ފުލެޓު ލިސްޓާމެދު ރައީސްގެ ނިންމެވުން | "އެއްވެސް މީހަކު ބޭނުންވެގެން އުނިއިތުރެއް ނުގެނެވޭނެ"

ފަހިދިރިއުޅުން ކޯޕަރޭޝަނުން އަޅަމުންދާ 4،000 ހައުސިން ޔުނިޓުގެ ހައްގުވެރިންގެ ލިސްޓަށް އެއްވެސް މީހަކު ބޭނުންވެގެން އުނިއިތުރެއް ނުގެނެވޭނެ ކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަޖިލީހުގެ މެންބަރުންނަށް އަންގަވައިފި އެވެ. 

ރައްޔިތުންގެ މަޖިލީހުގެ މެންބަރުންނާއި ރައީސް އިންނަވާ ވަޓްސްއަޕް ގުރޫޕެއްގައި ޕީއެންސީއަށް ނިސްބަތްވެވަޑައިގަންނަވާ މެންބަރަކު ކުރެއްވި ސުވާލަކަށް ދެއްވި ޖަވާބުގައި ރައީސްވަނީ ވަރަށް ސަރީހަކޮށް ފުލެޓު ލިސްޓާ ގުޅިގެން މަޖިލީހުގެ މެންބަރުންނަށް އެއްވެސް ނުފޫޒެއް ފޯރުއްވުމުގެ ފުރުސަތެއް ނުދެއްވާނެކަން ހާމަކުރައްވާފަ އެވެ. 

ތިނަދޫ ދެކުނު ދާއިރާގެ މެންބަރު މުހައްމަދު އަލްސަން އެ ގުރޫޕަށް ކުރެއްވި މެސެޖާއި އެ މެސެޖަށް ރައީސް ދެއްވި ޖަވާބު "މިރާ"އަށްވަނީ ފެނިފަ އެވެ. އަލްސަން އައްސަވާފައިވަނީ ފަހިދިރިއުޅުން ފުލެޓު ލިބޭ މީހުންގެ ލިސްޓު އާންމުކުރުމުގެ ކުރިން މެންބަރުން އެދިވަޑައިގަންނަވާ ގޮތަށް މެންބަރުންނަށް އެ ލިސްޓު ހިއްސާކުރާނެތޯ އެވެ. 

މެންބަރު މި ސުވާލު ކުރެއްވިއިރު ރައީސް ހުންނެވީ އދ.ގެ އާންމު މަޖިލީހުގެ ޖަލްސާގައި ބައިވެރިވެވަޑައިގަތުމަށް އެމެރިކާގެ ނިއުޔޯކުގަ އެވެ. ނަމަވެސް މެންބަރުގެ ސުވާލަށް ވަގުތު ލިބިވަޑައިގަތުމާއެކު ރައީސްވަނީ ވަރަށް ސާފުކޮށް ޖަވާބުދެއްވާފަ އެވެ. 

"އެއްވެސް ނަމެއް އުނިކޮށް އިތުރެއް ނުކުރެވޭނެ އެއްވެސް ބޭފުޅަކު ބޭނުންވެގެންނެއް،" ފުލެޓު ލިސްޓާމެދު މެންބަރު ކުރެއްވި ސުވާލަށް ޖަވާބުދެއްވަން ރައީސް ފެއްޓެވީ މި އިބާރާތުންނެވެ. އަދި ރައީސް ވިދާޅުވީ އެ ލިސްޓުގައި ނަން އޮންނާނީ ކަނޑައެޅިފައިވާ އުސޫލުން ޕޮއިންޓު ދިނުމަށްފަހު އެންމެ މަތިން ލިބޭ މީހުންގެ ނަންތައް އެކަނި ކަމަށެވެ. 

ރައީސް އިތުރަށް ވިދާޅުވީ އެއްވެސް މީހެއްގެ ނަން ލިސްޓަށް އިތުރުކުރަން އެއްވެސް ބޭފުޅަކަށް ފުރުސަތު ނުދެއްވާނެ ކަމަށެވެ. އަދި ކުރިން ބަޔަކު އެކަހަލަ ކަންކަމުގައި ވިޔާނުދާ ގޮތްގޮތަށް ކަންކޮށްފައި އޮތަސް އެގޮތަށް އެކަން ކުރުމަށް އެމަނިކުފާނު ރައީސްކަމުގައި ހުންނަވައިގެން ފުރުސަތު ނުދެއްވާނެ ކަމަށް ރައީސް ވިދާޅުވި އެވެ. 

"އަޅުގަނޑު ނެތިން އެއްވެސް ފުރުސަތެއް ދޭކަށް ލިސްޓަށް އެއްވެސް ބޭފުޅެއްގެ ރިކުއެސްޓަށް ނަމެއް ލުމަށް،" ރައީސް ވިދާޅުވި އެވެ. 

"އެއް ޒަމާނެއްގައި ބަޔަކު އުޅުނު ވިޔާނުދާ ގޮތަށް ކަންކުރާކަށް އަޅުގަނޑު މި މަގާމުގައި ހުރެ ފުރުސަތެއް ނުދޭނަން. ސޮރީ!،" 

މަޖިލިސް މެންބަރުން ބޭނުންވާ ބަޔަކަށް ފުލެޓުތައް ބަހައިލުމަށް ރައީސް މަސައްކަތްކުރައްވާކަމަށް ބަޔަކު މީސްމީޑިޔާގައި އަޑުތައް ފަތުރަމުންދިޔަ ނަމަވެސް ރައީސް މެންބަރުންނަށް އަންގަވާފައި އެންގެވުމުން އެފަދަ ގޮތަކަށް ފުލެޓު ލިސްޓަށް ބަދަލުގެނެސް ނުފޫޒު ފޯރުވަން ފުރުސަަތު ދެއްވަން ބޭނުންފުޅުނުވާކަން ސާފެވެ.