތަކުގެ މެންބަރުންނާއި އެމީހަކު ނިސްބަތްވާ ޕާޓީ ބޮޑެތި އަދަދުތަކުން ޖޫރިމަނާ ކުރެވޭ ގޮތަށް ސަރުކާރުގެ ފަރާތުން ހުށަހަޅާފައިވާ ބިލު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ސަރުކާރުގެ ފަރާތުން ދިއްދޫ ދާއިރާގެ މެންބަރު އަބްދުލްލަތީފު މުހައްމަދު ހުށަހެޅުއްވި މި ބިލު މަޖިލީހުން ފާސްކޮށްފައި ވަނީ 61 މެންބަރުންގެ ވޯޓުންނެވެ. އިދިކޮޅު އެމްޑީޕީއަށް ނިސްބަތްވެވަޑައިގަންނަވާ 10 މެންބަރުން ވަނީ ބިލާ ދެކޮޅަށް ވޯޓް ދެއްވާފަ އެވެ.
މި ބިލު ފާސްކޮށްފައިވަނީ އިއްޔެ ބޭއްވި މުޅި މަޖިލީހުގެ ކޮމެޓީގައި ގެނައި ކުދިކުދި ބަދަލުތަކާއެކުގަ އެވެ. ބިލުގައިވާ ގޮތުގައި، ގާނޫނާ ހިލާފުވާ ސިޔާސީ ޕާޓީޔަކުގެ ވަކިވަކި މެންބަރުންނާއި އެމީހަކު ނިސްބަތްވާ ސިޔާސީ ޕާޓީ ވެސް 100،000 ރުފިޔާ އިން ޖޫރިމަނާ ކުރެވޭނެ އެވެ.
ބިލުގައި އިތުރަށް ހިމަނާފައި ވަނީ، ޕާޓީއެއް އުވާލައިފިނަމަ، އެ ޕާޓީގެ ނަމާއި ނިޝާނާއި ސިއްކަ އާއި ކުލަ ފަދަ ޕާޓީ ރަމްޒުކޮށްދޭ ތަކެތި ޕާޓީ އުވާލާތާ ފަސް އަހަރު ނުވާ ނަމަ ބޭނުން ނުކުރެވޭނެ ކަމަށެވެ. އަދި ފަސް އަހަރަކުން އެއް ފަހަރު ގައުމީ ބައްދަލުވުމެއް ނުބޭއްވިޔަސް ޕާޓީ އުވާނުލެވޭނެ ކަމަށް ވެސް ބިލުގައިވެ އެވެ.
މި ގާނޫނު މިގޮތަށް ފާސްކޮށްފައި މިވަނީ ރާއްޖޭގައި ދެވަނަ އަށް އޮތް އެންމެ ބޮޑު ސިޔާސީ ޕާޓީ، ޕީޕީއެމް އުވާލުމުގެ މަސައްކަތް ކުރާ ކަމުގެ އަޑު އަރާފައިވާ ދަނޑިވަޅެއްގަ އެވެ. ޕީޕީއެމްގައި ތިބި ގިނަ މެންބަރުން މިހާރު ދަނީ ސަރުކާރު ހިންގާ ޕީއެންސީއަށް ސޮއި ކުރަމުންނެވެ.
ކޮމެންޓް
Republic of Maldives