ވޭޕް މަނާ ކުރާ ބިލު މަޖިލީހުން ފާސްކޮށްފި

ރާއްޖެއަށް ވޭޕް އެތެރެކުރުމާއި ބޭނުން ކުރުން މަނާ ކުރުމަށް ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހުތައް ރައްޔިތުންގެ މަޖިލީހުން މިއަދު ފާސްކޮށްފި އެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްވި މި ބިލު މަޖިލީހުން ފާސްކުރީ 54 މެންބަރުންގެ ވޯޓާއެކު އެވެ. އަށް މެންބަރަކު އެއްވެސް ކޮޅަކަށް ވޯޓު ދީފައެއް ނުވެ އެވެ.

މި ބިލު ތަސްދީގު ކުރުމުން، އަންނަ ބުރާސްފަތި ދުވަހުން ފެށިގެން ރާއްޖެއަށް ވޭޕް އެތެރެ ކުރުން މަނާވާނެ އެވެ. އަދި، އަންނަ މަހުގެ 15 ވަނަ ދުވަހުން ފެށިގެން ވޭޕް ވިއްކުމާއި ބޭނުން ކުރުން މަނާވާނެ އެވެ.

އޭގެ ފަހުން ރާއްޖޭގައި ވޭޕު ވިއްކާ ކޮންމެ މީހެއް 20،000 ރުފިޔާ އިން ޖޫރިމަނާ ކުރާނެ އެވެ. އަދި، ވިއްކި ކޮންމެ ވޭޕަކަށް 10،000 ރުފިޔާގެ ޖޫރިމަނާއެއް ކުރާނެ އެވެ. ހިލޭ މީހަކަށް ވޭޕެއް ދިނަސް 10،000 ރުފިޔާއިން ޖޫރިމަނާ ކުރާނެ އެވެ.

އަދި ވޭޕް ކުރަން ބޭނުން ކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް ރާއްޖެ އެތެރެކޮށްފި ނަމަ، 50،000 ރުފިޔާއިން ޖޫރިމަނާ ކުރާނެ އެވެ.

މީގެ އިތުރުން އަންނަ ބުރާސްފަތި ދުވަހުން ފެށިގެން ދުންފަތް ގަނެ ވިއްކޭނެ އެންމެ މަތީ އުމުރަކީ 21 އަހަރު ކަމަށް ވެސް ބިލުގައި ހިމަނާފައިވެ އެވެ.