ތިލަމާލެ ބްރިޖު: ކުރީ ދެ އަހަރުން ނުކުރެވުނު މަސައްކަތް މި އަހަރު ކޮށްފި

އިންޑިއާގެ އެފްކޮންސް ކުންފުނި އަޅަމުން ގެންދާ ތިލަމާލެ ބްރިޖުގެ މަސައްކަތުން ނިމިފައިވަނީ 46 ޕަސެންޓް ކަމަށް އިންފްރާސްޓްރަކްޗާ މިނިސްޓްރީން މިއަދު ބުނެފި އެވެ.

އެ މިނިސްޓްރީން މިއަދު ބުނީ މީގެ ތިން އަހަރު ކުރީން ފެށި ތިލަމާލެ ބްރިޖު މަޝްރޫއުގެ 46.58 ޕަސެންޓް މިހާރު ނިމިފައިވާ ކަމަށެވެ. ރައީސް ސޯލިހްގެ ސަރުކާރު ނިމުނުއިރު ބްރިޖު މަޝްރޫއުން ނިމުނީ 28.70 ޕަސެންޓެވެ.

ބްރިޖު މަޝްރޫއުގެ ކުރީގެ ސްޕީޑަށް ވުރެ ހަލުވީ މި ސަރުކާރުން ކުރި މަޝްވަރާއިންނެވެ. ނަތީޖާއެއްގެ ގޮތުން މިދިޔަ 52 ހަފްތާގައި ބްރިޖުން ނިންމުނު ނިސްބަތް ވަނީ ރައީސް ސޯލިހްގެ ވެރިކަމުގެ ދެ އަހަރެއްހާ ދުވަހު ކުރެވުނު މަސައްކަތަށް ވުރެ އިތުރުވެފަ އެވެ.

ސަރުކާރަށް އަހަރުވާން ދާއިރު އޭގެ ކުރީ އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މީގެ ކުރިން ބޭއްވި ނޫސްވެރިންގެ ބައްދަލުވުމުގައި ވިދާޅުވީ ބްރިޖު އެއްކޮށް ނިމޭނެ ކަމަށް ބެލެވެނީ 30، ސެޕްޓެމްބަރު 2026 ގަ އެވެ. ނަމަވެސް ބްރިޖު އަވަސް ކުރަން މަސައްކަތް ކުރައްވަމުން ގެންދާކަން މިނިސްޓަރު ފާހަގަ ކުރެއްވި އެވެ.

ބްރިޖުގެ މަސައްކަތުގެ އަޕްޑޭޓް ސަރުކާރުން ދެމުން ގެންދާއިރު ބްރިޖުގެ މަސައްކަތް ފެށި މިދިޔަ ސަރުކާރުން ބްރިޖުގެ މައުލޫމާތު ގެންގުޅުނީ ސިއްރުކޮށްގެންނެވެ. އޭރު މައުލޫމާތު ދެނީ ހަމައެކަނި އިންޑިއާ އެމްބަސީއިންނެވެ.