މިއީ ދޮގުވެރި، އަނިޔާވެރި، މުނާފިގު ސަރުކާރެއް، ބަދަލުކުރަން މިރެއިން މިރެއަށް ނިކުންނަން ޖެހޭ: ސޯލިހް

ހިނގަމުން މިދާ ރައީސް ޑރ. މުހައްމަދު މުއިއްޒުގެ ސަރުކާރަކީ ދޮގުވެރި، އަނިޔާވެރި، މުނާފިގު ސަރުކާރެއް ކަމަށާ މި ސަރުކާރުން ގައުމު ފުނޑާލާފައިވާތީ އެކަން ބަދަލު ކުރަން މިރެއިން މިރެއަށް ނިކުންނަން ޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހް މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ "ފުދިއްޖެ، ފުނޑިއްޖެ" ނަމުގައި މިރޭ އާޓިފިޝަލް ބީޗުގައި އޮތް އެމްޑީޕީގެ ޖަލްސާގައި ވާހަކަފުޅު ދައްކަަވަމުންނެވެ. ވަރަށް ގިނަ އާންމުން ބައިވެރިވި ޖަލްސާގައި ސޯލިހް ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެފަ އެވެ.

"މިއީ ސިއްރު ސަރުކާރެއް. ދޮގުވެރި ސަރުކާރެއް. އަނިޔާވެރި ސަރުކާރެއް. މުނާފިގު ސަރުކާރެއް،"

އެމަނިކުފާނު ވިދާޅުވީ 2018 ވަނަ އަހަރު އެމަނިކުފާނުގެ ވެރިކަން ނިމި ރައީސް މުއިއްޒަށް ވެރިކަން ހަވާލުކުރިއިރު ގައުމު އޮތީ ވަރަށް ރަނގަޅު ހާލަތެއްގައި ކަމަށާ ނަމަވެސް އަހަރު ދުވަސްވީއިރު މުޅި ރާއްޖެ "ފުނޑާލާފައިވާ" ކަމަށެވެ. އެކަން އެހެންވީ ރައީސް މުއިއްޒަށް ގައުމު ހިންގަން ނޭންގުމުން ކަމަށް ވިދާޅުވި އެވެ.

ސޯލިހް ވިދާޅުވީ ގައުމުގެ ހާލަތު ބަދަލު ކުރަން ރައްޔިތުން ތެދުވަން ވެއްޖެ ކަަމަށެވެ. އެމަނިކުފާނުގެ ސަރުކާރުން ރައްޔިތުންނަށް ދިން ގޯތިތަކާއި ފްލެޓްތައް އަތުލަން ރާވަމުންދާ ކަމަށާ އެ ފުރުސަތު ދީގެން މަޑުން ތިބެވެން ނެތް ކަމަށް ވެސް ވިދާޅުވި އެވެ.

"މިއީ އަޅުގަނޑުމެން އެންމެން އެކީ ނިކުންނަން ޖެހޭ ވަގުތު. ރާއްޖެ މި އޮތީ ފުނޑިފައި،" 

އަދި ވިދާޅުވީ ޑޮލަރުގެ އަގު އިންތިހާއަށް ބޮޑުކޮށް އަސާސީ ހައްގުތަކުން މަހުރޫމްކޮށް މީޑިއާގެ މިނިވަންކަން ގެއްލުވާލައިފި ކަމަށެވެ. މިކަންކަން ވަރިހަމަ ކޮށްގެން ތިބެވެން ނެތް ކަމަށް ތަކުރާރުކޮށް ވިދާޅުވި އެވެ.

"މިރެއިން މިރެއަށް ވެސް މިކަން ކުރަން ނިކުންނަން އަޅުގަނޑަށް ފެނޭ،" ސަރުކާރާއި ދެކޮޅު ހަރަކާތްތައް ރޭވުންތެރިކަމާ އެކު އަވަހަށް މަސައްކަތް ފެށުމަށް ގޮވާލައްވާ ރައީސް ސޯލިހް ވިދާޅުވި އެވެ.

މިރޭގެ ޖަލްސާގައި ރައީސް ސޯލިހް ވަނީ އަންނަ އަަހަރަށް ލަފާކޮށް ހުށައަޅާފައިވާ ބަޖެޓަށް ވެސް ވަރަށް ބޮޑަށް ފާޑު ވިދާޅުވެފަ އެވެ. 2025 ވަނަ އަހަރުގެ ދައުލަތުގެ ބަޖެޓް ރައީސް ސޯލިހް ސިފަ ކުރެއްވީ ތަފްސީލެއް ނެތް، ދަރަނި ބޮޑު ބަޖެޓެއްގެ ގޮތުގަ އެވެ.

އަދި ވިދާޅުވީ މިއީ "ވިޔަފާރިވެރީންގެ ޖީބަށް އަތްބާނަން ރާވާފައިވާ ބަޖެޓެއް" ކަމަށެވެ.

ރައީސް މުއިއްޒަކީ އާ ޓެކްސްއެއް ނުގަންނަވާނެ ކަމަށާ ޓެކްސް ބޮޑު ނުކުރައްވާނެ ކަމަށް ވިދާޅުވެ ވެރިކަމަށް ވަޑައިގެންނެވި ވެރިއެއްކަން ފާހަގަ ކުރައްވާ ވިދާޅުވީ މިއަދު ފެންނަނީ ޓެކްސް ބޮޑު ކުރަން ހުށައެޅުއްވި މަންޒަރު ކަމަށް ރައީސް ސޯލިހް ވިދާޅުވި އެވެ.

އަދި އެމަނިކުފާނުގެ ސަރުކާރުން އެންމެ ފަހުން ހުށައެޅި ބަޖެޓް -- 2024 ވަނަ އަހަރަށް ފާސްކުރި ބަޖެޓް އެންމެ އަށް މަހުން މި ސަރުކާރުން ހުސްކޮށްލި ކަމަށް ވިދާޅުވި އެވެ. އަދި އެ ބަޖެޓުން 30 ބިލިއަން ރުފިޔާ ހަރަދު ކުރި ގޮތުގެ ތަފްސީލެއް ވެސް ސަރުކާރުން ހާމަނުކުރާ ކަމަށް ވިދާޅުވި އެވެ.

"އަޅުގަނޑު ވެސް ހިތަށް އަރާ މި 49 ބިލިއަން ރުފިޔާ އިން މި ކުރީ ކީއްބާވައޭ..،"

ރައީސް ސޯލިހް ވަނީ 2018 ވަނަ އަހަރު އެމަނިކުފާނު ވެރިކަމަށް ވަޑައިގެންނެވިއިރު ގައުމުގެ ހާލަތު އޮތްގޮތް ސާފުކޮށް ދެއްވާފަ އެވެ. ވިދާޅުވީ ރައީސް ޔާމީން ވަޑައިގެންނެވީ ދައުލަތުގެ ހުރި ފައިސާއެއް އެއާޕޯޓް ހޯދަން ޖީއެމްއާރަށް ދައްކާފައި ކަމަށެވެ.

އެހެން ކަމުން ޖެހިވަޑައިގެންނެވީ ރިސްކު ނަންގަވާ އެންމެ މުހިންމު ފިޔަވަޅުތައް އަޅުއްވަން ކަމަށެވެ. އެކަންކަން ކުރައްވާ ގައުމުގެ ހާލަތު ރަނގަޅު ކުރެއްވީ އެެއްވެސް މީހަކު ވަޒީފާއިން ވަކިނުކޮށް ބަރާބަރަށް މުސާރަ ދެމުން ކަމަށް ވިދާޅުވި އެވެ.

"މިއަދު މި ގައުމު ސަލާމަތްވެފައި މި އޮތީ އަޅުގަނޑުމެން ކުރި މަސައްކަތުން،" ރައީސް ސޯލިހް ވިދާޅުވި އެވެ.